Kuhria tal harei 30/6 bahrau blaoh, dalam negar hu jaik 82 ribau gilai ikan hu tut angan, pabak di angaok co so du lieu bruk taong ikan dalam negar. Min, urak ini daok 486 gilai ikan oh ka hu tut angan, labaih 16.700 gilai atah meng 6m ba tagok kurrang harak brei adat. Mentri Ngak nong saong Alam langik gam haong Mentri Kong an daok pataom du lieu rahra tame he thong VMS (pasang iek jalan gilai ikan) piah kakei caga tapak dom po gilai saong urang dang akaok gilai ngak chung. Thu truong Mentri Ngak nong saong Alam langik Phùng Đức Tiến jeng ndom lac: Viet Nam hu kein lagaih taoh talaih “kat kanyik” meyah ngak catang dom bruk ngak chung.

Pabah kapal haok dunya Long Thành, di tinh Dong Nai daok yam tame tukvak tamat blaoh puac di abih piah kuhria caga taduan raok mbang par akaok mereip di harei 19/12 thun ini. Ini lac tukvak rilo bruk ngak jalan mbak praong karei dalam negar kuhria hu peih pakak samu haong gaok. Urak ini klau gah di sang ga hu ngak salah blaoh binah tabung, ngan haong labaih 12.000 m² kareih daning hu mek pagam. Tui kuhria taong abih bruk ngak meda ngak salah blaoh dalam bilan 8 ini. 

UB Bhap bini phuong Bình Thạnh (Ban raya Ho Chi Minh) bahrau peih danak dak Bac di bhap bini lek taka so, pagam haong mbang pakacah tabung glaong “100 harei ngak bruk hadah krah – ramik takik – khang – siam bruk, siam lagaih”. Dom kapul halan tian hu mbaok tame tacei ba rahra, abih di nyu nan lac urang praong thun saong urang metu mejua pandar jitvu karja online, bayar jien oh meng jien mbok, pacang caga chot pagat ilamo kong nghe…Dom danak dak piah brei mboh hatai kham merat ngak bruk salih lek taka so khang, daong ngak lagaih jalang ngak padang ban medin hadah krah, bahrau, anit ranam di Ban raya Ho Chi Minh

Hadei di ba pataom, gah rivang ma-in Vinh Long mek hu dom baoh jeng siam mekre ka bruk cakrok patagok, taphia di nan peih prong gah cakrok patagok bruk rivang ma-in taong abih gah, pambuak pagam gah tasik, bein saong ilamo bangsa. Dalam 7 bilan tapa, tinh taduan raok hu jaik 6 trieu mbang tuai damuai. Meng ini tal puac thun, tỉnh ba tabiak tanut taduan raok hu labaih 4,6 trieu mbang tuai damuai, ngan haong taong abih jien mek tame jaik 3.000 ty dong. Vinh Long jeng daok caik hatai cakrok patagok dom gah rivang ma-in jalan ia pambuak pagam haong Ban raya Ho Chi Minh saong dom tinh bhum taneran kraong cuu long (ĐBSCL), pambuak pagam haong palei ngak meng kal, labik inem mek dak rai sajarah. 

Pasak Ilamo, Nghe thuat Ban raya Can Tho brei peih tal pato Don ca tai tu di bhap bini rahra. Urang bac magru brei hu pato dom ilamo, jeng yau ilamo ka janih seni nghe thuat don ca tai tu saong ngak randap haong ngu cung, xuong am long ban, duah thau ka ragam, jalan peih sap adaoh, palao panuac, mek yava…Dom urang nghe nhan jeng pato jalan adaoh dom kadha adaoh bhap bini, kadha tai tu saong cai luong, meng mbuan mbiah tal paglaong.

Mbang nyaom Uy mban Tapen negar di Thai Lan saong Campuchia tui kuhria rah tabiak meng harei ini tal harei 7/8 tal, di Malaysia. Tui Mentri Quoc phong Thai Lan, bruk palih ruah Malaysia piah peih nyaom biai piah grap tanat asal daok di kreh. Akaok Mentri Quoc phong Campuchia brei mboh hatai caong khin di mbang nyaom biai ini meda ba mai kadha siam mekre. 

Mbang pandiak bhang tua riya glaong abih daok patui veik ngak tabiak dom khat lahik praong di Japon ka menuac urang saong drap ar jien padai. Dalam 2 adit ini mai, pandiak hu kuhria mboh lac 40 do C. Abih di nan lac, di tinh Hyogo di gah Meraong, pandiak harei 2/8 tagok tal 41,2 do. Dalam adit tapa, dom urang njauk ba tame sang iek ruak brei taong ruak samar chip tagok tal jaik 11 ribau urang, dalam nan hu 16 urang metai. Jabat y te Japon pachreih rahra brei pabak ia saong sara ka rup pabhap, pandar mac ngak pandiak la-an dalam sang.

Ban ine Bac Kinh di Trung Quoc gilac brei thau ka bruk hajan praong, quan Diên Khánh daok brei thau ka bruk meda hu ia dauk, ia sua jeng sambo bhong nan lac tanut glaong di abih. Trung Quoc jeng tabiak sarak peih ngak bruk pacang caga samar drah pakat do IV ka bruk pacang caga ai sua di Quảng Đông, Cam Túc saong Ninh Hạ. Jeng dalam harei kabroi, 5 urang hu brei thau lac metai lahik kayua njauk ia sua ba tatheik di ceik Bạch Mã. Hajan praong gam gam rilo harei tapa daok ngak kan kandah tal bruk roh duah urang njauk bala.