Thu tuong Rajaei birau iew dom Mentri, jabat, karja palei kham merat daong sang daok ka urang hu daong taneh ia jaman mesruh metak, urang liet si dahlau harei 24/7/2025. Tui nan, jhul khang bruk jak ba gauk daong ngak brei abih baoh sang oh daok taik tahak dalam negar tui jalan “ thei hu hagait daong nan, thei hu prein daong prein; thei hu kaya kan daong kaya kan; thei hu rilo brei rilo, thei hu takik ye daong takik”; yaok baoh sang lac “ sa pandap, sa baoh sang, sa hatai ranam”, brei mboh “ hatai ranam bangsa, ranam bhap bini” jalan diukrai siam gheih di bangsa drei. 

HĐND tinh Lam Dong mbang X brei tapa Sarak daong urang jakar, kong chuc, vien chuc, urang ngak kayua ramik jabat karja pakat tỉnh saong kong chuc dom tinh nao ngak bruk di dom xa. Tui nan, langiu bruk daong sa mbang 10 trieu dong tuk taduan bruk ngak, urang jakar, kong chuc, vien chuc saong urang ngak daok daong 5 trieu dong yaok bilan. Kong chuc pakat tinh nao ngak bruk pakat xã jeng hu daong jien sa mbang 10 bilan. Tui kuhria, taong abih jien peih ngak bruk daong labaih 68 ti 600 trieu dong. 

Dalam 6 bilan akaok thun, gah kong an TPHCM pasang iek, pasiam khaw tin labik daok ka labaih 14,8 trieu urang pagam tinh, ban. Kong an Ban raya pambuak haong Mentri Kong ann pambuak hu siam labaih 4 trieu du lieu taneh riya tame Co so dữ liệu pakat negar ka bhap bini. Meng nan, rilo harak gal hu ngak takik veik, drah samar. Ban raya HCM lac bhum palei dalam negar hu palih ruah ngak iek dahlau du lieu pandar haong gauk ka Pasak du lieu pakat negar.

Ban ndoan, Pasak Daong anek saih, sinh vien ban raya, Sang bac Cao dang Y te Can Tho birau alin brei 100 paok jien bac ka dom anek saih hu raidiuk kan kandah; iek ruak, brei jru oh mek jien ka jaik 200 bhap bini di xã; mai rivang saong alin pandap ka Amaik Viet Nam anh hùng, kuhria abih tih jiak 80 trieu dong. Ini lac bruk hu makna dalam Bruk ngak di Dam dara halan hatian hè 2025 di Ban doan Can Tho pamong tal bhap bini bhum atah bayah;  uranaih kham merat yam tapa raidiuk kan kandah bac da-a naih joi.

Tui dom urang roh duah, bruk pablei pandap tabiak negar langiu hu labaih 2 ti dola My yaok thun, ika pra hu rik tame ba Viet Nam hu jeng taneh ia  pablei kaya ia ralo abih dang dhi ka 3 di dunya. Piah pabak bruk caong khin ka dom kaya ia rilo doanh nghiep ngak tabiak saong pablei ikan pra Viet Nam daok quy hoach veik dom kaya, meng anek pajaih, labik raong tal sang mac ngak tabiak kaya ndap nda saong chuoi logictis piah ngak tabiak dom pandap asar siam.

Tong thong Indonesia Prabowo Subianto birau ndem tagok dom mbang ginum biai haong Tong thong Mỹ Donald Trump pambuak tal jien je pablei tabiak negar langiu. Urak ini jien je trun meng 32% daok 19%, yau nan min ong Subianto khan lac ginum biai  ka jien je di Mỹ ka pandap pablei tabiak di Indonesia saong jia lac jien je pablei salih hu lagaih meda trun daok 0%.

Canh sat Hong Kong (Trung Quoc) khan lac, dalam 5 bilan tapa, dom mbang pachot pagat tapa online tagok labaih 92%. Dom urang pachot pagat  bhian jua palua urang tame nyaom chat yau WhatsApp saong Telegram, sanya bayar jien ka dom bruk mbuan mbiah yau duah pandap nda, kot cih panuac  taong yaom tagok min hadei di nan iew urang payua jien kayua ngak suan bruk ba tabiak. Canh sat Hong Kong kakei bhap bini juai duah bruk  ngak tapa mang oh thau cambaic laic saong juai payua jien dahlau, caik hatai ka bruk eiw da-a “ngak bruk hanjol min jien bilan glong”.

Yaok pluh urang bhik pakat glong di Thái Lan njauk pasang iek duah thau kayua hu ndik daok saong payua jien ka urang kumei umo 35 thun. Bruk nan daok ngak haduh hatai manuac sia Thai Lan. Urang jakar Thai Lan pasang iek bruk nan “urang siam binai hatai kanjiak” mek angan Golf tuk rilo urang bhik pakat glong hu ndik daok saong bruk ndok jien. Labaih 80.000 blah thaok binguk oh lagaih hu duah mboh, ngak ka manuac sia duh hatai./.