Mentri Ngak nong saong Alam langik bahrau ba tabiak “Jalan pasang iek karo salamat ndap nda kaya mbang ngan haong baoh durian that pablei tabiak”. Tui nan labik pala brei hu pasang iek karo salamat ndap nda kaya mbang oh rilo jang sa mbang yaok thun. Bhum pala brei hu pasang iek saong brei lek taka so tui adat hukum. Baoh durian that pablei tabiak langiu negar brei ka hu pala saong paik baoh meng dom labik, bhum pala hu pasang iek, brei lek taka so saong hu angan dalam harak angan hu negar blei tame mbaoh tangin. Langiu di nan, ndap nda brei hu khik ramik, pajeng ba tui njauk caong khin…

Pasak Daong bol bhap rahra pambuak haong gah Kadung jien Daong uranaih Viet Nam bahrau peih danak dak “Gilang pariak D3K2 ka uranaih” brei ka uranaih di rilo bhum palei di tinh Dak Lak. Danak dak brei taong abih 1.200 kalaok vitamin D3K2 ka 600 uranaih kan knadah, ngan haong taong yaom kaom tagok tal 460 trieu dong. Amuk Nguyễn Thị Hiền, Phaok Yam ndok Kadung jien Daong uranaih Viet Nam brei thau, danak dak kuhria brei 1 trieu klaih vitamin D3K2 ka 5.500 uranaih di 16 tinh, ban. Tal ini, danak dak hu peih ngak di 10 tinh.

Page ini, di bein bangu khu pho 4, phuong Thủ Dầu Một, Ban raya Ho Chi Minh peih danak dak “Kophi page haong rahra”, piah taom gaok, pang panuac khan, hatai caong di rahra bhum palei. Di var taom gaok hu rilo panuac hu ndom tagok ka dom kadha lagaih, gar tavak dalam luac jalan ngak bruk karja palei dua pakat, abih di nyu nan lac dom panuac ndom meyai hu lagaih piah paglaong siam lagaih ka bruk pathau khan, jak ba rahra. Bruk “Kophi page hoang rahra” hu peih ngak di yaok harei Angar, But saong Jip yaok adit, peih ngak di 40 khu pho di phuong saong dui atah tal bilan 10-2025.

Tinh Dong Thap daok samar chip pasiam dom labik glut jaleih trak di jalan huyen 34, ar gah Pur ribaong Nguyễn Tấn Thành, di takai tatua Kinh Sáng Cụt di puk palei Long Thạnh A, xa Long Hưng. Tui kuhria, labik glut jaleih hu atah labaih 30m saong praong labaih 5m – 6m. Di ini hu dom jalan, taong abih jalan glut jaleih trun ribaong ngak ka jalan mbak njauk neh rabha. Tok kuhria meng lime thun tal ini, di labik tinh rah tabiak 32 labik glut jaleih hu atah 1.300m, ngak jaleih sa baoh sang, 4 bilik sang pah saong ngak kan kandah tal raidiuk di rilo baoh sang rahra.

Di labik tinh Dong Nai rah tabiak 2 labik njauk asau maroi di xa Tân Lợi saong xa Lộc Quang (huyen Đồng Phú saong huyen Lộc Ninh, tinh Binh Phuoc klak). Dalam nan di xa Tân Lợi hu sa urang metai kayua njauk ruak meroi. Urak ini karja palei hu peih dom bruk klauk jru caga vaccine, caga ruak meroi ka dom labik mbuan njauk ruak meroi glaong. Min di 2 bhum palei, hu dom rahra daok oh caga ka bruk ini, daok palao asau tabiak jalan bo oh hu gavang pacang pabah asau. Dalam tuk nan, di labik rahra, uranaih biak rilo nan mbuan rah tabiak dom bruk asau kaik.

 Rajaei Han Quoc hu jalan kuhria pandar veik Kadung jien pambuak haong Trieu Tien ka dom danak dak siam mekre anit ranam di dua negar hu pasiam veik. Kadung jien ini hu padang meng thun 1991, piah daong pambuak kinh te jeng yau me-in pambuak di rahra saong ilamo di dua negar. Thun 2007, Kadung jien pambuak di dua negar hu tagok glaong abih lac labaih 317 trieu USD, min kuhria meng hadei lac trun rilo kayua dom danak dak hat nhan saong ten lua di Trieu Tien.

Dalam sa jalan nao bahrau piah kak kajap sarak urang negar langiu mai daok, My pathau khan brei ngak danak dak ngak iek dahlau pandar urang likau thị thưc jirah rivang atau ngak bruk di dom negar brei caik jien takai sa paok jien tagok tal 15.000USSD piah pacang cakak bruk abih tukvak brei adat dalam thị thực, sa asal kadha hu maong yau bruk ngak kan kandah tal an ninh negar. Paok jien ini hu bayar gilac tuk urang nao tabiak truh di My tuk abih tukvak brei adat dalam thị thực. Karei di nan, dom urang abih tukvak brei adat njauk lahaik paok jien nan.

Mbang pandiak khang oh ka tuk halei hu dui atah jaik 1 bilan di Japon daok ngak dom khat lahik trak. Urak ini dom urang brei tame sang iek ruak taong ruak samar chip kayua shock pandiak tagok tal jaik 35 ribau urang, dalam nan hu tal 36 urang metai saong 743 urang ruak trak. Rilo kavei danao pataom khik ia brei ka bruk daok dang mbang ngui saong bruk pala drak njauk thu abih, ngak ka bruk ngak nong njauk khat lahik trak.