Dalam bilan 8 ini, Mentri Noi vu brei ba 34 urang jakar hu ilamo naih joi, halan hatian, iek praong bruk ngak haong bhum palei pala, daong dom tinh, ban dalam 3 bilan. Dalam nan meda palih ruah dom urang naih gheih, ngak njauk dom bruk pambuak tal peih ngak dom sarak karja dua pakat. Piah ngak salah bruk nan, Mentri Noi vu brei peih tal pasram, pabak ilamo, caga asar kadha, danak dak, harak gal tai lieu piah urang jakar duah thau dahlau caga nao ngak bruk. Ini lac bruk ngak birau, oh ka bhian mboh saong Mentri Noi vu lac jabat karja brei ngak dahlau.  

Kapol chữ thập đỏ Viet Nam, bala meng langik tasik rah tabiak dalam thun 2024 ba tal 514 urang metai saong lahik, tagok 3 mbang dut saong thun 2023 saong hu 2.207 urang njauk rambuac; kuhria khat lahik jien padai jaik 89 ribau ti dong. Gam haong nan, dom bruk alam moi truong, jit ruak birau tamuh, jeng yau dom bala meng kan dahlau saong oh bhian mboh, daok khin brei hu jalan kuhria njauk tani tanat, pambuak khang kajap saong caga samar meng dom pakat, dom gah, abih di nyu lac dom bruk ngak pahala meng bhum palei.

Labaih 3.560 doanh nghiep di tinh Dong Nai khin palih ruah tame labaih 88.000 urang ngak, labaih 50% dalam nan lac urang ngak pho thong. Dom gah khin palih ruah urang ngak nan lac njik menyim, kalik takhaoh, kaya ngak meng kayau, dien tu…Piah pachreih urang ngak, dom doanh nghiep praong khan brei palih ruah yaok ribau urang ngak gam jien bilan glong, hu rilo jien daong karei karei. Gah chuc  nang  Dong Nai pachreih urang ngak duah buk tapak doanh nghiep atau pambuak hoang don vi kayua Karja khik iek piah tacei pato, duah bruk ngak oh mek jien.

Tinh Ca Mau khan brei thau bruk pasang iek tui kadha ngan haong 12 danak dak dalam tinh daok dalam bruk kuhria dahlau pasdang iek danak dak kan kandah, tavak tavaiy, suai damuai, daok gal tavak suai lavik, mbuan ngak lahik, palai pajua. Bruk pasang iek nan dalam bruk kuhria mboh dahlau di Thanh tra Rajaei , dui atah 30 harei. 12 danak dak pasang iek nan hu kuhria jien buh tame labaih 4.000 ti dong, dalam nan tinh Ca Mau(klak) hu 6 danak dak saong tinh Bac Lieu (klak) hu 6 danak dak. Tukvak pasang iek meng tuk padang ngak dom danak dak tal harei 1.7.2025.  

Phun la-u brei baoh di tinh Vĩnh Long  hu tani tanat saong thun hadei glong jang thun dahlau, meng jiak 11 tấn sa hecta thun 2020 tagok jaik 12 tấn sa hecta thun 2025.  La-u thun ini di Vĩnh Long kuhria labaih 1 trieu 300 tấn , sumu jiak 1 ti 100 trieu baoh. Tukvak anak tal, gah ngak nong meda pasram ilamo ky thuat pala, tacei ba buh khak huu co, tacei pato ngak brei patagok la-u hu khang kajap.

Jabat Khi tuong Hong Kong, Trung Quoc brei panuac kakei dahlau hajan ribuk pakat glong (sambo njuk) kayua hajan praong ngak ia ribuk dauk. Di Hong Kong, hajan tal 90 mm yaok mon. Jaik 10.000 mbang tam mbat dalam sa mon. Rilo sang iek ruak, sang bac saong tòa án gaok kan kandah. Buu dien Hong Kong padeih taong abih jitvu duh ka tuai damuai tal tuk hu panuac kakei hajan ribuk hu atah klak. Gam haong nan, labaih 100 mbang par hu kadun likuk, 2 mbang padeih saong 2 mbang karei brei salih jalan par.

Dom Tieu vương quoc Arab Thong nhat (UAE) daok dalam bilan he pandiak biak catang, tagok glong tal 51 do C. Tui kuhria tukvak bilan he daok pandiak veik, pandiak di bilan 8 tui kuhria  glong jang 0,25 - 0,5oC dut haong bhian thun. Langik tasik salih karei oh lagaih saong pandiak hajan ribuk ngak kan kandah rilo tal prein yawa bhap bini saong khik brei salamat di bhum taneh ia Trung Đông.

Canh sat Tây Ban Nha birau chap mek hu 2 kapol kol duis, pambuak tal bruk ba urang tapa negar Anh suan hukum saong Canada meng ho chieu ja. Dom urang nan ralo mai meng negar Nam Mỹ tui panuac duah bruk ngak tani tanat, min hadei nan chap mek abih harak gal saong chap mek ngak kumei ma-in labik biak kanjak nerak. Gah chuc nag chap khik 141.000 jien Euro, 3 sruh radaih, dom drap ar taneh riya saong mac jamraih kong nghe. Labaih 60 tai khoan gilang pariak pacang khik./.