Danak Dak adaoh tamia “Taneh ia bak hatai bui sambai chreih chrai” rah tabiak di melam kabroi 20/4 di mblang adaoh tamia langiu langik anak Hoi truong Thống Nhất, Ban raya Ho Chi Minh hu ba mai sa danak dak adaoh tamia biak gheih, praong prang saong biak mekre meta tui iek, piah pachreih yaok ribau rahra mai mong iek. Danak dak hu mbaok Tong Bi thu Tô Lâm saong rilo urang jakar lambaok vakil Trung uong, urang dang akaok Ban raya Ho Chi Minh. Taneh ia bak hatai bui sambai lac danak dak adaoh tamia ndung bak asal kadha sajarah. Taong abih 3 danak dak jeng hu peih panuac akaok meti meng dua baoh panuac “Caong takre”, nan lac: Caong takre yasa; Caong takre uak drei tagok saong Caong takre khang kajap ginup meda. Yaok danak adaoh tamia hu dom urang parang iak lac sa kadha, sa bruk hu makna di sajarah meng tuk taneh ia njauk neh rabha tal tuk yasa, dak padang saong paatagok.

Jeng dalam bingun ini, di Ban raya HCM, Mentri Quoc phong, Mban Tuyen giao Trung uong, Mentri Kong an, Hoc vien Chinh tri pakat negar Ho Chi Minh, Thanh uy TP.HCM pambuak bruk ginum biai roh duah pakat negar “ Jayak prong bilan Pataih thun 1975 ngan haong jaman birau di bangsa Viet Nam”. Nyaom biai ini brei mboh, patagok  bruk ngak hu jak jeng saong bac megru tapa bruk Jayak praong bilan Pataih thun 1975, lime pluh thun tapa, taong abih Ndang, taong abih  bhap bini, abih bol lin rik prein, sa hatung hatian, kham merat mek hu babat bangsa saong CNXH, jhul khang bruk salih birau, padang saong khik caga taneh ia palei negar XHCN, ngak hu rilo bruk jak jeng siam mekre, hu makna yau panuac kakei di Wa Ho, ba taneh ia patagok glong, papar atah di labik dang birau.

Tinh Ben Tre daok peih bruk duah thau hatai caong khin di bhap bini ka bruk ramik veik dom jabat ngak bruk di karja pakat xa, phuong. Tui nan, tinh brei patrun 148 don vi xa, phuong, ban sit urak ini daok 48 xa , phuong nga hu jaik 68% tui bruk tacei pato di Karja Negar. Njauk ndem tal, Ben Tre brei pagam tame 3 xa Định Thủy, Phước Hiệp, Bình Khánh (huyện Mỏ Cày Nam) mek angan birau lac xã “Đồng Khởi”. Padang xã Đồng Khởi hu biak rilo urang jakar  saong bhap bini dalam bhum palei  njauk hatai saong mboh hadah mbaok meta ka ilamo sajarah dakrai bangsa ka rairah harei hadei.

HĐ bhap bini tinh Soc Trang hu ginum biai, langyah saong yasa taneh ia  tapa Sarak  brei dak ramik don vi hanh chinh pakat tinh saong pakat xa di tinh. Ini lac bruk ngak brei salih birau dalam jabat karja, rik tame pambuak khang kajap jang  bruk hu meng rilo hu palei, dom bangsa daong tame ka bruk patagok cak rok kaya meda di taneh ia palei negar. Kuhria taong abih tih jabat karja  pakat co so di tinh Soc Trang hadei ba tame gauk lac hu 43 xã, phuong, trun labaih 60% dut haong dom don vi jabat karja pakat xa yau urak ini.  

Pachrei tui bruk Harei tapuk saong ilamo bac tapuk Viet Nam( 21/4), tinh Dak Lak peih ngak rilo bruk tabiak tapuk saong tu girong tapuk ka anek saih di dom bhum palei kan kandah dalam tinh. Nyaom Akayat Nghe thuat tinh Dak Lak hu jao brei yaok pluh kadha tapuk van hoc nghe thuat alin ka Sang bac THPT Trần Đại Nghĩa saong tabiak baoh tapuk “ Tapuk Van hoc Nghe thuat, Bao chi bac megru saong ngak tui jalan diuk rai siam mekre di Ho Chi Minh” kayua Kapol roh duah ngak tabiak. Di Sang bac Sang bac THPT Trần Đại Nghĩa, anek saih hu pataom mbaok, bac megru, parang iek tapuk, bac tapuk saong ma-in dom kadha bac tui tapuk biak chreih  chrai.

Kadung jien  Uranaih LHQ (UNICEF) khan lac, kuhria hu labaih 6,3 trieu  urang khin daong saong sangka kuhria iek  samar jang klau adait hadei bala baoh taneh tayun megei rah tabiak di bhum kreh negar Myanmar. Tui UNICEF, uranaih saong urang kumei  njauk dang anak rilo kan kandah ka prein yawa kayua langik pandiak catang, kurang ia hacih saong dom ndap nda, kaya mbang yaok harei. UNICEF iew kakei, bruk lavang lavaih  abih di nyu lac ngan haong uranaih, urang kumei metian saong urang maik hu anek daok mam.

Mentri Menyek pariak Ai Cập hu khan brei thau ka bruk kuac mek menyek di dom labang menyek di bhum taneh Ras Gharib, daok di gah Pur, yau sa bruk dalam dom bruk ngak brei parilo menyek dalam negar saong takik pambak tame bruk blei menyek meng negar langiu tame. Ai Cập kham kuac mek  75 bingun menyek  birau dalam 12 bilan  anak tal, piah parilo menyek yau urak ini tagok veik 7.500 thung yaok harei saong kuhria patagok veik meng bingun menjek  di Ras Gharib tal 9.000 thung sa harei.

Kapal vu tru Soyuz MS-26 pajeng dom urang phi hanh gia negar Nga Alexey Ovchinin saong Ivan Wagner gam urang phi hanh gia umo taha abih di NASA lac Donald Pettit gilac veik mai baoh taneh dalam siam mekre di page harei kabroi 20/4. Ini  lac kapal haok ka 10 di Nga hu cuh tagok langik dalam thun 2024. Dom urang nan daok veik balai kapal vu tru ISS angaok langik dalam labaih 200 harei piah peih ngak labaih 40 bruk roh duah ilamo, dalam nan hu 3 bruk mbang akaok meti hu peih ngak iek.