Anak bruk tagok rilo urang njauk ruak Covid-19 di dalam bhum, tinh Gia Lai hu peih ngak rilo jalan langyah pacang caga jit ruak. Dalam bilan 5, gah y te tinh Gia Lai hu 4 urang njauk ruak Covid-19, ngak ka taong abih urang njauk ruak tagok 17 meng akaok thun tal ini. Anak bruk rah tabiak gilac di jit ruak, dom jabat y te hu tacei ba patagok bruk pasang iek njom anek ruak, khik kajap karo salamat ka kapul urang mbuan njauk ruak yau urang praong thun umo, urang kamei metian, urang hu ruak dalam rup dahlau. Gam haong nan, paglaong prein taong ruak meng bruk ba caik labik karei, jru ruak ka urang ruak Civid-19, plaih bruk njom mbak.

TPHCM birau padang Kapol ngak bruk chuyen trach kayua Akok UB bhap bini Ban raya HCM Nguyễn Văn Được pan kaok, piah peih bruk ngak tabung glong chap mek ndap ja, pablei salih dauk, bleik saleik saong ngak suan quyen so huu tri tue. Pho kaok UB bhap bini TPHCM Nguyễn Văn Dũng, gam lac Akok Mban tacei ba 389 TPHCM, ngak phaok Thuong truc. Bruk padang tabiak saong tame ngak bruk  di Kapol dac biet ini yau brei mboh bruk kham merat di urang ngak praong di TPHCM dalam bruk khik brei salamat adat hukum darak pasar, khik siam bruk ngak mbang  saong kein laba di  bhap bini.

Di tasik Hòn Tranh – sa dalam dom labik jirah rivang danei angan di kaoh pulao Phú Quý, tinh Binh Thuan brei hu padang danak dak ngak hacih sa-at ar tasik. Danak dak dui pacheih jaik 100 urang hu mbaok tame, dalam nan hu urang ngak di dom gah ngak mbang pablei salih, urang tacei ba gah jirah rivang, urang lambaok ka dom kapul saong rahra bhum palei. Dom urang hu pataom yaok pluh kadung hareik katak saong ngak hacih sa-at ar tasik... Huyen kaoh pulao Phú Quý di tinh Binh Thuan daok lac labik mai tal biak dui pacheih tuai damuai dalam dom thun jaik ini.

Page ini 30/5, Mban Tacei ba Pacang caga bala meng langik tasik saong Duah daong urang gaok bala tinh Hau Giang brei thau, di huyen Chau Thanh glut jaleih taneh, talah ar kraong. Bruk glut jaleih taneh, ar kraong  atah 35 m, lih tame ar kraong praong abih 10m, taneh lahik jaik 350 met vuong, kuhria khat lahik jaik 300 trieu dong. Hadei tuk taduan hu khaw tin nan, Mban tacei ba  Pacang caga bala meng langik tasik saong Duah daong urang gaok bala huyen Châu Thành jak ba hu urang saong radaih piah daong xã Phú Hữu, gam padang talaoh, paga pacang veik dom labik glut jaleih, brei ka bhap bini thau juai nao tal dom labik mbuan gaok bala.

Jabat Canh sat pasang iek Kong an tinh Dong Nai bahrau mek hu bruk ngak pandap ja lau lac khak drak di Kongti TNHH Pablei salih saong Yitvu Pablei tabiak blei tame An Phúc Khang, xa Hố Nai 3, huyen Trảng Bom. Di ini, kapul kong an duah mboh dalam sang xuong hu 6 janih khak drak. Pandap hu mek khik jaik 62 tan khak drak hu jeng ndap nda, 11.500 kadung khak di angaok kadung ndap nda hu akhar Han Quoc sambo bar hijao saong kanyik hu taong abih 230 tan khak pandap tamo saong rilo pandap nda hu pambuak karei…

Gah Y te Dunya (WHO) kakei lac dom janih ruak meda pacang caga hu mneg vaccine daok ngak jhak gilac veik di dom taneh ia Dong A saong Thai Binh Duong, dalam nan hu Philippines. Tui kuhria gah ruah di Mentri Y te, dom urang njom ruak soi - rubella di Philippines daok rilo veik, ini lac panuac kakei dahlau bruk praong lac taong abih uranaih brei klauk jru piah pacang caga ruak ka dom uranaih saong bhap bini.

Bol lin Thai Lan saong Campuchia harei kabroi (29/5) hu taom gaok, ngak bruk saong njauk gauk piah langyah dom mbang mesuh metak di tapen negar meng bruk sron mbon salamat. Tui nan, dua gah njauk gauk langyah bruk mesuh metak tapa bruk nyaom biai Uy mban tapen negar di dua negar (JBC), kuhria hu peih ngak dalam 2 - 3 adit anak tal. Ka dua, duah gah pagun sanya brei khik tani tanat bruk pasang iek, pasang khik tapen negar ka njauk piah patakik bruk mesuh metak. Ka klau lac dua gah brei khik tani tanat bruk pambuak gauk siam gheih tapa bruk ein sabe di gauk./.

Apui khuan glai pambak praong di Canada ba tal 2 bang di taneh ia ini brei ba tabiak bruk ngak ka drah samar, dalam tuk nan yaok pluh ribau urang njauk panduan ba nao labik karei. Dom ban di Mỹ meda gaok kan kandah tuk sauk/thak  kayua apui mbang glai  meng Canada par tapa. Tui Pasak pambuak gah pacang apui khuah glai Canada, urak ini hu labaih 160 mbang apui khuah glai di dalam negar saong meteh dom glai nan oh ka padam hu apui. Canada caga bruk pacang caga  apui khuah glai pakat negar tagok tanut glong abih./.