UB Bhap bini Ban Can Tho brei thau, hadei tuk pagam 3 bhum palei, brei hu jaik 7.700 urang jakar, cong chuc, vien chuc meng tinh Soc Trang saong Hau Giang mai Ban Can Tho ngak bruk di dom jabat, kapul dalam ban. Dom jabat, dom gah di Can Tho daok pambuak haong tinh Soc Trang saong tinh Hau Giang piah pasang iek, ramik, caga sang daok saong padang radaih raok ba kapul urang jakar cong chuc, vien chuc, urang ngak bruk pakat tinh hadei tuk pagam piah tani tanat bruk ngak, sahnang ngak bruk.

Harei raya Uranaih Ban raya Ho Chi Minh mbang ka 3 hu angan “Uranaih harei ini, dunya harei hadei” brei rah tabiak di Sang Uranaih Ban raya Ho Chi Minh meng harei 30/5 tal 1/6 anak tal. Tui gah padang, Harei raya hu peih ngak tui jalan “Bui sambai – Salamat – Siam lagaih”, ngan haong bruk pathau khan saong padang dom danak dak njauk haong rilo thun umo. Gah padang ngak ba tabiak jalan dui pachreih takik abih 10.000 mbang uranaih saong amaik ame ba drei tame, brei mboh bruk pmbak praong dalam rahra.

Meng ini tal 31/5 anak tal, Gilang lek taka so Nguyễn An Ninh pambuak haong Jalan tapuk Ban raya Ho Chi Minh peih bruk “Lan Meraong Negar – Inem rituh thun”. Labik parang yaih khan rilo janih lan karei hu angan di Meraong negar: lan Sai Gon, lan Cây Mai – Đề Ngạn, lan Biên Hòa, lan Lái Thiêu, lan Vĩnh Long saong lan An Giang. Yaok janih lan lac hu meng sajarah meng kal, meng ilamo di yaok bhum palei saong bruk ngak lan biak gheih karei. Meng tal men tal thaik thaot gheih mekre, dom ndap nda lan ini daok cang rahra njauk hatai, iek praong saong patui veik ngak hu hadah krah.

Sang iek ruak Da khoa Thống Nhất, tinh Dong nai bahrau hu 5 urang njauk jru mek, dalam nan hu 2 urang metai hu pasang iek mboh lac matai kayua medil njauk jru mek athak CO. Tui khau tin akaok meti, malam 25/5, sang iek ruak hu 5 urang ruak lac urang ngak bruk di Kongti Co phan Kiak men Phương Nam – labik di Dong Nai (di xa Tân An, huyen Vĩnh Cửu) dalam tuk njauk jru mek athak CO. Hadei tuk ba samar chip tame sang iek ruak, hu 3 urang daok medeih, dak harei dak siam jang saong daok patui veik taong ruak di sang iek ruak.

Sa ikan Ong praong gam gam rah tabiak di bhum tasik Cổ Thạch, huyen Tuy Phong, tinh Binh Thuan dalam dom harei tapa, gaok tuk mai ikan nao duah mbang taphia ar tasik ngak ka rahra di ini biak chreih chrai. Tui adat, urang nao tasik mboh ini lac sa bruk siam, brei mboh sa bilan nao tasik hu rilo ikan hadang. Dalam dom harei tapa, bruk ikan Ong mai tal bhum tasik ini hu dui pachreih bruk caik hatai sangka di bhap bini urang nao tasik. Abih di nyu nan lac, page harei 24/5, sa urang nao tasik jaik ar hi mboh ikan Ong luai taphia ar tasik, pagui mbang dom ikan sit jaik taphia ar.

Tong thong My Donald Trump oh njauk hatai ka Vladimir Putin kayua Nga patui veik peih dom mbang taong tame Ukraine. Ndom meyai haong bao gioi, Tong thong Trump brei thau dom gah daok dalam bruk ndom meyai saong Nga patui veik cuh ten lua tame ban ine Kiev saong dom ban karei di Ukraine. Gioi chuc Ukraine brei thau, harei 25/5, Nga taong tame Ukraine meng 69 ten lua saong jaik 300 ahaok oh hu urang peih par, ngak takik abih 12 urang metai, yaok pluh urang njauk rambuas.

Ung cu vien Tong thong di ndang Dan chu Han Quoc – ong Lee Jae-myung harei ini hu ndom lac, ong brei ngak pasiam bruk ndom meyai haong Trieu Tien, dalam nan hu jalan talei pandiak bol lin meyah hu tagok ngak Tong thong dalam harei 3/6 anak tal. Ong Lee Jae-myung jeng pagun sanya patagok bruk pambuak My – Han Quoc jeng sa “bruk pambuak ngak bruk taong abih”, gam haong nan langyah ka bruk ngan haong asal kadha sajarah saong taneh riya meng kal hu pambuak tal Japon, gam haong nan patagok bruk pambuak 3 gah My – Japon – Han.

Jien mek tame dom trieu dong yaok harei, gaok mai tagok tal yaok rituh trieu sa bilan, daok ngak ka bruk ruah tamekai jeng sa bruk bahrau duah hu jien di dom bhum palei di Trung Quoc. Ban sit Nam Vương Điếm daok di ban Hà Trạch, tinh Sơn Đông, gah Pur Trung Quoc, danei angan lac “bhum palei tamekai” paik hu yaok thun labaih 125.000 tan, yaom kaom labaih 370 trieu nhan dan te (labaih 1.300 ty dong Viet Nam).