Tinh Gia Lai hu peih bruk brei oh daok 7.631 baoh sang taik tahak, mek hu 93% dut haong bruk kuhria dahlau. Dalam tinh hu salah blaoh saong ba tame daok 5.244 baoh sang, samu haong 64%. Taong abih jien buh tabiak lac labaih 441 ty dong. Yaok baoh sang bahrau hu tinh daong 60 trieu dong; baoh sang pasiam hu tinh daong 30 trieu dong. Bruk peih danak dak brei oh daok baoh sang taik tahak oh lac langyah hatai caong hu sang daok di rahra, bo daok rik daong tame jalan patrun kathaot saong khik kajap labik daok saong brei bruk ngak ka rahra dalam tinh Gia Lai.

       5 thun tapa, tinh Hau Giang peih labaih 490 tal pato, pasram bruk ngak nong, hu mbaok jaik 11.250 urang bac lac rajakar saong urang ngak mbang pala drak raong glang. Asar kadha pasram tui jalan paglong ilamo, pandar ilamo kong nghe birau, hacih sa-at pandap mbang, dua thau ka hlau gha di kaya nong saong yaih khan kaya nong. Tapa dom tal pato bac, pasram nan hu daong paglong yaom kaom kaya nong, ba mbuan lagaih dalam bruk pambuak saong pablei pandap ngak nong ka bhap bini…

Tinh Kien Giang daok peih ngak taong abih 21 danak dak buh jien tame duh ka Adit Pakat glaong APEC 2027, di Ban Phú Quốc. Tinh ba tabiak jalan ngak padang Pasak pasang iek bruk dui ba hadah krah (IOC) piah pasang iek taong abih ban. Pasak ini lac sa “glo lek taka so” pataom du lieu meng dom gah yau ye jalan mbak, an ninh, alam langik, pabak ia, hareik klak…piah daong ka urang pan akaok ban ba tabiak dom bruk ka samu saong njauk lagaih. Ini lac sa bruk ngak hu makna dalam bruk patagok ndo thi hadah krah bo tinh Kien Giang ba tabiak, oh lac duh ka APEC bo daok pamaong tal patagok karo kajap.

Jalan pambuak tabiak jalan Ho Chi Minh di xa Vien An Dong, huyen Ngoc Hien, tinh Ca Mau hu 5 tatua hu padang ngak blaoh. Yau nan min, dom tatua glong jang mbaok jalan kuhria rah tapa labaih 2m yau nan ye oh ka lagaih. Bruk nan kayua dom don vi padang ngak tui tanut chuan tatua gah ala brei glong 2 met meteh dut haong mbaok ia saong tatua birau oh atah jang taua klak…Po buh jien tame ngak brei pasiam veik lac ngak pambuak tatua atah tabiak tal jalan.

Harei kabroi 29/5, UB Bhap bini phuong Long Bình Tân, Ban Bien Hoa, tinh Dong Nai pambuak haong kapul chuc nang pasang iek yaok tan ikan raong dalam kavei di angaok kraong Dong Nai metai rilo hadei mbang hajan praong di hadah page. Bruk ini hu medil kayua gaok kanjah jhak meng ia di angaok halau ia di labik ngak kong tui ia hajan tuh trun ngak ka ikan metai rilo. Karja palei jak ba kapul urang hu mbaok tame daong rahra chraong ikan tagok, ramik dom ikan metai piah plaih ngak njom nerak. Kuhria meng akaok meti, ikan metai labaih 6 tan. 

Trung Quoc birau brei thau bruk roh duah birau gah khao co hoc saong khik ramik ilamo di ban ine Bac Kinh. Dalam dom bruk mboh siam mekre, njauk caik hatai  lac bruk ngak pasiam veik mrang ameh meng kan, brei mboh bruk pambuak siam mekre kong nghe pasiam veik birau gam tui ilamo meng kan dalam bruk khik ramik drap ar kaya ilamo. Ini lac mbang akaok meti Trung Quoc pasiam veik hu jak jeng sa baoh merang meng jaman negar Thổ Phồn di urang Tạng, hu ngak biak gheih.

Jabat chuc nang Thai Lan brei thau lac daok jhul khang bruk ngak tabiak dom janih jru pacang virus Covid-19 piah pacang cakak bruk jit ruak rah tabiak srau kadau. Kuhria di adit meng blaoh, Thai Lan hu jaik 55.000 urang njauk Covid-19. Dalan nan, jaik 3.000 urang njauk brei taong ruak dalam sang iek ruak saong hu 5 urang metai. Ban ine Bangkok patui veik lac labik hu rilo urang njauk Covid-19 bahrau rilo abih dalam adit hu labaih 9.500 mbang urang ruak.

Urang ngak praong Brazin birau khan lac dom mbang ruak kum manuk ada di athur  glai  raong di sa var ro pablei salih di taneh ia. Braxin lac tanh ia pablei manuk ralo abih di dunya,  yau nan ye bruk tamuh jit ruak manuk ada  di sa trang trai di ban Montenegro ba tal rilo taneh ia ba tabiak adat pakauk blei manuk ada meng Brazin dalam bhum palei jeng yau dalam negar./.