Page ini, di Jabat Trung uong Ndang peih pakak dalam praong prang Nyaom biai mbang ka 12 Mban Chap hanh Trung uong Ndang mbang 13. Nyaom biai hu ginum gauk brei panuac ka klau bruk praong, nan lac bruk caga Nyaom roya XIV di Ndang; brei ka bruk chinh tri, hukum asal kadha praong, nan lac bruk caga Nyaom roya XIV di Ndang; harak gal ka bruk chinh tri, hukum ka jalan ngak patui veik pasiam salih bahrau taneh ia dalam tukvak anak tal saong bruk ngak di urang jakar. Di nyaom biai, Tong Bi thu To Lam ndom cambaih laih, pandar ba tabiak lac yap urang Uy vien Trung uong brei paglaong hatai thau ka bruk di drei, pataom tame ka glo akaok, ndom biai hu dan chu, tapak tapaiy, taduan saong pang tui; brei iek praong kein lagaih taneh ia, bangsa glong abih, dahlau abih; oh luai ka hagait lac kein lagaih di manuac  urang, kapul karei, ngak tui hatai sahneng di manuac urang atau kanda, plaih nyaik ngak kan kandah tal sarak.

Mentri Ngak nong saong Moi truong birau taduan brei angan ka 47 pndap OCOP 5 patuk pakat negar, glong abih di Danak dak “Yaok sa xa sa kaya OCOP”. Tinh Dong Nai hu 8 kaya nong birau hu brei angan OCOP 5 patuk pakat negar. Piah paglong dom kaya kan mek hu tanut chuan OCOP, dom doanh nghiep di Dong Nai brei caik hatai padang ngak bruk kaya tamo khang kajap, buh jien tame piah ngak tui kong nghe, patagok kenh pablei, yaih khan piah ba kaya OCOP hu mai jiak jang haong urang blei.

Di var Ndom biai “Daong prein patagok kong nghiep Ban raya Ho Chi Minh – Meng kein lagaih tal bruk ngak” kayua So Kong Thuong Ban raya peih ngak bahrau ini, rilo panuac ndom lac bruk pambuak bhum dalam ngak mbang kong nghiep urak ini oh ka quy hoach pataom. Tien si Trần Du Lịch ndom lac, labik peih praong hadei pagam lac sa kein lagaih peih Ban raya Ho Chi Minh “cih gilac ban do” patagok kong nghiep. Ngan haong labaih 8.000ha taneh kong nghiep urak ini saong 1.000ha taneh ka labik kong nghe glaong. Ban raya Ho Chi Minh brei ngak jeng vanh ndai kong nghiep, ndo thi, jitvu, dui atah meng Binh Duong (klak) trun lamnge ia dalam Cái Mép – Thị Vải.

Tinh Vinh Long birau pataom tame patagok bruk ngak nong kong nghe glong, nang luong hacih, logistics, pablei salih...piah bruk ngak kinh te hu khang kajap patagok. Urak ini Vĩnh Long hu taneh praong jaik 6.300 km2 saong labaih 4 trieu 250 ribau bhap bini. Tinh ba tame pandar ngak meng kein lagaih di kraong - tasik, jalan peih drah samar saong jalan raya piah patagok bruk ngak kong, pablei salih, logistics, mek kinh te tasik ngak pasak. Tui nan, pakhang bruk pambuak dom bhum palei jiak taphia piah pambuak kaya kaya dom tinh.

Cuc Canh sat jalan mbak, Mentri Kong an pathau khan lek taka phone manuac urang di Thieu tuong Đỗ Thanh Bình, Akaok Jabat Canh sat Jalan mbak piah taduan panuac ndom ka bruk oh njauk hatai di rahra ka bruk sron mbon salamat jalan mbak di dalam negar. Tui nan, rahra meda pambuak tapak haong Thieu tuong Đỗ Thanh Bình tapa lek taka phone 078.9388.539. Bruk brei mboh cambaih laih ini piah paglaong siam lagaih bruk khik kajap sron mbon salamat jalan mbak dalam negar.

Hajan praong di dom bhum Kreh saong bhum meraong Han Quoc dalam dom harei tapa ngak takik di nyu 4 urang metai, sa urang lahik saong labaih 5.000 urang brei panduan ba nao labik karei. Urak ini rajaei Han Quoc paglong bruk brei thau dahlau ka bala meng langik tasik tagok tanut glong abih “ bala trak”. Jabat pacang caga bala Han Quoc jeng peih bruk ngak catang abih dalam dom bruk pacang caga samar chip saong jak ba dom gah piah ngak brei takik khat lahik kayua hajan praong.

Canh sat Thai Lan bahrau duah mboh, pataom mek labaih 40 tan lamo, tung pruac ba tame dauk hu tram janih jrhoa chat formol di tinh Pathum Thani. Formol paceng saong taong anek ruak biak khang, hu thau tal yau sa janih hoa chat paceng khik dalam bilik ngak iek, pakauk patruh oh pandar ka bruk pacang khik kaya mbang. Formol meda njom tame rup pabhap tapa jalan tung pruac, thuak yawa, ngak ruak trak saong ruak kan abih, mbuan ba tal metai.

UB Pacang caga tham nhung Indonesia chap mek 4 urang lac urang jakar pakat glong di Mentri Nhan luc, lac mek jien saong ndok mbang jien urang ka brulk brei ngak harak gal ka urang nao ngak pak negar langiu. Meng thun 2019 mbiah tal thun 2024, dom urang jakar nan mbang jien di urang jaik 54 ti Ruppiah, sumu 3 trieu 300 ribau dola My piah hu mbaoh tangin Danak ba urang nao ngak negar langiu. Urak ini, bruk pasang iek nan daok ngak brei cambaic laic di dom jabat di tru brei harak gal nao ngak saong brei harak gal daok veik ka urang negar langiu./.