Gam haong nan pandar dom labik pambuak haong dom sang iek ruak piah thau ka hatai caong, padang jalan kuhria pabak ka lagaih, khik kajap jru tuk halei jeng hu ginup saong dil samu, abih di nyu nan lac kapul jru taong ruak, daong jalan thuak yava saong duh ka bruk pabak prein daong cap cuu. Meng akaok thun tal ini, dalam negar hu labaih 640 urang njauk COVID-19. Rilo abih di Ban raya Ho Chi Minh hu 80 urang, hu 2 bruk plang lahik kayua njauk ruak COVID-19 pagam tui rilo ruak trak karei.

Page harei 6/6, labaih 76.000 anek saih pakacah tame tal bac 10 di TPHCM. Page anek saih pakacah mon Ngu van (120 minit), biar harei pakacah Ngoại ngữ (90 minit). Harei 7/6, page anek saih pakacah mon Toan (120 minit). Meyah anek saih tut angan pakacah tame sang bac chuyen, bac gam tich hop meda pakacah mon chuyen tich hop di biar harei dalam 150 minit. Dahlau di nan, TP.HCM hu 944 anek saih hu pakacah tame tal bac 10 tui hukum ba tabiak. Ini lac dom adei mek hu yai pakat negar, dunya gah padhih the thao; anek saih jaoh jo.

Hu labaih 3.100 baoh sang rahra gaok kan kandah kayua danak dak Vanh dai 4 saong Jalan peih samar Ban raya HCM - Thủ Dầu Một - Chơn Thành, daok ba tabiak kan kandah praong ka bruk peih mbaok taneh di Binh Duong. Anak bruk ini, ong Nguyễn Văn Lợi, Bi thu Tinh uy Binh Duong hu pandar dom pakat, dom gah, karja palei pambuak gauk jhul samar bruk bayar jien hu salah blaoh dalam bilan 6 ini. Gam haong nan pandar dom labik khik kajap raidiuk tani tanat ka rahra piah rahra sahnang hatai jao taneh.

Di tinh Tien Giang jit ta pabui chau Phi tamuh gilac veik. Piah khik caga jit ruak, gah chuc nang padang dom kapol ngak bruk padang iek, jak ba ngak brei pacang caga jit ruak. Bhum palei halei tamuh jit ruak ye karja palei nan brei kuhria njauk ginup hadom pabui ba nao am cuh klak di palei drei. Tui nan, langyah catang dom bruk padauk jit, suai khan brei thau jit, pablei salih, pajeng ba pabui ruak, jaik si ruak, klak pabui metai  gah langiu ba tal ruak njom mbak, njom nerak alam moi truong.

Urang bhum palei hu khan tagok lac hu mboh sa drei baya praong, kuhria trak 150kg, atah labaih 2m di labik ribaong Tự Chảy, braong Cây Da, puk Tân Phước, xa Tân Thành, huyen Giồng Trôm, tinh Ben Tre. Urak ini, kapul chuc nang jeng oh ka mek hu drei baya bo rahra maong mboh. Ini oh lac mbang akaok meti hu mboh baya di dom kraong ribaong di gah Pei negar. Dahlau nan, rahra hu mboh baya di dom kraong ribaong di tinh Tien Giang, tinh Long An. Hadei nan, karja palei hu pathau khan piah kakei ka rahra.

Pho Thu tuong gam ngak Akok mentri Quoc phong Thai Lan Phumtham Wechayachai khan lac brei pataom gauk ginum biai samar chip ngan haong Hoi dong An ninh negar  di page harei ini 6/6 piah ginum biai ka bruk sraw kadau di labik taphia negar Thai Lan - Campuchia, iew bhap bini brei caik hatai tuk ba dom khaw tin  oh thau cambaic laic ka bruk taphia negar. Rajaei Thai Lan kakei lac  Rajaei saong bol lin hu caga blaoh blai dom jalan khik bruk ngak po bhum taneh, khan lac Thái Lan oh ginum biai nao mai ka bruk ini.  

Mbang tagok yaom brah glaong abih di Japon daok ngak tagok jien pandar saong ngak kateik geik praong tal urang pandar. Bruk ini brei ka rajaei Japon brei jhul khang bruk pablei abih brah yaom lap dalam gilang khik piah brah piah ngak tani tanat darak pasar, gam haong nan brei ngak tui dom panuac pandar ngak dom bruk salih bahrau piah khik kajap an ninh pandap mbang karo kajap. Tui Mentri Ngak nong, ngak Glai saong Kaya dalam ia di Japon, meyah bruk yaom tagok glaong bo oh hu pasang iek, rahaei brei patui veik pablei brah khik piah di negar piah pacang cakak brah blei tame.

Uy ban chau Au (EC) brei tapa Hiep uoc Dai duong chau Au. Ini lac mbang akaok meti taong abih dom sarak pambuak tal  dai duong di EU hu ngak bruk njuak sa hatai haong gauk, pamong tal “ Sa dai duong, Sa bruk ngak suai lavik”.  Dalam tuk dai duong daok dang anak dom kan kandah, kayua langik salih karei, ngak nerak tal bruk taong mek kaya dalam ia, hiep uoc ba tabiak 6 bruk brei ngak dahlau suai lavik. Sa dalam dom bruk hu makna praong di hiep uoc lac pasiam veik parilo ikan hadang kaya ala tasik saong bhum tasik njom nerak./.