Tui panuac pathau khan di Trung ương Đảng, Quoc hoi, Po ine negar, Rajaei negar Cong hoa xa hoi chu nghia Viet Nam, Uy ban Trung ương Mat tran Negar Viet Nam, Po ine negar dahlau diah Trần Đức Lương hadei tukvak ruak trak, yaom lac hu Ndang, Karja, dom gru jru, y bac si abih hatai daong iek ruak tani tanat, baoh sang sangka raong tui iek abih hatai, min kayua thun umo taha, ruak trak, ong plang lahik meng mon 22 tuk 51 minit, harei 20 bilan 5 di sang, abih umo 88 thun. Le vieng Po ine negar dahlau diah Trần Đức Lương hu peih ngak di Sang tang le Pakat negar, labik 5 jalan Trần Thánh Tông, Ban Hà Nội, meng mon 7 tuk harei 24.5 tal mon 7 tuk harei 25.5. Dalam dua harei ngak ndam padhi tui adat pakat negar, dom jabat, labik ngak bruk di karja, labik cong cong brei tuan hala dok meteh gang, brei padeih abih bruk mbang ma-in sambai.

Bhum taneran kraong Cuu Long lac sa labik pala padai rilo abih di negar. Thun ini, dalam bhum kham merat mek hu 24 trieu tan padai piah duh ka bruk pablei tabiak langiu negar. Tal ini hu labaih 1,5 trieu ha padai Dong xuan hu yuak blaoh, kuhria rah tapa yuak hu 7,2 tan/ha, yuak hu 10 trieu tan padai. Kuhria tal harei 10/6 anak tal brei trun pajaih piah pala abih di bilan ini, kham merat yuak padai dalam taong abih bilan pala hu 8,5 trieu tan. Urak ini, urang ngak nong hu pandar ilamo ky thuat pala, pasang iek siam jit ruak, daok huac kanda ka bala meng langik tasik.

Jabat chuc nang tinh Dak Lak meda brei pasang iek oh brei thau dahlau bruk ngak tabiak baoh durian di dom labik hu taka so taneh pala, taka so papaok piah khik baoh siam tamo dahlau tuk pablei tabiak negar langiu. Tinh Dak Lak hu 23 labik papaok, 68 labik hu taka so taneh pala hu Tong cuc Hai quan Trung Quoc  mbaoh harak, kuhria abih tih taneh pala hu labaih 2.520 ha. Bruk pasang iek samar dom janih halak halin palai kaik, oh brei pablei tabiak negar langiu. Tui nan daong bhap bini, doanh nghiep pasang iek samar jru Vàng O, jru Cadimi daok kandong  di baoh durian  atau dom janih baoh kayau karei hu tabiak negar langiu. 

Meng akaok thun tal ini, jabat chuc nang tinh Tien Giang duah mboh 4 bruk mbang jien, pambuak tal 8 urang. Gah pasang iek hu ngak 20 mbang pasang iek ka bruk ngak tui sarak, hukum dalam bruk pasang iek, pandar jien padai, drap ar, buh jien tame padang, taneh riya…Tapa nan duah mboh bruk ngak suan hukum ngan haong paok jien lac 5,6 ty dong. Daok bruk pasang iek ka bruk ini hu ngak 270 mbang, rilo meng lac gah noi vu, khau tin, truyen thong, khoa hoc saong kong nghe…duah mboh 43 kapul, menuac urang ngak suan hukum, taong bhat labaih 466 trieu dong…

Pambuak tal bruk hadom brah hu mbat angan “Một buội đỏ Hồng Dân – Angan danko" mboh karei, pablei di xã Hòa An, huyện Phụng Hiệp, tỉnh Hậu Giang, gah chuc nang daok cang pasang iek piah hu jalan langyah cambaic laic. Dahlau di nan kreh bilan 5, bhap bini  blei 4 mbao kadung brah di labik pablei brah mboh karei. Yaok mbao brah trak 25 kilo yaom pablei 365.000 dong. Tui bhap bini lac, tuk tram brah piah chrai tapung ngak ahar meng hu mboh tram brah dalam 30 minit, rilo asar brah  mbung tabiak hu labar. Cambat habit dreih yau asar lisei tahaneh tasak blaoh.

Dom urang Ukraina nao daok ti nan di chau Au hu labaih 6,3 trieu urang. Langiu di nan hu labaih meteh trieu urang Ukraina daok diuk rai di langiu chau Au. Dom urang Ukraina nao daok ti nan urak ini rilo abih daok di Duc, kuhria labaih 1,4 trieu urang, patui veik lac ba Lan hu jaik 1 trieu urang. Urak ini jeng daok labaih 10% urang Ukraina hu jalan sahneng nao tabiak negar kayua duh hatai ka an ninh saong kurang bruk ngak.

Tong thong My Donald Trump birau ini khan lac bruk ginum biai di Nga saong Ukraina meda hu peih ngak di Vatican, hu dom urang lambaok di My. Tui khaw tin, dom urang ngak praong di chau Au daok jhul khang dom bruk  ginum biai  piah brei padeih mesruh metak abih. Yau nan min, ong Trump cagar veik bruk ndem meyai yau nan, yaom lac dahlau di ini ong hu meyai bau tal dom baoh panuac nan tuk iew brei padeih cuh dalam 30 harei.

Urang ilamo di Jabat roh duah Gamaleya di Nga kakei dahlau ka virus kum menuk ada H5N1 daok jom mbak di mayao saong hadei nan pambak tapa urang menuac, mbuan rah tabiak jit ruak praong. Akaok bilan 5, dom urang roh duah di Dai hoc Maryland hu brei mboh bruk tagok rilo urang njom mbak ruak kum menuk ada di mayao raong di sang. Mayao bhian njauk ruak H5N1 kayua mbang menuk ada njauk ruak, dom ndap nda diuk atau ia tasau oh ka ngak hacih sa-at meng athur njauk ruak.