Akaok Quoc hoi Trần Thanh Mẫn hu mbaoh tangin ba tabiak sarak Uy mban Thuong vu Quoc hoi pabak bruk kuhria mek tame kadung jien karja thun 2024; rabha, pandar gah patagok kadung jien karja thun 2024. Cambaih laih lac, Uy mban Thuong vu Quoc hoi pabak bruk kuhria jien mek tame kadung jien thun 2024, jien mek tame di kadung jien karja thun 2024 lac jaik 343 ribau ti dong. Gam haong nan ramik caga gah piah ngak bruk pasiam sarak jien bilan ngan haong urang jakar, kong chuc, kapul bol lin pan phao karaong saong urang ngak bruk dalam gah ngak mbang pablei salih lac labaih 76 ribau ti dong.

          Akaok UBND tinh Tây Ninh Nguyễn Văn Út caong khin dom don vi, bhum palei pataom tame pasang iek, ba tabiak jalan ngak brei patagok kham ngak bahu  bruk cakrok patagok kinh te 10%. Tui nan, meng ini tal puac thun 2025, Tay Ninh pataom tame bruk ramik jabat karja “ Jak gheih- takik - samar- ngak njauk bruk - njauk hukum – siam mekre”; ngak tui hu siam bruk karja dua pakat tani tanat, sron mbon saong samu drah. Tinh jhul pakhang bruk CNH, HĐH, mek ilamo kong nghe, salih birau hadah krah saong salih pandar taka so tame ngak bruk.

Jabat Roh duah Patagok Ban raya Ho Chi Minh daok salah blaoh danak dak, kuhria dalam thun 2026 - 2027 brei salih hu labaih 80% urang peih nduac radaih kong nghe meng radaih xang tapa pandar radaih ndien. Tal thun 2029, brei pakauk taong abih radaih xang pabak dom jitvu pajeng ba dalam bhum. Gam haong nan jalan ngak tal thun 2030, taong abih radaih buyt di Ban raya Ho Chi Minh brei ngak bruk salih tapa radaih nang luong hacih. Lac patakik tathuak thak nerak, ngak brei samar drah jang dut haong jalan kuhria tal thun 2050.

Jalan tapen tasik di tinh Dong Thap atah labaih 25km daok sap pagap jaik peih ngak. Danak dak kuhria abih tih jien buh tame labaih 5.590 ti dong, lac jalan pambuak dom bhum tapen tasik di Bhum taneran karaong Cuu Long. Urak ini dom harak gal ho so pok tagok HĐND tinh brei pasang iek tapa jien padai peih ngak jalan tapen tasik di tinh Dong Thap di bilan 7 ini. Danak dak piah pambuak dom bhum, pambuak dom jalan tapen tasik gah meraong negar atah jaik 1.000km nao tal TPHCM saong dom tinh bhum tasik Tay Nam Bo.

Gah yulit Ca Mau daok brei mboh dom bruk siam, dalam 6 bilan akaok thun jien mek tame hu jaik 4.900 ty dong. Hadei tuk pagam, tinh Ca Mau jeng hu veik rilo drap ar saong labik yulit danei angan meng tinh Bac Lieu klak. Bruk pabak ini ngak mada veik ka ndap nda yulit di tinh saong paglaong bruk dui pachreih ngan haong tuai mai. Tukvak anak tal, Ca Mau brei sangka iek praong bruk dui pachreih gah buh jien tame hu makna tame dom labik yulit yau sa labik yulit padeih padei tapen tasik Sông Đốc – Hòn Đá Bạc – Nhà Mát.

Akok mentri  Moi truong Indonesia khan lac, labaih 6 trieu bhap bini Jakarta njom ruak jalan suan yawa kayua yawa langik njom nerak dak harei dak trak di ban ine. Dom bruk ba tal njom nerak thak kong nghiep saong radaih container. Jakarta daok dalam dom ban njom nerak trak abih di dunya.

Canh sat Campuchia hu mek kareik jaik 1.200 urang dalam bruk duah mek kol duis pandar ilamo kong nghe glaong di negar ini. Rilo dom urang njep mek kareik lac urang di negar langiu hu pambuak tal dom jalan chot pagat online tapa negar, dalam nan hu labaih 270 urang Indonesia saong 75 urang Dai Loan (Trung Quoc). Rilo urang dalam nan brei thau lac njep plue pablei saong njep plue nao ngak bruk di dom pasak chot pagat online di Campuchia./

Hajan praong kayua hangin di tinh Punjab di Pakistan ba tal takik abih lac 63 urang metai saong jaik 300 urang njauk ram buac dalam 24 mon tapa, kuhria abih tih urang metai kayua ia ribuk sua dalam negar tagok takik abih lac 159 urang kuhria meng puac bilan 6. Hajan praong ngak ia dauk saong glut jaleih sang, ralo lac dom urang metai kayua tabung sang laman lamuis. Urak ini, hajan dui atah veik klau harei tra, hajan karei veik meda rah tabiak di puac adit anak, abih di nyu lac di dom bhum gah barah./.