Page ini, Thanh uy TPHCM peih nyaom ginum biai brei Sarak  Quyet dinh di Mentri Chinh tri ka bruk urang jakar. Ong Trần Cẩm Tú, Uy vien Mentri Chinh tri, Thuong truc Ban Bi thu dang tabiak ngak bruk. Di nyaom biai, ong Trần Lưu Quang, Bí thư Trung ương Đảng, Akok Mban Chinh sach praong pakat negar hu Mentri Chinh tri ba ngak Bi thu Thanh uy TPHCM. Ong Trần Lưu Quang bhian hu tukvak ngak Pho Bi thu Thuong truc Thanh uy TPHCM meng bilan 2 thun 2019 tal bilan 4 thun 2021. Dahlau di nan, nyaom biai ba tabiak sarak di Mentri Chinh tri ka ong Nguyễn Văn Nên, Uy vien Mentri Chinh tri, Bi thu Thanh uy TPHCM hu ngak Uy vien Thuong truc Tieu ban Van kien Nyaom roya Ndang mbang XIV.

Tỉnh Quảng Ngãi page ini peih Nyaom roya pakacah gauk anit ranam taneh ia mbang ka sa. 5 thun tapa, dom bruk pakacah gauk ngak bruk  “ Quảng Ngãi daong prein padang palei pala birau”, “Daong urang kathaot- Oh ceik thei daok veik gah likuh” hu daong urang pasiam veik, padang hu 9.000 baoh sang, ngak salah taong abih baoh sang oh daok taik tahak, tani tanat raidiuk saong patagok khang kajap ka bhap bini. Di nyaom roya, Mban Peih bruk ba tabiak Sarak alin Hala dok pakacah gauk di Thu tuong Rajaei  ka 5 kapol nyaom naih gheih ba akaok nao dahlau dalam bruk pakacah gauk anit ranam taneh ia tinh Quảng Ngãi thun 2024.

Po bein di tinh Vĩnh Long, Đồng Tháp daok pablei baoh paneing atah hu yaom meng 15.000 tal 20.000 dong sa kilo; ta-eng baoh paneing Vú Bò( janih praong, vin) hu yaom labaih 30.000 dong sa kilo. Hu tuk baoh paneing oh hu ginup pablei ka urang, yaom tagok tal labaih  50.000 dong sa kilo, daong urang pala paneing duah hu jien tame. Baoh paneing khik hu yaom tani tanat saong hu jien glong kayua dom doanh nghiep blei piah pablei tabiak ka negar langiu, atau ngak keo paneing saong jru…Tui po bein, phun paneing mbuan pala, takik abih jien, brei paik baoh luac thun saong mbuan pala taneh halei jeng diuk hu, mbuan pablei. 

Jit ruak pandiak tabiak darah di tinh Dong Thap daok tagok glong saong kan thau dahlau. Rilo “ labik ruak rilo” lac dom xã  Gò Công Đông, Chợ Gạo...Dalam tinh Dong Thap urak ini hu labaih 1.400 sruh jit ruak pandiak tabiak darah, tagok labaih 80% dut saong tukvak ini thun dahlau. Anak jit ruak rah tabiak, gah Y te tinh Dong Thap peih ngak rilo jalan drah samar yau: ngak hacih sa-at taong abih labik hu jit ruak, pruh jru di dom labik hu ruak, pakhang bruk pametai anek raok, pametai jamoh…

Ribuk ka 5 daok ngak khut tayak ralo di labik tapen tathik bhum kreh negar. Gah chuc nang saong karja bhum palei daok peih ngak rilo jalan pacang caga dalam nan hu bruk khik brei salamat kapal gilai daok pataok di dom pabah tasik. Mbiah tal page ini, di labik tapen tathik dom bhum tinh, ban meng Quảng Ninh tal Lam Dong (Binh Thuan klak) hu labaih 1.000 kapal gilai  daok pataok di labik hu siam mekre. Dom labik pataok gilai, kapal gilai piah daong hu caga blaoh blai luac harei melam piah daong ka urang tuk rah tabiak bala, khik brei salamat ka gilai, bhap bini.

Indonesia daok peih ngak danak dak 100 Sang bac bhap bini pato oh mek jien, piah ngak brei abih bruk eik lipa dalam negar. Uranaih hu bac danak dak ini di dom sang bac gam bac gam daok hu bruk njauk hatai di urang amaik ame. Dom sang bac ini taduan anek saih di taong abih pakat bac meng tieu hoc, THCS saong THPT. Bruk nan lac meneing dalam dom sarak daong ka rahra hu pambak praong jang di karja Tổng thống Prabowo Subianto birau hu ba tabiak.

Malaysia birau pakauk pablei hluk karei krih ka negar langiu, dalam tuk Mỹ saong dom taneh ia Tay daok kham merat ngak brei rilo labik pablei tame saong takik blei meng Trung Quoc lac taneh ia meblah tal labaih 60% kuac mek saong 90% ngak tabiak hluk karei krih di dunya. Tui kuhria mboh dahlau hu labaih 75 ti USD saong prein ngak tabiak hluk karei krih, Malaysia daok jhul pasamar padang ngak dua baoh sang mac praong birau, pamong tal bruk cakrok patagok bruk pablei dalam negar.

Yaok rituh urang mai meng Tay Phi hu daong di harei kabroi langiu kaoh pulao tathik Canary, Tây Ban Nha. Dom urang nan hu bol lin daong di Tay Ban Nha ba tagok gilai. Dom urang dalam nan hu iek ruak. Tui dom urang nao tathik, jalan tathik Đại Tây Dương biak mbuan gaok bala kayua langik jhak meda tal tableik gilai sit, gilai kayau di urang nao ngak mbang taong chap ikan./.