Page ini 27/5, labaih 100.000 anek saih bac tal 12 di dom sang bac THPT, sang bac giao duc thuong xuyen di Ban raya Ho Chi Minh hu mbaok tame mbang pakacah iek dahlau tamat THPT. Ini lac mbang pakacah daong ka anek saih ngak randap haong adat pakacah bahrau saong hu peih ngak tapak di yaok sang bac. Var page, anek saih pakacah mon Ngu van, biar harei pakacah mon Toan. Harei 28/5, dom anek saih brei pakacah dom mon ta-eng drei pilih ruah. Tui kuhria, mon Sap bahsa Anh dang akaok ka bruk anek saih tut angan dalam mbang pakacah tamat THPT thun ini di Ban raya Ho Chi Minh (hadei dua mon Toan saong Ngu van), hu labaih 49.300. Patui nan lac dom mon Vat ly, Hoa hoc.

Tui UB bhap bini tinh Binh Duong, dalam 5 bilan akok thun, gah chuc nang tinh ini pasang iek jaik 2.000 bruk pablei salih padauk, bleik saleik  bruk pablei salih  saong ndap ja, langyah 465 mbang ngak suan hukum, kak jien taong phat ka karja  ka labaih 18 ti dong. Dom bruk ngak suan ralo rah tabiak di pasak praong di tinh yau  Thuận An, Dĩ An saong Thủ Dầu Một. Rilo urang pambak tame  dom blah web ndien tu, mang xa hoi yau Facebook, Zalo, TikTok…jeng yau  dom jitvu jao bayar ndap kong nghe piah pablei ndap pakauk, ndap ja oh thau cambaic laic meng halei mai.

Tal ini, urang ngak nong tinh Hau Giang hu trun pajaih jaik 74.300ha padai He thu, tapa jaik 1.300ha dut haong bruk kuhria dahlau. Dalam nan, huyen Châu Thành A, hu 6.570ha padai He thu daok tathak, rilo hamu jaik hu urang ngak nong yuak. Jaik abih padai He thu dalam bhum tinh Hau Giang jeng daok patagok siam. Gah ngak nong pachreih urang ngak ong sangka bruk pacang caga ruak ka hala phun padai, ruak bingu phun padai saong ngak lahai hala, abih di nyu nan lac di dom hamu padai trun kapal pajaih, drak labaih khak ndam.

Tinh Soc Trang daok peih ngak rilo danak dak hu makna praong, hu yaom glong yau: Danak dak jalan peih drak samar Châu Đốc - Cần Thơ - Sóc Trăng tapa tinh atah 58 km, danak dak tatua  Đại Ngãi pambuak Sóc Trăng haong tỉnh Trà Vinh, danak dak jalan  Dong Tay di tinh, danak dak tatua, jalan Vành đai 2, ban Soc Trang, ar pacang  binek, brong pacang ia mbak, khik ia taba…Ralo danak dak daok peih ngak samar min jeng hu danak dak daok tavak brei peih taneh, kurang pandap ngak.

Harei ini 27/5, So Padang Ban raya Ho Chi Minh pathau khan, meng harei 7/6 anak tal, radaih patuh brei pakauk peih nduac di angaok jalan ba tame jalan peih samar Ban raya Ho cHi Minh – Long Thành – Dầu Giây, jalan meng canah An Phú tal jalan Võ Chí Công, tui di dua jalan. Ini lac jalan langyah hu ba tabiak piah khik kajap siam mekre, salamat jalan mbak di jalan ba tame jalan peih samar. Tui bruk neh rabha jalan, radaih patuh brei nduac tui jalan karei dalam nan hu:  jalan Võ Chí Công → jalan Nguyễn Duy Trinh → jalan Đỗ Xuân Hợp → jalan songh hanh gah hanuek jalan peih samar Ban raya Ho Chi Minh - Long Thành - Dầu Giây → jalan Mai Chí Thọ saong nao mai.

Han Quoc hu daong labaih 5 ti won sumu 3,65 trieu USD piah rik daong ka dom bruk kham merat di UNESCO piah khik ramik, yaih khan dom drap ar ilamo oh mboh meta di dunya. Han Quoc urak ini hu 23 drap ar hu dak Angan Drap ar ilamo phi vat the lambaok ka bhap bini di UNESCO, hu labik dang hadei Trung Quoc, Tho Nhi Ky, Phap. Ini lac mbang akok meti Han Quoc padang sa kadung jien karei piah ngak Danak dak di UNESCO pambuak tal drap ar phi vat the.

Labaih 57% dom quan di An Do – labik diuk rai di 76% taong abih rahra negar ini – urak ini daok gaok kan kandah biak glaong meng bruk pandiak biak khang. Dalam nan, labaih meteh dom quan di An Do daok dalam bhum mbuan gaok kan kandah di langik pandiak khang. Dom urang roh duah An Do hu patagok Chi so kan kandah di langik pandiak (HRI) ka 734 quan, pandar du lieu langik tasik dalam 40 thun (meng thun 1982 – 2022) saong thaik thaot ve tinh piah roh duah ka langik pandiak, pandar taneh, dom bhum ia saong phun hijao piah kakei dahlau ka rahra.

Tui yaok kuhria di Jabat chuc nang Thai Lan khan lac harei kabroi 26/5 brei mboh urang ruak COVID-19 di Thai Lan daok tamuh khang saong urak ini glong 10 mbang dut saong dom urang ruak kum. Ta-eng adit tapa, Thai Lan taduan jaik 55.000 mbang urang ruak COVID-19. Dalam nan, jaik 3.000 mbang urang taong ruak di sang saong hu 5 urang metai. Ralo urang ruak umo daok bac saong ngak bruk. Ban ine Bangkok daok patui bruk lac hu dom urang njom ruak COVID-19 birau rilo abih dalam thun./.