Page ini, di Jabat ngak bruk di Rajaei, Thu tuong Pham Minh Chinh peih nyaom biai kuhria iek veik Taong abih Danak dak  pakacah gauk “ ngak brei abih baoh sang oh daok taik tahak” thun 2025. Mbiah tal ini, dalam negar ngak hu abih labaih 334 ribau baoh sang oh daok taik tahak; jaik 50 ribau ti dong hu peih ngak dalam Danak dak, dalam nan jien jak ba hu 24 ribau ti dong. Thu tuong brei thau hatai bui sambai tuk mboh Viet Nam camareip ngak hu salah blaoh bruk abih sang oh daok taik tahak di grauk labik dalam negar, blaoh dahlau 5 thun 4 bilan dut haong bruk kuhria dahlau di Karja pakat negar. Tui nan, brei mboh bruk ngak hu Jak jeng siam mekre di Viet Nam dalam bruk patrun kathaot khang kajap.

Melam kabroi, di Sang pakacah Padhih the thao tinh Dak Lak peih bruk pakacah yai Kalup kapol Lân Sư Rồng pakat negar thun 2025. Yai pataom hu jaik 300 urang pakacah di 13 kalup kapol tamia lan su rong dalam negar. Dom kapol pakacah tui dom kadha  yau: tamia lân meng kan, tamia inegirai meng kan, tamia inegirai samar, tamia lân samar, tamia inegirai palih ruah tui hatai saong tamia inegirai hadah tanyak. Yai pakacah rik tame khik ramik, patagok ilamo biak siam gheih senni nghe thuat lan su rong meng kan lavik, pambak praong bruk jum pataom, hadah mbaok meta saong ilamo siam gheih.

Akaok UB Bhap bini tinh Dong Thap birau mbaoh Harak Quyet dinh 521 ka bruk khan brei samar thau bruk glut jaleih ar kraong Tien di labik ar pacang xa Thường Phước hu 4 labik glut jaleih atah abih tih 350 met. Bruk glut jaleih rah tabiak sraw kadau ba tal mbuan khut tayak danak dak pacang bala meng langik tasik saong bruk nao mai di bhap bini. Tinh Dong Thap hu peih ngak dom danak dak samar piah pacang caga jeng yau pasiam veik piah takik khat lahik kayua glut jaleih taneh.

Kapol urang kumei palei Phụng Hiệp, xã An Ninh, ban Cần Thơ hu jalan ngak siam gheih brei ramik pataom hareik, parabha hareik katak nhựa piah pablei patak pataom jien.  Bruk nan iew lac “ Mek hareik ngak tabiak jien”. Hadei labaih 2 thun peih nagk bruk nan, 28 adei sa-ai urang kumei Khmer dalam puk kham merat pataom hareik ngak jeng ndap nda di sang, ba pataom sa labik di Kapol. Taong abih jien duah hu, yaok adei sa-ai buh tame pabui haluk di drei, gam rik tame kadung jien blei pandap alin ka dom urang dalam Kapol tuk Tet, daong phun jien ka dom adei sa-ai, raidiuk kan kandah di Kapol.

Hajan praong njauk tuk page ini pak TPHCM ba tal rilo jalan mbak biak katil manuac urang, urang praong saong uranaih biak glaih glar tuk nao ngak bruk, nao bac. Di rilo labik di dom phuong Bình Thạnh, Bình Quới, Thạnh Mỹ Tây, Sài Gòn, Bến Thành, An Khánh… di TP.HCM, hajan praong ngak ka dom jalan bhian ralo manuac tuk page kan nao truh. Hangin  khang urang nao tapa dom jalan praong atau dom tatua praong mblieng mblang, hu urang jaik labuh trun jalan.

Brei panuac di var mittinh “Malaysia pachreih daong dải Gaza” di Mblang bein doc lap harei kabroi, Thu tuong Malaysia Datuk Seri Anwar Ibrahim khan brei thau, paok jien daong ini brei mboh hatai pachreih tui saong jum pataom di bhap bini Malaysia ngan haong Palestine, abih di nyu lac bhap bini Palestine daok diukrai di dải Gaza. Rajaei Malaysia daok pambuak haong dom taneh ia saong kapol dunya piah peih brei dom radaih pui  pajeng ndap nda daong ka dải Gaza di dom harei anak tal.

Langik panjiak catang saong dom mbang hajan khang daok khut tayak trak ka urang saong drap ar ka bhap bini di dom bhum palei di Nhat Ban. Tui Jabat khi tuong Nhat Ban, panjiak di dom bhum gah Pur, gah Pei, gah Easar taneh ia ini oh mboh ladam trun, bo daok tagok jaik 400C lac panjiak jhak tal prein yawa anek manuac. Dom jabat pambuak tal di Nhat Ban daok tui iek saong kakei dahlau ka langik panjiak catang.

Urang jakar An Do birau khan lac takik abih 11 urang metai saong 2 urang karei lahik hadei tuk langik hajan praong tuh trun bang Rajasthan, gah Pei negar ini. Dom mbang hajan praong luac 5 harei ngak ribuk sua, ia dauk saong dauk rilo jalan, yaok pluh palei cakak oh tame tabiak hu. Jalan mbak nao mai gal tavak biak kan nao mai. Karja bhum palei  kham merat tui ngak bruk pabak ndap nda kaya mbang ka yaok ribau bhap bini gaok kan kandah./.