Jit ruak Chikungunya daok tamuh khang di rilo taneh ia chau A saong hu mboh di Trung Quoc, Singapore. Viet Nam oh ka mboh urang ruak min jamoh pambak ruak mboh hu rilo labik, mbuan ba tal ruak njom mbak samar. Yau nan ye, Mentri Y te tacei ba pasang iek jit ruak dunya di dom pambang negar, mblang kapal haok, tapen tasik, pakhang bruk dut iek ruak, piah hu thau samar pacang cakak urang njom ruak atau hu ruak dalam rup. Dom bhum palei brei iek jamoh, peih bruk pametai jamoh, pametai anek raoh di labik pambang negar, labik taphia negar saong bhap bini; kuhria caga manuac, jru cavao, mac moc ndap nda piah ngak hacih tuk rah tabiak jit ruak. Njauk ndem tal lac dom urang mai meng jit ruak, njauk brei tui iek prein yawa dalam rup eng.

Meng harei 5 bilan 8, urang plaik njiak dut iek prein yawa nao ngak bol lin njauk taong phạt jien 50 -75 trieu dong, glong dua mbang dahlau diah. Ini lac sa dalam dom kadha hu ramik pasiam Sarak Nghi dinh 218 ndem ka bruk taong phạt ngak suan hukum gah quoc phong, cơ yếu. Kadha birau jeng hu ndem tal bhap bini ngak bleik lau, ngak karei bruk dut iek prein yawa di drei piah plaik njiak nao bol lin, hu taong phat glong ka dua lac meng 30-40 trieu dong. Tanut ini glong dua mbang dut saong bruk ba tabiak dahlau di nan.

Di Nyaom roya Ndang bo Dac khu Con Dao mbang ka I, vaktu 2025 -2030 rah tabiak birau ini, Pho Bi thu Thanh uy, Akok UBND TP.HCM Nguyễn Văn Được caong khin tukvak anak tal Con Dao njauk brei thau cambaic laic “ilamo karei” ngak brei cakrok patagok khang kajap, pamong tal bruk hu jeng “ kaoh pulao, thong minh saong njauk diukrai”, labik patagok salih birau hu samu gam khik ramik drap ar. Con Dao pataom tame piah patagok samar pamong tal cakrok haijao, ngak Con Dao jeng labik sirah ma-in sinh thai - padeih padei anit ranam haong alam moi truong; khik kajap quoc phong, an ninh saong pakhang bruk padang  Ndang, dom pakat chinh tri.

Ca Mau lac tinh hu klau gah pagam haong tathik, dang anak rilo bala meng langik tasik. Yau nan ye, tỉnh ba tabiak Jalan pacang caga glut jaleih taneh kuhria tui bala meng langik tasik, dalam nan hu dua bruk pacang caga hu ba tabiak nan lac: Glut jaleih taneh bhum ia taba kayua pandiak bhang trak saong tua riya, glut jaleih taneh tapen kraong, tapen tasik, ar tasik kayua hajan praong, ia nduac khang saong riyak praong. Dalam nan, brei mboh bruk ngak di karja palei, dom jabat chuyen mon saong yaok baoh sang brei kuhria khik caga dahlau ka manuac urang, drap ar saong tani tanat bruk ngak mbang pala drak.

Urak ini, dalam tinh Vĩnh Long hu 85 labik, jalan glut jaleih atah 44km, ngak kan kandah tal 119 baoh sang bhap bini. Sa dalam dom labik glut jaleih trak lac pabah kraong Trà Cú, xã Lưu Nghiệp Anh, kuhria atah labaih 172 met, kuhria tui labaih 12 ti dong. Urak ini, dom jabat chuc nang pakhang tui iek bruk labik tasik rah tabiak, khan brei bhap bini thau piah pacang caga; pasang iek ar pacang, labik mbuan glut jaleih.

Gah Luong thuc saong Ngak nong LHQ khan lac yaom ndap nda kaya mbang di dunya dalam bilan 7 tagok glong abih dalam dua thun tapa, kayua yaom rilaow saong menyek mbang tagok glong. Urak ini, taka so kaya mbang kuhria tui tanut chuan di dunya ka yaom kaya mbang, mek hu 130 tanut diem dalam bilan 7. Tong thu ky LHQ kakei lac urak ini hu 1 dalam 3 bhap bini di dunya oh hu ginup jien piah blei kaya mbang hacih sa-at.

Kuhria meng kok thun mbiah tal ini, ruak pandiak tabiak darah ngak metai labaih 100 urang saong njom mbak ruak tal labaih 24 ribau rahra bhap bini  Bangladesh. Urang jakar gah Y te negar ini daok iew bhap bini pruh jru jamoh, ndih dalam kamo màn saong ngak hacih ia kandong. Gam haong nan, brei taong ruak samar ka urang ruak. Di Bangladesh, thun 2023 hu urang metai ralo kayua ruak pandiak tabiak darah rilo abih labaih 1.700 urang metai saong labaih 321.000 urang ruak.

Ia ribuk meng akaok bilan 7 meng blaoh di bang Texas (Mỹ) tagok glong ba theik taneh gluk, patau saong taneh pataom pambuk meng yaok rituh thun, mblo tabiak 15 inem takai khung long klau kakau biak praong di labik  Sandy Creek. Tui urang Khik iek Gilang khik piah Sajarah Baoh taneh Jackson di Dai hoc Texas di Austin: “ Ini lac inem takai janih khung long mbang rilo nao meng dua gah takai, atah labaih meng 10 tal 11 met. Yaok inem takai praong meng 45 tal 50 cm, hu meng 110 tal 115 trieu thun”./.