Melam kabroi, di Mblang bein Ba Đình, Ha Noi peih bruk pataom pasram dieu binh, dieu hanh mbag ka dua Pahadar 80 thun Cach mang bilan Dalipan jayak saong Harei bangsa negar CHXHCN Viet Nam (daok lac A80). Bol lin pataom pasram bruk praong hu tal 4 kapol nyaom urang jakar ngak praong, 43 kapol nyaom bol lin bhap bini, dom dom vi bol lin negar langiu saong 13 kapol nyaom lambaok bhap bini naih gheih. Hadei dieu hanh di kapol nyaom urang jakar ngak praong kac dieu binh dom kapol nyaom nao tabak, dom radaih, phao bol lin; radaih dac chungh Kong an;  dieu hanh nyaom bhap bini rahra saong puac abih lac daoh tamia kayua yaok ribau nghe si, urang daoh tamia, bhap bini parang iek.

Tui harak pathau khan di Mban tacei ba pacang caga bala meng langik tasik saong duah daong urang di Bol lin Bien phong, kuhria tal 6h30 harei ini daok 276 gilai kapal hu labaih 1.900 urang ngak bruk di Bhum Tasik Bien Dong saong dac khu Hoang Sa. Mentri Ngak nong saong moi truong caong khin Ub bhap bini dom tinh, ban Da Nang, Quang Ngai samar  jak ba bol lin, radaih mai iew da-a, tacei pato atau kateik gheih ba dom gilai pataok tame ar, saong taduan taong abih bruk anak Thu tuong Rajaei  ka bruk khik ka gilai hu salamat.

Di xa Hòn Đất, tinh An Giang, peih ngak danak dak “ Tet Bol lin – bhap bini” thun 2026 uan raok Chol Chnam Thmay, Mentri Chi huy Quan su tinh An Giang pambuak Hoi Chu thap do tinh An Giang birau peih bruk iek ruak, brei jru oh mek jien, alin pandap ka mikva, kuhria tui jien labaih 700 trieu dong. Di labik ini, mban peih bruk tacei pato saong brei 400 paok jru oh abih jien ka bhap bini, laian 400 paok pandap, 400 paok lisei huak saong 500 pamndap halang ia ka sang urang kathaot, jiak kathaot saong anek saih di xa Hon Dat. 

Mbang livestream yaih khan saong pablei durian angan Ami Kâo  lac  “Durian si amaik” di xã Ea Knuêc, tỉnh Đắk Lắk hu mbaok tame di Bi thu Ndang uy xa Ngô Thị Minh Trinh daong mikva urang pala mek hu jak jeng siam mekre, pambak praong bruk salih  bahrau jalan ngak meg bhum palei. Bruk livestream hu jak jeng  oh lac mai meng yaok ribau mbang tui iek, pablei salih tapa online, bo daok mek jien hu 3,8 ti dong meng dom doanh nghiep daong ka xa Ea Knuêc dak padang saong patagok bruk pala durian karo kajap.

Mikva xa Trần Văn Thời, tỉnh Cà Mau biak uan tabuan bui sambai tuk tatua Kênh Cơi Ba hu ngak blaoh. Ini lac danak dak hu  makna kayua Harak mbao Thanh nien gam dom urang rik jien ngak pahala daong hu 830 trieu dong, salih ka tatua klak ngak meng 20 dahlau, jaoh khut tayak, mbuan rah tabiak bala ka bhap bini tuk nao mai, atau pajeng ndap nda. Mbang ini, Haral bao Thanh nien daok alin brei 30 paok jien bac Nguyễn Thái Bình, yaok paok hu 5 trieu dong ka dom anek saih sang kathaot tame thun bac birau.

Ban Hàng Châu, tỉnh Chiết Giang, Trung Quốc lac labik hu ralo kapol kong nghe praong meng dahlau mai  jaik peih bruk pato pakat pho thong bac trí tuệ nhân tạo (AI) di taong abih dom sang bac tieu hoc saong trung hoc meng thun anak tal. Ini lac bruk ngak praong suai lavik piah anak tal  hu urang ngak bruk ka samar pandar taka so. Bruk ba AI tame pato pakat pho thong caong khin daong ka Hàng Châu patui brei mboh labik dang di pasak salih birau, tui nan rik tame pato pakai ka urang hu ilamo glong gah kong nghe birau ini.

Quoc hoi Han Quoc birau ba tabiak dom asar kadha kong doan bahrau, peih praong bruk khik iek kein laba ka urang ngak hu hu mbaoh harak gar. Hukum ini pacang bruk urang pandar manuac ngak ndok bayar jien veik kayua padeih bruk piah ndok kein laba, bruk nan hu rilo urang lac dom po ngak mbang pablei salih pambak tame nan piah pacang cakak urang padeih bruk.  Do gah doanh nghiep mboh lac haduh hatai ka jalan ngak nan meda ngak jhak tal bruk urang buh jien tame ngak mbang di Han Quoc.

Tay Ban Nha birau gaok langik pandiak dui atah saong kan kandah abih meng lavik mai kuhria meng tuk taneh ia ini yaok kuhria dom mbang langik kan kandah. Panyiak ngak rilo labik yau cao pui, ba tal apui mbang glai trak. Labaih 1.100 urang metai kayua rilo mbang langik dui atah, dom urang roh duah mboh haduh hatai ka bruk jhak kayua langik salih karei oh daok lagaih ba tal prein yawa bhap bini oh karo.