

Tui pathau khan samar di Mentri Pato megru, dalam var pakacah mon Ngu van page ini, dalam negar hu labaih 1 trieu 144 ribau anek saih mai pakacah, sumu labaih 99%. Hu 10 anek saih anek angak suan adat njauk pakauk pakacah, dalam nan hu 8 anek saih njuk pakauk pakacah kayua pandar phone, 2 anek saih njauk pakau pakacah kayua oh tantu cambaih laih. Di ban raya Ho Chi Minh, rilo anek saih taong yaom lac, kadha pakacah hu kadha langiu di tapuk bac megru, hu rilo kadha brei ngak tui ta-eng ilamo sahaneng. Di tinh Dak Nong hu 15 anek saih oh mai pakacah; daok di Kon Tum hu 24 anek saih oh mai pakacah di mon pakacah akaok meti. Di tinh Kien Giang, bruk pajeng ba kadha pakacah tabiak 3 labik pakacah di ban Phú Quốc meng gilai peih nduac samar khik kajap karo salamat.
Akok UB bhap bini tinh Gia Lai Rah Lan Chung birau mbaoh harak Danak dak patagok saong paglong asar bruk pato bac di dom sang bac pho thong gam bac gam daok vaktu 2025 - 2030, kuhria abih tih jien buh tame labaih 728 ti dong. Danak dak di tinh Gia Lai pamong tal bruk bac da-a ka anek saih bangsa takik, piah hu manuac urang duh ka bruk cak rok patagok kinh te-xa hoi bhum atah bayah. Anek saih bac THPT bangsa gam bac gam daok patagok meng 845 yau urak ini tagok labaih 1.500 anek saih di thun 2028 - 2029.
HĐ Bhap bini tinh Dong Nai hu brei tapa Sarak ka bruk daong urang jakar cong chuc, vien chuc, urang ngak bruk tinh Binh Phuoc mai ngak bruk di Pasak karja tinh Dong Nai bahrau. Dalam nan, jien daong pah sang yaok bilan ngan haong dom bruk hu ramik daok di ky tuc xa atau sang daok pataom rilo urang lac 1,5 trieu dong/urang. Jien daong ka dom bruk ramik pah sang daok rahra lac 2 trieu/urang saong 3 trieu dong ngan haong bruk oh hu ramik labik daok, brei ta-eng duah labik daok. Daong jien mbang yaok bilan ngan haong yaom jien 2 trieu dong/urang/bilan; daong jien pajeng ba sa mbang hu yaom 3 trieu dong.
Tinh Ben Tre hu ngak salah blaoh bruk ngak brei abih baoh sang oh daok taik tahak tui tacei ba di Rajaei. Tui ong Trần Ngọc Tam, Akok UBND tỉnh Bến Tre, dalam 2 thun 2024 – 2025, tinh ngak salah blaoh 4.049 baoh sang ka urang dalam sarak saong baoh sang kan kandah ka sang daok. Kuhria abih tih jien buh tame ngak lac 217 ti dong, dalam nan hu kadung jien karja labaih 99 ti dong, daok veik jak ba urang rik tame. Langiu di nan, dom kapol urang, gah bol lin saong mikva daong tame hu labaih 18.000 harei ngak bruk.
Dom haei tapa, dalam tinh Hau Giang rah tabiak hajan tathaiy pagam tui angin khang ngak kan kandah tal padai He Thu daok dalam tukvak tathak tal yuak padai saong padai Thu Dong bahrau trun pajaih. Dalan nan hu oh takik hamu padai jaleih 10-30% mblang hamu, gaok mai hamu padai jaleih labaih 50%. Kuhria dalam tukvak anak tal hu hajan tathaiy pagam tui angin khang bhian rah tabiak nan gah chuc nang pachreih urang ngak nong brei pasang iek tantu khau tin langik tasik yaok harei piah hu jalan langyah pala padai siam lagaih.
Thu tuong Thai Lan Paetongtarn Shinawatra harei ini mai rivang tinh Sa Kaeo, sa dalam 7 tinh daok jaik tapen negar Campuchia brei mboh bruk njuak hatai saong pachreih jak ba gah urang jakar jeng yau bol lin daok ngak bruk. Thu tuong Thái Lan meda dang akaok nyaom biai gam chi huy bol lin bhum 1 saong dom jabat chuc nang bhum palei ka bruk khik brei siam mekre labik tapen negar, dom jalan takik brei nao mai birau hu ngak tui, bruk pacang caga kol duis tapa rilo taneh ia jeng yau bruk pablei salih, ngak nong di negar ini.
Ngoai truong Nga Sergei Lavrov harei kabroi hu panuac ndom, Nga brei palih ruak dahlau dom jalan pambuak ndem biai nao mai haong negar langiu piah langyah bruk mesuh metak di Ukraine. Ong Sergei Lavrov ndom meyai lac “Tok hadei tuk hu pandar abih dom jalan ngak pambuak haong negar langiu piah langyah bruk mesuh metak di Ukraine, Nga bahrau brei ngak dom bruk ngak bol lin piah khik kajap an ninh ka negar Nga, pacang khik rahra Nga”. Ngoai truong Sergei Lavrov brei thau, Nga je lac meda mek hu jalan langyah suai atah ka mbang mesuh metak di Ukraine tapa hu ndom biai mboh tangin./.
Angan pandap sac samar drah di Trung Quoc Anker birau khan lac brei mek veik labaih 710.000 ndap sạc piah caga kayua huac bruk jhak rah tabiak. Tui panuac khan nan, dalam tuk pasang iek, Anker duah mboh sa labik pablei ngak salih pandap pin ndien tui hatai drei bo oh brei thau, ba tal ndap caga ndien khut hadei rilo mbang pandar, meng nan ngak pandiak tagok, mbuan ba tal patuh apui khuah./.
Viết bình luận