Mentri Pato Megru daok mek panuac ndom meyai ka danak dak pasiam di dom mon bac megru. Bruk ramik gilac jabat karja pakat tinh saong ngak karja palei dua pakat ngak kan kandah tapak tal danak dak bac megru di dom mon bac: Sajarah, Dia ly saong Giao duc cong dan, kayua nan brei pasiam danak dak di dom mon bac ini. Kayua nan, bruk ba tabiak Sarak pasiam salih, pabak veik Danak dak pato megru pho thong lac njauk ngak khik kajap bruk ilamo khoa hoc saong bruk lagaih di danak dak.

Kong an Ban raya Ho Chi Minh daok peih ngak pabak ngak cambaih laih angan ndien tu ka urang negar langiu diukrai, ngak bruk di Viet Nam. Meng harei 1/7 tal ini, labaih 10.000 harak gar ngak cambaih laih angan ndien tu hu tok taduan saong langyah. Ini lac dom bruk gheih, brei mboh kham merat di kapul kong anBan raya Ho Chi Minh dalam bruk daong urang negar langiu dalam bruk diukrai, ngak bruk saong ba drei tame Viet Nam. Ini jeng brei mboh hatai duh bruk abih tung tian di kapul nyaom Kong an.

Tinh Gia Lai brei pabak paok jien labaih 250 ty dong daong dom xa gaok kan kandah ka co so vat chat, ndap nda kaya ngak bruk. Hadei sa bilan ngak karja palei dua pakat, he thong taduan harak gar di dom pasak duh bruk karja ngak bruk siam lagaih, ngan haong labaih 163.000 harak gar hu taduan; bruk langyah njauk tukvak mek hu labaih 97%...Yau nan min, co so vat chat di rilo xa, phuong oh daok kajap, ndap nda kaya ngak bruk oh samu gauk saong khut tayah.

Jaik di ini, di dom phuong pasak di tinh Dong Thap daok peih ngak dom danak dak pakajap, pasiam ban madin. Bruk njauk ndom lac rilo danak dak, banah padang dui suai atah, kuac cakac taneh peih labang dalam, ngak kan kandah ka bruk daok dang mbang ngui, pablei salih di rahra. Bruk pakajap, pasiam ban madin lac njauk ngak, blaoh dom po buh jien tame saong gah padang dom danak dak brei pambuak samu dalam luac jalan ngak, plaih bruk padang ngak rilo mbang di sa labik, ngak kan kandah tal bruk daok dang, mbang ngui di rahra.

Dalam bilan 7 bahrau blaoh, gah Y te Can Tho hu jaik 200 urang ruak pandiak tabiak darah, tagok tal bruk njauk kakei caga tamuh pambak jit ruak dalam bhap bini. Kuhria tal harei 27/7, dalam ban hu 1.188 urang ruak pandiak tabiak darah. Bac si Nguyễn Huỳnh Nhật Trường, Sang iek ruak Uranaih ban raya Can Tho brei thau, rilo bruk uranaih hu ba nao tal sang iek ruak dalam bruk ruak trak, kayua baoh sang nda suan di ruak pandiak tabiak darah saong ruak pandiak ndom rilo anek ruak. Kayua nan, tuk mboh uranaih pandiak rup, amaik ame brei ba anek nao tal dom labik y te jaik abih piah pasang iek ruak piah taong ruak dil samu.

3.200 urang ngak kong di gah Boeing di Missouri saong Illinois, Mỹ ba gauk padeih bruk. Bruk ini rah tabiak dalam dom mbang ndom meyai ka bruk brei tagok jien bilan di kong ndoan saong gah dang akaok Boeing oh mek hu bruk samu gauk. Di bruk ndom meyai bahrau abih, gah ini brei thau tanut tagok jien bilan hu pasiam tagok kuhria rah tapa hu 40%. Min, bruk ini patui veik njauk kong ndoan tayah klak oh ngak tui. Kapul Boeing daok gaok rilo kan kandah kayua bruk ngak tabiak gam haong bruk padeih bruk dui atah 7 adit ngak kan kandah tal dua labik ngak bruk pasak.

Raja-ei Colombia brei thau taneh glai njauk khut tayah dalam thun 2024 tagok tal labaih 113.600 ha, tagok 43% dut haong thun 2023. Daok bhum Amazon hu tal 65% taong abih taneh glai njauk lahik, samu labaih 77.000 ha. Makna hu brei thau lac kayua peih praong mblang hareik raong glang lamo, pala phun chung hukum, kuac mek kaya dalam taneh chung hukum saong padang ha tang biak rilo. Langiu di nan, pandiak bhang kayua langik salih karei saong dom mbang apui khuah glai jeng ngak kanjah trak ka bruk ini.

Urang ruak ung thu di Nga brei hu taong ruak iek dahlau meng vaccine ung thu ta-eng urang menuac dalam dom bilan anak tal. Nga kuhria ngak iek vaccine ung thu klauk tame ka ta-eng urang ruak akaok meti dalam bilan 9 atau bilan 10 anak tal, kayua Mentri Y te pambuak haong Pasak Gamaleya peih ngak. Vaccine hu ngak karei ka yaok urang ruak meng di du lieu di truyen di khoi u, oh meda hu pandar ka urang karei.