Mentri Pato megru brei thau tanut diem dom mon pakacah tamat THPT thun 2025.           Mon Toan saong sap Anh lac kadha pakacah kan mek hu ndiem glong, parabha tui ilamo glong biar cambaic laic, min tapa pakacah mon Toan hu 513 anek saih hu diem 10, sap Anh hu 141 anek saih mek diem 10. Tui rilo gru pato taong yaom tanut diem njauk haong bruk pato megru; kadha pakacah hu salih birau, anek saih bac samar. Gam haong nan hu daong ka gah pato megru mong veik bru pato saong bac Danak dak pato megru 2018, meng nan hu jalan ramik pasiam bruk pato saong bac di sang bac pho thong dalam tukvak anak tal.

Luac dua adit tapa, di Pasak ngak bruk karja xã Long Hải, TP.HCM yaok sa rahra yam tame mai lac hu sa urang daong tacei pato ngak harak gal. Ngan haong urang praong thun, dom urang halan hatian ngak harak gal tapak ka rahra, atau ngak meng phone tangin tame VNeID pakat 2. Ong Ngô Thanh Phúc, Akok UB bhap bini xa Long Hải khan lac, meng harei 1 bilan 7, xa ngak hu 16 kadha ba tabiak di sa pasak ngak bruk karja.

Tinh Ca Mau urak ini hu 14 danak dak ndien hangin hu ba tabiak pablei mek jien tame. Dalam thun ini meda hu 2 danak dak kuhria abih tih prein khang 176 MW ba tame ngak bruk. Tui taong yaom di So Kong thuong Ca Mau, bruk lagaih ngak tabiak dien hangin  di tinh meda patagok tal 16.200 MW. Tinh Ca Mau  hu Thu tuong Rajaei mboh harak Quy hoach saong ramik pasiam Quy hoach dien VIII, mbiah tal thun 2030 ba tame ngak veik 34 danak dak dien hangin.

Birau ini, urang ngak nong tinh Dong Thap brei caik hatai  tal bruk pala la-u tui jalan sa janih atau pablak, nan ye taneh pala li-u oh padeih tagok, tuk yaom li-u tagok glong. Urak ini, tinh Dong Thap hu jaik 25.000 ha la-u, ralo lac di tinh Tiền Giang (klak). Dalam tuk nan, rilo baoh kayau yau pa-ok, panat, thanh long, durian, kruac aih, uoic…laik yaom biar. Jabat chuyen mon kakei urang ngak nong njauk caik hatai jak gauk pala rilo, abih di nyu lac di dom bhum taneh oh lagaih haong li-u.

Di tinh Ca Mau birau rah tabiak bala blung ia ba tal dua anek saih  metai. Dahlau di nan, biar harei 15 bilan 7, kamuan H umo 13 thun saong kamuan P umo 16 thun, daok xã Trần Văn Thời nao caoih mbanh haong dom ayut dalam palei, hadei di nan dua adei ini jak gauk menei ia hlung. Dalam tuk menei, mboh P ia blung, H caluai ia ba ayut tagok min kayua hlung ia dalam ngak H karam trun. Karja palei hu mai rivang, klak rabh dom pandik pandua saong daong jien piah baoh sang ngak ndam padhi ka dua kamuan.

Canh sat Indonesia daong ka 6 kuman birau ndih tapui meng kapol nyaom pablei pagat manuac, dalam nan hu 5 kuman si ba nao tapa Singapore. Tui canh sat  tinh Tay Java,  kapol nyaom nan ngak hu abih tih 24 mbang pablei kuman birau ndih tapui kuhria meng thun 2023, dalam nan hu tal 15 kamuan ba tapa Singapore. Urak ini, jabat chuc nang daok ngak brei cambaic laic saong bruk ngak di kol nyu.

Takik abih 21 urang metai saong rilo urang karei njauk rambuac kayua jakala klak di dom bang gah Timur negar An Do, dalam 48 mon tapa. Ralo urang njauk jakala klak  tuk daok ngak bruk di mblang hamu. Bhap bini di dom bang gah Pei negar hu eiw brei daok di sang dalam tuk langik tammblat drum nyi saong pacang caga  tuk tabiak gah langiu, abih di nyu lac di dom labik klak saoh. Cuc Kuhria iek langik tasik An Do ba tabiak panuac kakei dahlau hu hajan praong sang jakala klak tal harei 17 bilan 7.

Di Mỹ, dom uranaih sit gaok kan kandah ka prein yawa hadei tuk gaok dom ndap nda hu nicotin yau kadung pakao hala pabum oh hu sauk, thak saong menyek akao hala dien tu daok tagok rilo di dom thun jaik ini. Meng thun 2010 tal thun 2023, dom pasak  pacang jru mek di Mỹ hu  jaik 135 ribau mbang njauk jru mek nicotin di uranaih umo 16 thun. Njauk caik hatai lac, ralo lac rah tabiak di sang. Tui roh duah, nicotin lac jru biak mek trak, meda ngak metai  uranaih meyah pandar rilo./.