Page ini di Ban raya Ho Chi Minh, Mban Chap hanh Trung uong Ndang, Quoc hoi, Akaok negar, Rajaei, Uy mban Trung uong Mat tran Negar Viet Nam saong Ban raya Ho Chi Minh peih praong prang bruk Mittinh, dieu binh, dieu hanh pahadar 50 thun Harei peih paha gah Meraong negar, yasa taneh ia (30/4/1975 - 30/4/2025). Danak dak Harei pahadar dalam nan hu: Danak dak adaoh tamia, Adat Salam hala dok, Asal kadha piah ndom di urang dang akaok Ndang, Karja; panuac ndom di lambaok ka Bol lin meng kal, urang lambaok ka rai dam dara Viet Nam; danak dak dieu binh – dieu hanh saong palao ciim katrau. Ini lac sa danak dak chinh tri hu bhap bini, bol lin saong rahra dalam taneh ia caong maong.

Gam haong bruk pahadar, dalam dom harei tapa di Ban raya Ho Chi Minh daok peih ngak biak rilo bruk salam uan bruk pahadar, dalam nan hu: Cuh gilau, Pok binguk pahadar dom Anh hung liet si; Cuh gilau, pok bingu kakuk hadar dhar phol Chu tich Ho Chi Minh saong Po negar Tôn Đức Thắng; dom bruk ngak piah pahadar dom baoh sang urang liet si, urang hu buh prein ngak bruk daong taneh ia, urang bol lin dahlau diah,  urang dam dara xung phong saong dom bol lin hu mbaok tame Tong tien cong saong dang tagok mesruh metak  Bilan pataih thun 1975; Nyaom biai ka bruk ngak hu jak jeng 50 thun padang ngak, khik caga saong patagok Ban raya Ho Chi Minh; danak dak  cuh phao bingu di melam 30 bilan 4 thun 2025…

Tinh Tra Vinh bahrau peih Harei pahadar 50 thun Harei peih paha gah Meraong negar, yasa taneh ia; raok Huan chuong Ho Chi Minh saong pathau khan bruk Mbaoh tangin di Thu tuong Rajaei brei angan ka Tra Vinh salah blaoh bruk padang palei pala bahrau. Meng sa bhum palei daok rilo kan kandah hadei mesuh metak, tal ini, bruk cakrok patagok GRDP thun 2024 mek hu labaih 10%; gah kinh te mek hu jaik 97.000 ty dong; jien mek tame kuhria tui yaok urang mek hu jaik 95 trieu dong/thun. Abih di nyu nan lac tinh akaok meti di Tay Nam bo hu mbaoh tangin ka bruk salah blaoh bruk padang palei pala bahrau paglaong.

Di var pahadar 50 thun Harei Peih paha gah Meraong negar, yasa taneh ia, peih ngak di harei kabroi 29/4, Bi thu Tinh uy Hau Giang  Đồng Văn Thanh brei mboh, gam haong taneh ia, Dang bo saong bhap bini  Hau Giang khin sahaeng khin ngak, patagok prein khang ta-eng di drei, thau pandar lagaih njauk bruk, ngak bruk cati catang, Hau Giang patagok khang kajap, mek hu bruk jak jeng siam mekre di rilo gah.

Bingun padeih padei harei 30/4 – 1/5 thun ini, urang ngak bruk hu padeih padei 5 harei danak gauk, nan hatai caong nao mai tagok biak glaong. Dalam nan Mblang kapal ahaok dunya Tân Sơn Nhất kuhria rah tapa raok hu 750 mbang par, tagok labaih 10% dut haong saka par ahaok urak ini. Tabung glaong lac harei 2/5 saong harei 4/5 kuhria 770 mbang par yaok harei. Kayua nan tuai damuai hu mbaok di ga dalam negar dahlau 2 mon saong ga dunya dahlau 3 mon; srap gap ginup harak gar di drei saong brei check-in online dahlau.

Dalam dom  harei padei Harei Dunya urang ngak thun ini di Trung Quoc, urang tame tabiak negar tapa dom pambang negar  ini  kuhria rah tapa lac 2,15 trieu mbang sa harei. Thun 2024, Trung Quoc padang hu bruk praong lac jaik 300 trieu mbang tuai damuai dalam negar tuk padeih Harei Dunya urang ngak saong yam tal bruk pasiam pachreih hu rilo tuai damuai negar langiu mai jarah rivang tani tanat.

Toa thanh Vatican brei peih Mbang Nyaom biai kandauk Hong y dalam harei 7/5 piah ruah tabiak urang patui veik ngak bruk salih ka Giao hoang Francis bahrau plang lahik. Nyaom biai kandauk Hong y piah pilih ruah Giao hoang bahrau ka 1,4 ty urang tui Cong yao dalam dunya. Dahlau tuk yam tame pilih ruah kandauk di Sang nguyen Sistine dalam Ndien Tong toa di Vatican, dom Hồng y hu ginup tanut hu mbaok tame nyaom biai kandauk brei hu mbaok tame di adat praong di Vuong cung Thanh duong Thanh Peter.

Mexico njauk hatai brei pabak ia My meng dom kraong pandar haong gauk di dua negar – ini lac bruk ein sabe piah plaik njiak taong jien je trak jang saong sa bruk pambuak haong My. Dahlau di nan, Tong thong My brei taong jien je ndap nda jeng yau dom jalan taong pahat karei ngan haong Mexico kayua “tavak sre ia”, kuhria mboh jaik 420 ti gallon sumu 1 ti 600 trieu met khoi. Ong Trump ndem puac Mexico “klaik ia” di urang ngak nong di Texas oh ngak tui dom sarak sanya di thun 1944./.