Page ini harei 4/8, Akaok UB Bhap bini Ban raya Ho Chi Minh Nguyễn Văn Được gam haong kapul ngak bruk di UB Bhap bini Ban raya hu pasang iek Pasak Duh bruk karja phuong Ba Ria. Pasak Duh bruk karja phuong Ba Ria urak ini hu 10 urang. Dalam bilan 7, Pasak taduan hu 1.288 harak gar, dalam nan hu 1.135 harak gar online saong 153 harak gar tapak, tapa buu chinh. Piah ngak karja 2 pakat siam jang, ong Võ Hoàng Trung, Phaok akaok UB Bhap bini phuong gam haong ngak Yam ndok Pasak Duh bruk karja phuong Ba Ria likau tagok veik sa phaok akaok UB Bhap bini phuong piah ginup urang langyah harak gar pasang iek taneh riya, bruk ngak mbang, daok dang mbang ngui tagok rilo.

Tinh Ca Mau ba tabiak jalan ngak piah ba kein lagaih bruk raong arieng patagok jeng bruk hu makna ka kinh te, pasak ngak arieng praong abih di bhum Taneran kraong Cuu Long saong dalam taneh ia. Dalam nan hu brei peih dom tal magru pasram, salih ilamo kong nghe labaih 1.000 baoh sang rahra ka jalan raong arieng meteh pablak saong pambuak peih praong danao raong hadang; daong pato tacei ka ilamo ky thuat ka 4.000 baoh sang raong; padang takik abih 12 hop tac xa bahrau, yaok hop tac xa hu praong 100 ha, gam haong 12 chuoi pambuak ngak tabiak saong pablei.

Patui veik jhul khang tabung glaong pacang cakak pablei dauk, bleik saleih dalam pablei salih, ndap nda ja, Akaok UB Bhap bini ban raya Can Tho pandar dom so, dom gah, bhum palei dil samu pathau khan dom chuoi pabak ndap nda nong, kaya mbang salamat, siam glaong; ngak tantu cambaih laih dom labik ngak chung atau mbuan rah tabiak bruk oh karo salamat kaya mbang. Gam haong nan langyah ka patruh piah ka dom jalan talei, pablei ndap ja, ndap lau, oh siam glaong.

Kayua kanjah di ruak jit aih caraoh pabui chau Phi tamuh di rilo labik, yaom pabui mek ralo saong pabui brei pajaih di tinh Dong Thap trun rilo, ngak kan kandah tal urang raong glang. Urak ini yaom pabui mek ralo tok daok labaih 6,2 - 6,3 trieu dong/sa rituh kilo, trun jaik 500 ribau dong/sa rituh kilo dut haong bilan dahlau. DI dom darak, yaom pabui jeng trun labaih 5%, min prein blei jeng oh ka nduac. Dahlau bruk jit aih caraoh chau Phi daok tamuh, urang raong glang di bhum palei daok pandar rilo bruk pacang, caga piah pacang khik tapol pabui.

Dalam bilan 8 ini, tanut ia sua di akaok halau kraong Cuu Long kuhria mek hu glaong abih di tanut 3m. Piah patrun khat lahik, Jabat Quy hoach kraong ribaong gah Meraong negar pachreih dom labik bhum akaok halau ia bhum Taneran kraong Cuu Long brei pasang iek dom jalan paga pacang oh kajap, dom jalan ar bahrau pabak saong padang dom jalan langyah pacang caga dil samu. Labik padai he thu tal tuk yuak ye brei yuak ka drah piah plaih saong patakik khat lahik kayua ia sua; tok trun pajaih bilan thu dong di dom bhum pacang caga.

Bol lin Thai Lan hu duah mboh, taong tayah sa jalan talei pablei dauk jru phil praong di tinh Chiềng Mai. Dalam nan hu 5 urang njauk pamatai tapak. Bruk kuhria hu mboh 9 kadung pataom khik taong abih labaih 1,3 trieu klaih jru phil. Meng akaok thun 2024 tal ini kapul chuc nang Thai Lan mek hu labaih 200.000 urang saong pataom khik labaih 850 trieu klaih jru phil patau, labaih 40 tan jru phil saong labaih 1,2 tan heroin.

Kapul Nao daok karei pakat Dunya (IOM) brei thau hu 142 metai saong lahik oh duah mboh dalam mbang gaok bala di angaok tasik rah tabiak di harei kabroi di labik tasik negar Yemen. Ini hu maong lac mbang gaok bala angaok tasik ngak kanjah trak abih ngan haong urang nao daok negar karei mai meng chau Phi daok duah jalan nduac tapa dom negar A Rap Bhum Dil ginup meda dalam dom bilan tapa. Makna mai mai meng halei jeng oh ka brei thau.

Rajaei An Do brei thau negar ini hu taduan 41 mbang tamuh ruak kum menuk ada dalam thun ini. Bruk ruak kum menuk ada tamuh gilac di sa negar rilo rahra yau An Do daok ngak ka gah roh duah duh hatai ka bruk salih gen di virus, meda mai tal bruk rah tabiak di bruk ruak tamuh karei meda hu njom pambak meng urang ini tapa urang diah – bruk ngak ka dunya thur mek dalam dom jit ruak praong dahlau diah. Kapul Y te Dunya (WHO) hu kakei caga lac bruk pasang iek saong thau samar drah ngan haong jit ruak menuk ada lac biak njauk ngak piah pacang caga bruk tamuh jit ruak di dunya dalam harei hadei.