TPHCM ngak salah blaoh bruk bayar jien, panduan ba jaik 3.000 dalam kuhria abih tih 6.500 baoh sang daok angaok saong tapen dom kraong ribaong. Min urak ini daok labaih 39.600 baoh sang daok angaok saong tapen kraong, ribaong oh ka langyah hu, parabha di 398 danak dak, jalan kraong, ribaong. TPHCM daok padang ngak Danak dak Ramik pasiam do thi saong labik sang daok angaok saong tapen kraong ribaong, vaktu 2025-2030. Bruk panduan ba nao labik karei saong padaok labik daok birau ka taong abih bhap bini daok angaok saong tapen kraong, ribaong jaik 40.000 baoh sang.

Piah ba mbuan lagaih ka labik daok ka urang jakar, kong chuc, vien chuc, tinh Vinh Long hu sarak daong jien ka urang jakar, urang ngak mai meng tinh Trà Vinh, Ben Tre (klak) mai Vinh Long ngak bruk hadei pagam tinh. Langiu  brei daok sang karja saong dom labik ky tuc xa ka urang jakar, kong chuc, urang ngak. Urak ini, tinh meda ramik labik tame daok chip ka 114 urang. Dom urang jakar ngak bruk blaoh mai veik dalam harei ye brei hu dom sruh radaih taduan raok pajeng ba meng Tra Vinh saong Ben Tre  (klak) mai Vĩnh Long ngak bruk.

UBND tinh Ca Mau birau ba tabiak bruk ngak brei cakrok patagok kinh te di urang piah jhul pakhang bhum taneh cakrok patagok. Bruk ba tabiak nan lac, bruk cakrok patagok kinh te langiu karja meda glong jang abih gah ngak mbang. Pamong tal thun 2030, tinh Ca Mau meda hu labaih 8.400 doanh nghiep ngak bruk, kuhria mboh hu 7 doanh nghiep angaok sa ribau bhap bini. Tỉnh ini pamong tal bruk padang dom doanh nghiep praong meda hu mbaok tame chuoi kaya dunya. Urak ini, Ca Mau hu labaih 7.000 doanh nghiep.

Anak bruk rah tabiak kan kandah jit ruak di taphon athur, UBND tinh Gia Lai brei padang 4 balai pasang iek jit ruak athur pambuak dom gah dalam tinh. Balai pasang iek tani tanat khang kajap bruk pajeng ba athur saong rilo athur tame tabiak tinh. Dom bruk ngak suan njauk langyah catang tui hukum ba tabiak. Langiu di nan, bruk pruh jru pametai anek ruak ka dom radaih pajeng ba tapa balai khik iek. Ini lac bruk kham merat ngak samu dom bruk raong glang saong prein yawa di bhap bini. 

Bol lin bien phong tinh Tay Ninh, ngak salah taong abih bruk taduan 45 bhap bini Viet Nam kayua gah Campuchia bayar mai. Dom urang ini hu ba tapa Campuchia tapa dom blah web duah bruk ngak hu yaih khan lac jien bilan glong. Tuk tal labik, dom urang ini ba tame ngak bruk ka dom kapol pachot pagat tapa mạng, yaok harei tagok mạng xa hoi duah urang piah pagat. Meyah oh ngak tui atau ngak oh ginup bruk kol nan ba tabiak ye taong paoh, ngak pap pandik rup pabhap jeng yau jalan sahaneng.

Ha vien Thai Lan brei tapa Hukum Khik iek urang ngak, dalam nan hu kadha tukvak padeih ndih tapui ka urang kumei dui atah tal 120 harei saong pasang di urang nan jeng brei padeih ngak min hu bayar jien bilan 15 harei piah daong raong anek. Bruk ini piah pachreih ndih tapui anek, paglong raidiuk di urang ngak saong pambuak kajap haong baoh sang. Langiu di nan, hukum daok brei adat ka urang kumei padeih ndih tapui anek hu iek glang anek bik tuk ruak kik, dom bruk oh bhian atau jaoh jo.

Urang jakar An Do duah mboh sa urang kumei Nga saong dua urang anek daok ta-eng dalam la-on meng rilo thun tapa, oh hu harak gal hagait. Dalam la-on, urang kumei piah caga kaya mbang thu saong ngui cuh khan ao di bilan hajan. Visa abih tukvak pandar meng harei 17/4/2017. Dua urang anek kumei di Kutina, lac umo 6 thun saong umo 4 thun, ndih tapui dalam tuk anai ini daok dauk. Canh sat ngak harak gal ba urang nan mai Nga veik.

Harei kabroi, Roya caluai ia kraong Dương Tử mbang ka 50 peih ngak di ban Vũ Hán, tỉnh Hồ Bắc, Trung Quoc. Bruk nan pachreih hu labaih 2.000 urang, umo meng 14 tal 75 thun hu mbaok tame. Piah tapa kraong ia atah nan, jaik abih dom urang nan njauk lac urang joi caluai ia, hu tukvak pasram meng lavik thun ini mai. Harei roya  caluai ia kraong Dương Tử hu peih ngak mbang camereip di thun 1956, hu jeng sa dalam dom bruk caluai ia langiu langik praong abih di Trung Quoc./.