Mentri Noi vu kuhria brei ba tagok Rajaei Sarak ka bruk ramik jabat karja pakat tinh, pakat xa dahlau harei 6.5 piah ba tagok Quoc hoi, Uy mban Thuong vu Quoc hoi maong iek, brei tapa. Ngan haong 11 bhum palei oh ngak bruk ramik jabat karja pakat tinh, Mban Pato Tacei ramik jabat karja dom pakat saong padang bruk padang ngak karja palei 2 pakat di Rajaei pandar ngak salah blaoh samar drah jalan ngak, harak gar tui adat hukum, padang harak gar Sarak ramik jabat karja saong payua ka Mentri Noi vu dalam tukvak samar drah abih dahlau harei 1.5.

Pahadar 50 thun Harei Peih paha gah Meraong negar, yasa taneh ia, rilo bhum palei hu peih ngak dom bruk hu makna. Di Ban raya HCM parang iek thaot binguk ngan kadha “ Sai Gon meng kan saong harei ini” daok peih ngak di mblang radaih Metro Ben Thanh (jalan Metro ka 1). Parang iek hu parabha  duah labik. Labik akaok meti  ba urang iek tui dalikan dakrai sajarah di Ban raya HCM meng thun 1882 tal thun 2025. Labik kadua  hu padang veik kadha “Sai Gon meng kan saong harei ini” hu iek tapak. Mai rivang iek parang thaot bingu mbang ini yaok urang meda hu mong mboh  veik bruk cak rok patagok meng kan mai di bhum taneh Bai Gaor - Gia Định - Chợ Lớn saong hu thau ka bruk cakrok patagok salih birau di Ban raya HCM.

Di tinh Dong Nai daok peih ngak Festival Lam am. Bruk ngak lan Biên Hòa hu meng 300 thun dahlau, pagam haong jalan padang bhum taneh gah Meraong negar. Kayua nan Festival ini lac sa bingun piah pok meyaom yaom kaom meng kal, pahadar dom rairah nghe nhan saong lac sa talei pambuak piah ka lan am Biên Hòa hu pablei tabiak rilo labik jang. Gam hoang nan, ini jeng lac bingun piah Dong Nai pambak ilamo tal yut cuai sahabat dalam saong langiu negar.

Di Labik Inem krung mesruh metak glai tràm Bang Biện Phú saong Kalan kakuh  Anh hùng liet si, huyen Vĩnh Thuận, tinh Kien Giang daok hu parang iek 300 thaot binguk, harak gal ka bruk “ Sajarah dakrai dak padang saong patagok tinh Kien Giang tapa thaot binguk, harak gal khik piah”. Parang iek rik tame pato pakai ka urang jakar, urang bol lin, abih di nyu lac dom rairah, oh padeih patagok hatung hatai anit ranam taneh ia, kham merat dak padang bhum palei, negar siam mekre.

Bingun padeih padei raya 30.4 saong 1.5 anak tal, kuhria radaih hu peih nduac di angaok tatua Rạch Miễu yaok harei brei tagok 27.000 – 30.000 mbang, nan bruk bruk mbuan gar jalan di angaok jalan Quoc lo 60 lac biak praong. Kayua nan Kongti TNHH BOT tatua Rạch Miễu brei ramik radak kapul pasang iek, pacang khik tatua 24/24 piah sumu langyah samar drah dom bruk ganuh gauk, radaih gaok kan kandah. Canh sat jalan mbak 2 tinh ben Tre saong Tien Giang jeng hu padang jalan pambuak pasiam, neh rabha jalan mbak nao tapa tatua Rạch Miễu.

An Do saong Pakistan daok kan kandah gauk catang tagok hadei mbang patuh phao tame Kashmir bo An Do ndem puac lac dom urang khung bo hu jabat ngak bruk di Pakistan ngak. An Do brei thau lac padeih Hiep uoc Thuy loi Indus. Ba tabiak bruk nan ngak yaok trieu urang ngak nong di Pakistan huac lahik halau ia pruh ka phun pala. Hiep uoc Thuy loi Indus thun 1960 - nan lac ba ia pruh ka 80% taneh pala drak di Pakistan - urak ini An Do brei padeih kayua Pakistan tui kol khung bo rilo taneh ia.

Meng ini tal harei 6/5, rilo labik di Thai Lan hu pandiak khang, kuhria pandiak tagok tal labaih 42°C. Kayua yau nan ye Mentri Y te Thai Lan pandar rahra patakik tabiak langiu langik dalam dom tukvak pandiak catang. Meng thun 2019-2024 hu 212 urang metai kayua mebuk pandiak. Jaik abih dom urang nan lac urang likei dalam umo meng 41 thun tal 60 thun, bhian hu dom asal kadha ngak tamuh ruak yau ye hu njauk ruak meng dahlau, ngak bruk langiu langik atau menyum alak.

Piah thau lac ia hani danko ja, dom urang ilamo di Kong ty Sinsoma di Ao hu pandar jalan dut iek AND hani danko. Bruk nan oh lac piah hu thau tani tanat jang ka dom asar dalam ia hani danko bo daok piah ngak brei cambaic laic  ia hani danko hu hlai hagiat tame ha-oh. Tui dom urang roh duah, ia hani danko hu rilo inem di AND. Yau nan ye, tuk hu sa mau ia hani danko  kurang inem AND atau hu mboh AND meng btah atau tangei ye thau lac ia danko nan ngak ja./.