Tui Mentri Pato Megru, tal mon 17 tuk biar harei mesup kabroi 28/4, dalam taneh ia hu labaih 1 trieu anek saih tut angan pakacah hu jak jeng di angaok He thong pasang iek pakacah di Mentri. Dalam nan, anek saih bac tal 12 bac tui danak dak pato megru pho thong 2018 lac labaih 1 trieu 122 ribau saih bac; anek saih pakacah veik ye labaih 42 ribau adei. Mbang pakacah tamat trung hoc pho thong thun ini hu rah tabiak di harei 26 saong 27/6 anak tal. Anek saih ngak harak gar pakacah dalam biar harei mesup 25/6.

UB bhap bini tinh Dong Nai birau peih bruk pahadar 50 thun Harei peih paha gah Meraong negar, yasa taneh ia dalam praong prang. Di var pahadar, ong Vũ Hồng Văn, Bi thu Tinh uy Dong Nai khan lac, dalam rilo bruk mek hu jayak danei angan ngak jeng Chien dich Ho Chi Minh sajarah dakrai, hu Chien dich Xuan Loc meng harei 9 tal harei 21/4/1975, taong tayak pambang tavak pasei” di kol khamang piah bol lin drei tame tapak Sai Gon. Mbiah tal ini, Dong Nai hu jeng pasak kong nghiep, jit vu, labik pambuak bruk ngak mbang pablei salih hu mkana praong, patagok samar hu angan dalam dom tinh akaok negar.

Di harei pahadar 50 thun Peih paha gah Meraong negar, yasa taneh ia, Ban raya Ho Chi Minh oh mek jien nduac radaih buyt dalam harei 30/4. Tui di nan, tuai damuai pandar 133 radaih buyt nduac dalam ban saong dom radaih buyt pambuak hoang dom tinh taphia brei oh mek jien harak ve saong jeng hu ginup kein lagaih yau bhian. Bruk oh mek jien harak ve daong brei kein lagaih ka rahra hu nao ba drei tame dom danak dak, jirah me-in ban raya dalam harei raya praong, gam pahadar veik dom sajarah meng kal di negar.

Piah khik brei salamat, siam mekre angaok jalan mbak duk ka bruk nao mai di bhap bini dalam tuk padeih harei roya 30/4 saong harei 1/5 saong tukvak hu rilo urang jirah rivang ma-in he thun 2025, Mban Khik caga salamat jalan mbak tinh Tien Giang  brei thau laik taka phone “ pandiak”  iew samar piah taduan dom panuac di bhap bini ka bruk kan kandah tuk nao mai angaok jalan mbak saong khik brei salamat siam mekre. Tui nan, bhap bini meda iew tame laik phone 02733873347; 02733871828; 0918117614 piah khan dom bruk kan kandah ka jalan mbak, meblah labik tapen jalan….dalam tuk padeih padei. 

Dalam bingun padeih padei raya 30/4 saong 1/5, langiu di 5 yau radaih apui Thống Nhất peih nduac yaok harei, gah jalan pasei daok peih nduac veik 2 mbang radaih apui SE9 dom harei 29, 30/4 meng Ha Noi tal Sai Gon. Abih di nyu nan lac, Taong kongti Jalan pasei Viet Nam brei peih nduac sa yau radaih apui hu angan “Radaih apui Thống Nhất” hu ngak thaik thaot karei, ndung bak inem yava di tukvak sajarah meng kal. “Radaih apui Thống Nhất” gam peih nduac dalam melam mesup 29/4, dalam nan radaih apui SE1 hu peih nduac meng ga Ha Noi saong SE4 paeih nduac meng ga Sai Gon; dua radaih apui hu gaok gauk tuk mon 12 kreh pandiak jala harei 30/4 di ga Da Nang.

Tong thong Mỹ Donald Trump caong khik hu mboh adat padeih abih cuh, cakak klaoh bruk mesruh metak di  Ukraine. Tui thu ky mbao chi Nha Trang, Tong thong My dak harei dak alah metah ka Tong thong Nga saong Tong thong Ukraina saong ong caong khin dua tong thong Nga saong Ukraina daok dala veik biai gauk piah brei padeih bruk kalin kan nan. Urak ini, Tong thong Mỹ Donald Trump duah jalan langyah piah brei padeih abih mesruh metak Nga saong Ukraine.

Kapul Houthi pathau khan 68 urang metai lahik dalam mbang taong tame di Mỹ tame sa pasak kareik urang panduan mai daok suan hukum di Yemen di melam mesup 27/4. Mbang taong tame daok ngak ka 47 urang njauk rambuas. Dahlau nan, Houthi pathau khan: dalam sa harei, bol lin peih par ahaok hu peih rilo mbang taong tame rilo tukvak karei gauk di Yemen, dalam nan hu ban ine Sanaa saong tinh Saada.

Muk Okagi Hayashi – lac urang taha umo abih di Nhat Ban birau plang kayua dang baoh hatai di page 26 bilan 4, umo 115 thun. Muk Okagi hu jeng urang kajap karo umo atah abih di Nhat Ban kuhria meng bilan 12 thun dahlau hadei tuk muk Tomiko Itooka plang lahik umo taha 116 thun. Hadei tuk muk Okagi plang, urang hu umo taha karo abih di Nhat Ban urak ini lac muk Mine Kondo, 114 thun, daok ban Kota di tỉnh Aichi. Muk Mine lac bhap bini  hu umo taha abih di tinh Aichi kuhria meng bilan 3 thun 2023 yaom lac umo thun taha min khik hu prein yawa karo kajap.