Pagam 3 tinh Lam Dong, Binh Thuan saong Dak Nong, Kapol urang Quoc hoi tinh Lam Dong urak hu 19 urang lambaok vakil. Patagok bruk jum pataom, salih birau, kuhria dahlau, bruk ngak, dalam Vaktu 2021-2026, Kapol urang Quoc hoi tinh Lam Dong peih jaik 500 nyaom biai pataom mbaok cu tri hu jaik 44 ribau mbang cu tri hu mbaok tame; rik tame labaih 160 mbang danak dak hukum; taduan saong langyah yaok ribau harak thu di bhap bini; jak ba labaih 14 ti dong daong ka urang dalam sarak karja, baoh sang ngak bruk cach mang, anek saih kan kathaot  yam tapa kan kandah; ba tabiak rilo asar kadha po tagok mentri, pakat negar brei hu jalan ngak bruk, peih jalan patagok ka Lam Dong samar patagok saong khang kajap.

Kapol dam dara tinh Dong Thap peih bruk “ Caong khin hijao – ia kraong hacih”, ngak hacih 82 km ia kraong, ramik hacih ia nduac khang ka 102 labik kraong njom nerak, kuhria abih labaih 300 trieu dong. Tui nan, peih bruk “ Daong adei ngak sang jaman hacih sa-at”, hu pasiam, sơn cih thaot mekre, puh ramik hacih, pala phun kayau hijao, padang dom talaoh ar khar jak ba, tacei pato khik brei hacih sa-at, ngak abih mbau jhak di 102 sang bac.  

Harei roya jalan pho “Siam gheih di tasik” di tinh Gia Lai peih tabiak di biar harei 31/8 anak tal, hu mbaok di Kumei siam binai Lambaok gah Yulit Viet Nam 2024 Đinh Thị Hoa, gam haong dom nghe si, nghe nhan, urang ngak xiếc radaih juah, nao gai kheo parang iek di jalan tapen tathik atah jaik 5km. Melam 1 bilan 9, di Mblang bein Nguyễn Tất Thành peih ngak Harei Roya gom hadah saong parang iek drone nghe thuat, brei mboh veik dalikan tathik hijao saong ceik glai Gia Lai, gam ba lagu ragam birau tame hu mbaok dom nghe si ranaih umo.

Pahadar 80 thun padang Rayo sap ndem Viet Nam, harei kabroi, Jabat ngak bruk di Ban raya HCM ( VOVTPHCM) peih var taom mbaok dom urang jakar padeih huu dom rai dahlau. Di var taom mbaok, ong Nguyễn Ngọc Năm, Yam ndoc VOV TP.HCM bac kadha pahadar veik 80 thun jak jeng hadah hadai di Rayo sap ndem Viet Nam saong payua panuac thau dhar phol tal dom urang jakar padeih huu dom rai dahlau. Dom urang jakar padeih hưu khan brei thau bruk druat druai saong bui sambai anak dom bruk ngak hu jak jeng di Rayo sap ndem Viet Nam. Rilo urang hadar veik dom bruk ngak di rayo papar sap meng dahlau kurang ralo janih, min ngak bruk abih hatai ka bruk ngak. Nan lac pahadar dom mbang tame tavak sap gah langiu “ cang cim padeih kanyik”, hadar dom bruk metai lahik di ayut ngak bruk haong gauk, atau kurang anak kurang likuk, rambah rambeip samar dahlau…min daok pambuak, khik miat hatai ranam Rayo sap ndem Viet Nam dalam nan hu Rayo sap ndem Viet Nam jabat ngak bruk di TPHCM.

Peih bruk dac xa thun 2025 di bungun pahadar 80 thun Harei negar -harei 2/9, di dom Sang guk di Kong an tinh Dak Lak hu 59 urang hu peih tabiak tui sarak di Dang saong Karja, tabiak dahlau tuk daok guk. Đại tá Trần Bình Hưng, Phó Giám đốc Công an tỉnh Đắk Lắk khan lac, sarak dac xa di Dang, Karja brei mboh bruk anit ranam ka urang thau ramik pasiam veik jalan diukrai siam mekre piah hu gilac veik mai sang di drei. Kong an tinh daok brei veik CCCD, alin sim phone piah daong ka urang tame bhap bini. 

Rajaei Campuchia birau khan brei thau dom jalan samar drah  saong sumu gauk piah khik karo yaom padai brah ka urang ngak hamu tuk bilan yuak thun ini. Njauk ndem tal, Rajaei pambuak haong gilang Ngak nong saong Patagok palei pala Campuchia hu tame danak dak khik yaom kaom. Campuchia daok tame bilan yuak padai avar dalam thun, hu labaih 40.000 tấn padai yuak yaok harei. Tui kuhria thun ini, Campuchia labaih 6 trieu tan padai hu pataom mai piah pablei.

Phu Tong thong Philippines khan brei padeih dom tal bac di taong abih pakat, dalam karja saong langiu karja kayua hajan praong saong ia ribuk sua. Dom jabat brei pabak dom giup kaya mbang saong jru tavao iek ruak, caga dahlau piah tuk hu bala rah tabiak. Jabat kuhria iek langik Philippines khan lac langik La Nina meda rah tabiak meng bilan 9 tal bilan 12 thun ini, yau lac bruk langik oh lagaih hajan rilo jang dom thun dahlau.

Labaih 100 labik tapen tasik di Peru kareik pambang hadei rilo mbang riyak glong khang oh yau bhian. Jabat kuhria iek Langik tathik pakat negar Peru khan lac kayua hajan hangin ralo di meraong Thái Bình Dương rah tabiak. Bol lin tathik Peru hu thau lac 1 urang ky thuat metai tuk ngak bruk khik gilai di tathik. Karja iew bhap bini samar plaik atah di tathik saong juai tabiak tathik taong chap kaya ikan.