Tui tukvak ba tabiak thun bac 2025-2026, Mentri Pato megru brei panuac lac gilac veik mai bac dahlau aval sa adit dut saong harei tame thun bac birau. Ta-eng tal bac 1, tal bac 9, tal bac 12 tame dahlau 2 adit dut saong harei tame thun bac birau. Peih akok thun bac birau 2025 -2026 di harei 5 bilan 9. Bruk ramik pasiam nan daong tal bac 1, tal bac 9, tal bac 12 kuhria caga pakacah tagok pakat bac atau pakacah tamat hu tukvak piah bac kanal saong ngak randap bruk bac da-a dahlau tuk tame thun bac birau. Njauk caik hatai, pakacah tamat THPT thun 2026 kuhria rah tabiak dalam 2 harei lac harei 11, 12 bilan 6.

Page harei ini 12/8, di TPHCM peih Nyaom biai khan brei thau bruk padang Dang bo Mat tran Negar Viet Nam TPHCM. Tui nan, Dang bo MTTQ Ban raya taduan 35 kapol dang ngan haong 2.021 urang đảng. Ong Nguyễn Phước Lộc, Pho Bi thu Thành ủy, Akok Ủy ban MTTQ Việt Nam TP.HCM tacei ba dom ndang bo, chi bo samar padang ngak saong ba tabiak dom sarak, bruk ngak, jalan ngak bruk di pakat uy, kapol ndang, pambuak haong bruk tacei ba di ndang gam haong bruk ngak chinh tri di labik drei ngak bruk. Dalam tuk peih ngak brei ngak njauk tui 6 bruk tacei ba gah ndang saong 5 kadha peih ngak,  bruk ngak di Ndang.

Akok UBND tinh Ca Mau birau tacei ba dom so, dom gah pambuak tal saong UBND dom xã, phuong hu gilai taong chap ikan brei pakhang bruk pasang iek bruk taong chap ikan suan hukum, oh khan brei thau saong oh tui kadha (IUU), iek nan yau bruk praong, njauk ngak samar. Dalam tuk pasang iek, bhian kakei saong langyah bruk ngak ngan haong dom urang, dom gah ngak oh blaoh bruk, thaik bruk ka urang karei, plaik njaik atau suai langyah dom bruk ngak suan hukum IUU. Urang pan akaok so, dom gah, bhum palei brei taduan bruk meyah ngak oh blaoh bruk jao brei.

UBND tỉnh Dak Lak iew dom jabat, karja bhum palei pakhang bruk pathau khan ka sarak, hukum ka bruk pablei salih tapen negar, dom bruk daong jien je saong harak gal pablei tapa negar Campuchia. Tapa nan, ba mbuan lagaih ka doanh nghiep, HTX, dom baoh sang pablei salih hu tame danak dak pambuak bruk ngak mbang pablei salih, nyaom darak pasar, parang iek di dom labik pambang negar saong gah  Campuchia; patui bruk peih nyaom darak pasar taphia negar di dom pambang negar dunya; daong jien, daong ngak harak gal ka po pablei salih peih praong darak pasar pablei ndap nda tapa negar Campuchia.

Jabat chuc nang tinh Dong Thap ramik pasiam anak meta dom labik glut jaleih taneh di bhum taneh ar pacang glut jaleih di xã Thường Phước. Dahlau di nan, biar harei 7 bilan 8, ar tapen kraong Tiền atah labaih 40 met jaleih veik, atah labik dahlau 40 met. Bruk khut tayak abih ar pacang, tabung taluy; glut jaleih jalan ar atah 28 met, praong 5m; tahak pabah trun dalam jalan menyek, jalan talah 2 cm, mbuan glut jaleih veik. Suai lavik, Vien Khoa hoc ribaong kraong  gah Meraong negar brei jhul pasamar bruk pasang iek, taong yaom ka bruk ba tabiak jalan ngak pasiam bruk glut jaleih,  pacang jaleih ar kraong Tien di labik ini.

Han Quoc brei thau bruk pabak 15.000 baoh sang daok ka bhap bini kayua rajaei padang ngak di labik ban ine Seoul. Baoh sang kayua rajaei buh jien tame padang ngak hu yaom gap mbiah, ralo lagaih ka dom urang ranaih umo, dom baoh sang jien mek tame takik saong dom diuk pasang birau lakhah. Bruk ngak nan piah ba mbuan lagaih ka dom urang ranaih umo, urang jien mek tame takik meda tani tanat labik daok di ban ine.

Tong thong My Donald Trump mbaoh harak brei thau samar chip ka kol duis di Washington D.C, gam haong nan khan brei thau bruk ba 800 urang lin Ve binh Negar mai ban ine saong gah urang bol lin ban raya ini hu lien bang khik iek. Tong thong Trump lac bhap bini rahra, tuai damuai sirah ma-in saong urang lien bang njauk brei hu salamat saong siam mekre, oh huac bruk taong paoh.

Labaih 1.000 urang di Tay Bac Tây Ban Nha brei panduan ba nao labik karei chip dalam harei 10 bilan 8, tuk apui khuah glai mbang tabiak ralo labik kayua panjiak catang saong hangin khang. Gah bol lin sami samar ba jiak 60 urang lin saong 20 radaih mai gam haong yaok rituh lin padam apui, kapal haok saong radaih li-ua taneh piah peih jalan pacang apui. Urang jakar kuhria mboh dahlau langik panjiak daok dui atah veik tal harei 14 bilan 8, gam kakei ka bruk apui khuah glai daok tabung glong meda rah tabiak grauk labik dalam negar./.