Mban Thuong truc Uy ban Trung uong Mat tran Negar Viet Nam birau iew dom tinh, ban pataom tame ngak khang dom bruk pahadar 80 thun Cach mang Bilan 8 saong Quoc khanh harei Negar 2/9. Peih ngak dom bruk di labik daok di rahra piah ngak brei chreih chrai bui sambai, pachreih hatai anit ranam taneh ia, hadah mbaok meta ka bangsa, jum pataom, jhul pakhang dom bruk jak ba gauk anit ranam taneh ia, dom bruk jak ba di bhum palei, padang labik daok di bhap bini “jum pataom, trei sir, haniem phol”. Tukvak peih ngak catang dom bruk nan meng harei 10/8 tal harei 10/9 anak tal.

Ndang bo xã Lâm Tân, ban Cần Thơ birau peih nyaom roya Dang bo xa mbang ka I, vaktu 2025 -2030. Ini lac dom bhum palei hu rilo bol bhap bangsa Khmer diukrai. Raidiuk  bhap bini ralo pambak tame bruk ngak nong. Dalam vaktu tal, Dang bo xa Lâm Tân kham ngak siam dom danak dak pakat negar; paglong bruk y te, pato megru saong parilo urang ngak bruk; jhul pakhang bruk salih so…kham padang xã palei pala birau paglong.

Urak ini, gah Pato megru tinh Dong Thap daok kuhria caga sami samar dom bruk piah tame thun bac birau. So Pato megru hupadang Kapol urang jakar mai pasang iek bruk ramik caga thun bac birau di dom sang bac bhum taphia negar. Dom sang bac THPT pasang iek  dom gru pato, brei palih ruah, ginup gru pato bac. Tinh Dong Thap birau kham merat tal thun 2030, dom sang bac dalam tinh mek hu tanut chuan pakat negar.

Tukvak tapa, kurang phun pajaih ca cao nan ye yaom tagok glong. Yau nan ye, yam tame bilan hajan thun ini, bruk caong khin peih taneh pala di bhap bini pak labik pala  phun ca cao di ban raya HCM jeng tagok. Ong Lê Ngọc Cần, Yam ndoc  Hợp tác xã Ca Cao Châu Đức, xã Bình Giã khan lac, kayua pagam tinh, nan ye danak daok daong, pabak phun pajaih ca cao pak ini padeih, lac bruk ba tal kurang phun pajaih.

Dalam tuk daok cang bein la-u brei baoh, rilo baoh sang di xa Tiểu Cần, tỉnh Vĩnh Long khang hatai pala njam patam ala phun la-u, dalam nan hu phun ngò gai ba mai kein laba  anak meta. Urak ini, yaom pablei ngò gai meng 9.000 tal 16.000 dong sa kilo. Kuhria yaok kong taneh lac 1000 m2 brei hu meng 20 tal 30 kilo sa harei, glong meng 2 tal 3 mbang dut haong pala padai. Dom baoh sang urang pala ngo gai hu mesre jien meng 10 tal 15 trieu dong.

Dalam sa chien dich praong oh ka bhian mboh, canh sat Thai Lan tame 200 baoh baha  dalam negar hu pambuak tal dom bruk njauk duis trak yau mbang jien padai, rao jien, peih radaih tuk menyum alak, pablei matuy saong pambuak rilo taneh ia. Rilo urang duis lac hu jeng urang Phik Bhat atau daok kandauk mbaok  di dom labik dalam baha. Bruk ngak mbang ini ngak manuac sia dalam negar Thai Lan haduh hatai ka jalan diukrai saong bruk ngak di urang bhik bhat jeng yau bruk ngak di dom baha khik iek saong angan je harak gal urang likau tame.

Kuhria tal jalan pandiak harei kabroi, hu labaih 75.000 urang di tinh Quảng Đông negar Trung Quốc hu panduan ba nao labik karei kayua ia ribuk sua praong. Dom mbang hajan trun gah meraong tinh ini ngak glut jaleih taneh di Quảng Châu ngak sa urang metai. Dom bruk kham merat daong daok hu peih ngak samar. Hajan praong ngak dauk rilo labik daok di bhap bini saong kuan pablei salih di tinh Quảng Tây jaik nan. Rajei Trung Quoc daok parabha 100 trieu nhan dan te (sumu 14 trieu USD) ka bruk ramik pasiam veik tinh ini.

Dom taneh ia Arab saong chau Au patui nan kham merat ba pandap daong samar chip ka dải Gaza  nan lac bhum taneh daok gaok bruk kan kandah dalam bruk daong pahala oh ka bhian mboh kayua kalin kan  di Israel. Urak ini hu 9 taneh ia dalam nan hu Trung Đông, chau Au saong Ai Cập payua tame dải Gaza labaih 20.000 tấn pandap dang samar chip dalam nan hu pandap mbang, jru cavao saong pandap iek ruak y te./.