Yaom lac daok rilo kan kandah, min dom thun tapa, gam haong bruk patagok kinh te - xa hoi, tinh bac Lieu sangka iek praong peih ngak siam sarak daong padang sang daok ka baoh sang kathaot, jaik kathaot, dalam nan brei caik dahlau ka baoh sang kathaot lac mikva bangsa Khmer. Ngak Danak dak “Brei oh daok baoh sang taik tahak”, dalam tinh Bac Lieu hu 176 baoh sang urang Khmer daok dalam danak dak njauk brei pasiam, padang bahrau. Taphia di nan prein daong di trung uong, di tinh, dom bhum palei jeng jak ba urang ndoan, urang dalam kapul, kapul bol lin pan phao karaong, gam haong rahra rik daong padang sang ka mikva bangsa Khmer daok kan kandah.

Di Gilang khik drap ar tinh Gia Lai birau peih bruk pathau khan ngan haong kadha “ Suan yawa ceik glai”, piah pambak praong bruk likei kumei brei sumu yau gauk, meyaom bruk kham merat di urang kumei saong uranaih bangsa takik. Tui kuhria hu jaik 300 urang lambaok, lac urang kumei tinh Gia Lai, dom urang dalam dalikan pachreih ka urang karei. Di var nan, Mban peih bruk hu alin brei 35 paok jien bac ka anek saih bangsa takik yam tapa kan kandah piah pabak prein khang ka dom adei patui veik bruk bac megru saong harei hadei.

Klau kapul ndoan naih gheih di labik gah Meraong Negar, dalam nan hu kapul ndoan Ban raya Ho Chi Minh, kapul ndoan Binh Thuan saong kapul ndoan Tay Ninh brei patui veik meraik gauk di Vong chung ket dalam taneh ia Mbang pakacah “Sap adaoh urang jaoh jo”, kuhria hu rah tabiak di Ha Noi dalam bilan 6 anak tal. Ndoan ban raya Ho Chi Minh mek hu yai glaong abih ngan haong klau kadha biak naih gheih lac: Sa urang adaoh kadha Bài ca hy vọng, kapul urang adaoh kadha Sống như những đóa hoa saong me-in ragam ragu bangsa ka kadha Đất nước trọn niềm vui. Yai ka Dua ka ndoan Binh Thuan saong yai ka klau ka Soc Trang. Dalam nan, ndoan Binh Thuan ba mai mbang pakacah sa kadha ndung bak ilamo bangsa Cam.

Bo Chỉ huy Bol lin Bien phong tinh Soc Trang pambuak haong Kapol pachreih bac tinh Soc Trang birau hu jao brei paok jien bac ka danak dak “Urang jakar, urang Bol lin daong adei nao bac” thun 2025. Danak dak daong ka 11 anek saih di bhum tasik tapen negar  lac 7,4 trieu ka sa adei sa thun. Mbang ini, Kapol, pachreih bac tinh Soc Trang  hu alin brei 50 paok jien bac yaok paok 1 trieu jien ka dom anek saih raidiuk kan kandah dalam danak dak  “ Daong adei nao bac”.

Sangka iek praong ka bruk pato bruk ngak saong brei bruk ngak, jhul tagok bruk salih bruk ngak di bhum mikva urang bangsa takik, tukvak tapa huyen Krông Nô, tinh Dak Nong peih ngak rilo tal pato pakai bruk ngak urang ngak bruk lac urang bangsa takik. Ong Ngân Thanh Hải, Akaok Jabat Bangsa saong Agama huyen Krông Nô brei thau: Bruk pato pakai bruk ngak ka urang ngak bruk di palei pala dalam tukvak tapa, abih di nyu nan lac urang ngak bruk bhum urang bangsa takik saong bhum ceik.

Sa mbang pakacah taong raboh gauk di robot thaik manuac  di dunya birau hu peih ngak di ban Hàng Châu, tỉnh Chiết Giang, Trung Quốc hu pachreih ralo, caong khin ngak brei patagok samar di gah ngak tabiak robot. Ini lac bruk pakacah akaok meti di dunya ka robot thaik manuac, hu dom robot thaik manuac G1 birau. Robot brei ngak tui panuac pato gah langiu di võ đài, brei adat ka manuac saong robot ngak bruk haong gauk tuk pakacah.

Disney Plus Han Quoc bahrau peih danak dak “Open House 2025” brei iek gilac veik jalan patagok meng tuk ba tabiak camreip di thun 2021. Dalam 4 thun tapa, nen tang online ini hu ngak tabiak labaih 40 phim hu ngak meng han Quoc. Hu mboh rilo abih lac phim Tempest – phim biak gheih biak bingi maong hu dua urang danei angan Jun Ji Hyun jeng urang angan Moon Ju dalam phim, sa urang dai su dahlau diah di Lien hop quoc, daok Kang Dong Won jeng urang ngak dac vu kandauk, dua urang nan taong tayah sa bruk ngak kan kandah dalam dunya…

Dom urang roh duah di Dai hoc Queensland, Australia daok ngak iek camereip ka sa janih jru pacang ruak meda jru hu ruak me-ik saradang tuyp 1. Tiến sĩ Aakansha Zala, urang roh duah di danak dak khan lac, janih jru birau ini hu ngak tabiak dak ralo dak siam ka tuyen tuy di dom urang ruak me-ik saradang tuyp 1./.