Tui Mentri Bangsa saong Agama, tal ini, dalam negar hu daong padang sang daok siam tani tanat ka labaih 208.000 baoh sang taik tahak. Dalam nan hu 9 bhum pakei oh daok baoh sang taik tahak lac Ha Noi, Hai Phong, Vinh Phuc, Quang Ninh, Thai Nguyen, Ba Ria – Vung Tau, Bac Ninh, Thai Nguyen saong Can Tho. Njauk caik hatai sangka, tinh Kien Giang hu salah blaoh bruk brei oh daok baoh sang taik tahak ka dom baoh sang kathaot, jaik kathaot saong patui veik daong sang daok ka urang hu ngak bruk katmang meng kal.

Page ini 28/4, di mbang nyaom ka 33 di Hoi dong bhap bini tinh Kien Giang mbang X, vaktu 2021 -2026 brei tapa sarak njauk hasa jalan yau gauk pagam tinh An Giang saong Kiên Giang, mek angan tinh An Giang, pasak chinh tri-hanh chinh di ban Rach Gia, tinh Kien Giang. Tui danak dak pagam tinh, bruk caik angan “ tinh An Giang” lac njauk gheih lagaih haong dom bruk sajarah dakrai, ini lac bhum taneh hu meng lavik mai, mbuan lac, mbuan kanal saong mbuan thau. Hadei tuk pagam xã, tinh Kien Giang hu 48 jabat karja pakat xã, dalam nan hu 41 xa, 4 phuong saong 3 dac khu. 

Yaom baoh li-u thu di dom tinh Bhum taneran kraong Cuu Long dalam nan hu tinh Ben Tre daok pablei hu yaom, ngan haong labaih 200.000 dong/pluh baoh. Ben Tre lac “labik pala li-u rilo abih” di bhum taneran kraong Cuu Long saong taneh ia, phun li-u jeng phun kong nghiep hu pala rilo saong hu rilo yaom kaom di tinh, daong jhul tagok kinh te bhum palei hu patagok. Ben Tre hu padang bhum pala li-u mek ndap nda tamo huu co praong abih, hu praong labaih 20.000ha, hu 133 lek taka so bhum pala piah pablei tabiak langiu negar. Urak ini Ben Tre hu labaih 40 ndap nda baoh li-u hu pablei tabiak tapa 100 negar, dalam nan hu dom darak pasar kan yau ye My, chau Au…

UB bhap bini Ban raya Ho Chi Minh bahrau hu harak tacei pato pambuak bruk peih parang iek mac kapal ahaok oh hu manuac peih dalam danak dak  Rija raya “ Ban sambo mau Ban raya angan Wa Ho”. Yau ye, bruk par 10.500 mac kapal ahaok oh hu manuac peih brei par  iek dahlau di harei 28/4 meng mon 20 tuk 30 tal mong 20 tuk 45. Tukvak par biak di harei 1 bilan 5, meng mon 20h30 – 20h45. Yau nan, melam 30 bilan 4, Ban raya Ho Chi Minh cuh phao binguk di 30 labik dalam nan hu 2 labik cuh tagok pakat glong lac di Tatua lubang ala ia kraong Sai Gon ( Ban Thủ Đức) saong Labik kalan hadar  urang lin liet si Bến Dược (xa Phú Mỹ Hưng, huyen Củ Chi).

Cuc Kaya glai saong Khik iek glai ba tabiak “kakei samar chip” ka bruk mbuan rah tabiak apui khuah glai di pakat biak kan kandah ngan haong 37 labik glai, pataom tame ilo abih di Gah Meraong negar saong bhum Tay Nguyen. Dom labik mbuan rah tabiak apui khuah glai pakat V di Gah Meraong negar, rilo meng lac di dom tinh di labik Tay Ninh, Dong Nai, Kien Giang, Soc Trang, Ca Mau saong Ba Ria – Vung Tau. Cuc gah ngak glai saong Pasang iek glai pandar dom bhum palei, dom po iek khik glai brei padang saong peih bruk ngak Jalan ngak pacang khik glai, jalan caga apui khuah, padam khuah samu tuk rah tabiak apui mbang glai.

Dalam 3 bilan akaok thun ini, Han Quoc hu jaik 5.900 mbang pachot pagat online tapa sap ndem, kuhria tagok tal labaih 310 ti won kuhria sumu jiak 217 trieu USD. Jalan pagat hu kol nyu pandar  lac iew bhap bini  pagam ung dung jhak tame phone tangin. Tapa nan dom ung dung nan, khau tin rup drei, tai khoan gilang pariak saong du lieu di urang njauk nyu klaik mek, hadei di nan dom kol nyu ngak ja dom rajakar karja piah iew urang payua jien kol nyu meblah abih.

Jabat Pacang caga Jru Phil My hu peih bruk taong tame kandauk dalam sa labik me-in jru phil di malam mesup di Colorado Springs, mek kareik labaih 100 urang panduan tame mai daok suan hukum. Dom urang ini njauk mek kareik saong mbuan njauk patrauk tabiak truh. Kapul chuc nang Mỹ jeng pataom khik hu rilo janih jru phil. 2 urang duas klak nduac dauk jeng njauk mek kereik tuk hu mbaok di labik ini.

Bol lin Pakistan pametai 54 urang patuh phao dalam melam 27/4, tuk kapol ini duah jalan tapa paga pacang negar Afghanistan piah tame Pakistan. Dom urang tinh bao khan lac dom urang nan hu kapol Rajaei Pakistan iew lac "Khwarij", panuac nan piah ndem tal bol lin Taliban di Pakistan. Dalam dom bilan jaik ini, Pakistan mboh bruk pametai, patuh phao rilo jang, ralo lac bol lin Taliban di Pakistan.