Di nyaom biai ka dua HĐ Bhap bini Ban raya Ho Chi Minh mbang X rah tabiak harei kabroi, Phaok Bi thu Thuong truc Ban uy Ban raya Ho Chi Minh ong Nguyễn Thanh Nghị brei thau, asar kadha di jalan ngak patagok Ban raya lac pataom prein ngak piah jhul samar saong salah blaoh dom danak dak ha tang hu makna praong, dalam saong atah. Cambaih laih lac, Ban raya Ho Chi Minh kham merat khip kandauk Vanh ndai 3, peih ngak Vanh ndai 4, jalan peih drah samar Ban raya Ho Chi Minh – Môc Bài saong jalan Metro ka 2. Taphia nan, dua danak dak hu pakat dunya lac Lamnge pajeng ba Cần Giờ saong Pasak jien padai dunya di Thủ Thiêm jeng hu jhul samar drah salah blaoh.

Piah plaik njiak bruk kurang urang jakar chuyen mon pakat xã, UBND tinh Lâm Đồng brei ba labaih 400 urang jakar di dom so, dom gah di tinh mai daong pakat xã. Dalam 124 don vi hanh chinh pakat xa di tinh Lam Dong hu 113 don vi tut angan brei pabak urang jakar ngak bruk, hu labik kurang tal 12 urang jakar. Dom urang jakar hu ba mai ngak bruk daong pakat xa hu ilamo ka kong nghe khaw tin, drap ar moi truong, ke toan, padang ngak saong hukum-ho tich…Bruk nan kayua dom don vi pakat huyen klak ba urang jakar mai xã ngak bruk oh samu yau gauk, labik kurang, labaih.

Di mbang nyaom HĐ Bhap bini tinh Dong Nai, Akaok UB Bhap bini tinh Võ Tấn Đức brei thau, 6 bilan puac thun, Dong Nai brei pataom jak ba abih gah piah buh jien tame patagok ket cau ha tang, abih di nyu nan lac jalan mbak pambuak bhum. Tinh brei jhul khang bruk pambuak karja – menuac urang saong jhul samar tukvak dom danak dak hu makna di negar nao tapa bhum. Jeng di mbang nyaom biai, dom urang lambaik vakil hu ba tagok panuac di drei tapa 8 sarak hu makna, ngak jeng hukum piah jhul tagok bruk patagok kinh te - xa hoi, khik kajap quoc phong – an ninh dalam tukvak anak tal.

Ong Hà Vũ Sơn, Yam ndoc So Kong thuong Ban Cần Thơ khan lac, Ban Cần Thơ hu peih ngak rilo jalan daong doanh nghiep pablei kaya. Dalam nan, brei ngak dahlau bruk pambuak dom pasak pablei salih, dom cua hang tien ich dalam Ban ba kaya nong hu mai jiak veik haong urang blei. Njauk ndem tal, So Kong thuong birau pambuak bruk ba durian di Can Tho mai haong tuai damuai di Ban Hải Phòng saong Đà Nẵng tapa jalan kapal haok, meng nan rik tame yaih khan saong jhul pakhang bruk pablei kaya nong di ban.

Angaok bhum xa Ba Chúc, tinh An Giang bahrau rah tabiak hajan praong ba tui angin khang, ngak khut tayah 19 baoh sang, 1 balai y te saong rilo drap ar. Rilo sang njauk khut tayah lac sang di urang Khmer. Di hadei tuk rah tabiak kan kandah, karja palei xa Ba Chúc hu mbaok jak ba bol lin saong rahra daong ramik dom kanjah hadei mbang hajan, pacang anak mata, daong dom baoh sang kan kandah samar drah tani tanat raidiuk. Xa Ba Chúc daok tagok jalan daong jien padai pasiam sang danaok saong likau tinh daong samar chip ka rahra.

Mentri Ngoai giao Trung Quoc brei thau ka bruk daok huac kanda ka dom bruk cuang kandah di tapen negar Thai Lan saong Campuchia, caong khin dua taneh ia ini langyah hu siam lagaih ka dom bruk kandah gauk tapa ndem meyai saong tacei ba gauk hu siam. Dahlau di nan, Dai su quan Trung Quoc di Campuchia iew bhap bini taneh ia ini di Campuchia plaik atah dom bhum taneh jiak taphia negar Thai Lan dalam tuk kandah gauk catang yau urak ini.

Tui pathau khan camreip meng kapul lin daong samar chip, taong abih tuai damuai saong dom urang peih par ahaok di dalam ahaok An-24 laik tame Bhum Amur, Lien bang Nga hu brei lac matai. Ahaok truc thang daong oh mada kataok trun hu di labik rah tabiak bala kayua ceik can kan kandah. Jitvu daong samar chip brei thau, ahaok par pajeng 40 tuai damuai, dalam nan hu uranaih, gam haong 6 urang duh bruk dalam ahaok. Dalam bruk kataok trun mblang kapal ahaok par hu peih par payeng wil, blaoh lahik bruk pambuak.

Tong thong My Donand Trump khan lac, bruk neh rabha Kong ty kong nghe Nvidia lac “biak kan kandah” saong kapol ini khik hu rilo bruk lagaih dut saong taong abih dom gah meriak gauk.  Ong Trump meyaom Yam ndoc ngak bruk di Nvidia Jensen Huang gam haong urang ngak praong karei di gah kong nghe, kayua dom jien urang buh tame ngak mbang di Mỹ. Akok bilan ini, Nvidia hu jeng kong ty akaok meti yam tapa 4.000 ti USD piah pablei pandar di darak pasar, hu kein laba glong mai meng bruk urang khin pandar phan cung AI./.