Mban Tuyen giao saong Dan van pakat negar pambuak haong Thanh uy TPHCM peih bruk Parang iek thaot binguk “ Jayak praong bilan Pataih 1975 haong jaman patagok birau di bangsa Viet Nam” saong parang iek “Hadah mbaok meta taneh hu tame sa baoh negar”. Di labik parang iek, hu labaih 200 thaot binguk hu parang iek bruk mesruh metak khang kadang, oh huac hagait, rambah rambeip var klak rup di bol lin saong bhap bini drei dalam bruk mesruh metak pacang kol My, daong taneh ia. Tapa nan, patoa veik  ka dom rairah hadei kadha bac megru ka hatung hatai  anit ranam taneh ia, akaok sahaneng hatai kham merat patagok, patui veik jalan mesruh metah anh hùng, bruk jum pataom saong hatai jia tame jayak di dom rai ong ong, wa wa, cei gauk jaman dahlau.

UB bhap bini tinh Tien Giang peih nyaom biai brei buh phieu likau taduan angan tinh ngak salah bruk padang palei pala birau thun 2024. Urak ini, Tien Giang hu taong abih 135 xã mek hu tanut chuan palei pala birau, taong abih pakat huyen ngak hu salah bruk padang ngak palei pala birau. Tinh padang 135 pasak Ilamo - padhih the thao pakat xa saong 397 sang ilamo palei, yaok sa xã  hu takik di nyu 5 kalup kapol padhih the thao hu peih ngak yaok  bilan.

Tinh Tra Vinh brei thau ngak hu salah bruk daong sang daok dalam “ Danak dak ngak brei abih baoh sang oh daok taik tahak”. Meng thun 2021 mbiah tal thun 2024, tinh Tra Vinh ja  ba hu labaih 492 ty dong piah daong ngak sang birau, ramik pasiam  sang daok labaih 6.100 baoh sang kan kandah. Thun ini, brei patui bruk daong pandang ngak veik jaik 3 ribau  baoh sang, kuhria abih tih jien buh tame labaih 140 ti dong. Langiu di nan, tinh Trà Vinh daok padang ngak birau, pasiam ramik veik ka urang hu buh prein ngak bruk cach mang, gauk gar baoh sang di urang liet si saong baoh sang urang bangsa takik.

Tinh Dong Nai saong Binh Phuoc daok kuhria ba tabiak jalan pagam dua tinh ini tame gauk. Di Dong Nai hu 159 don vi hanh chinh pakat xa. Tui jalan ramik pagam, tinh daok 55 xã, phuong. Binh Phuoc, urak ini hu 111 don vi karja pakat xã. Hadei tuk ramik pagam, daok 40 don vi karja pakat xa. UB bhap bini tinh Dong Nai daok pasang iek sang daok xa hoi, sang daok ka urang jakar, piah hu ginup labik daok ka urang jakar, urang ngak bruk mai meng Binh Phuoc ngak bruk di tinh Dong Nai.

Tinh Bac Lieu birau ngak hu blaoh Danak dak parang iek ndap nda ngak pagheih ka Gilang khik piah drap ar tong hop tinh Bac Lieu dalam dom danaok di Sang adaoh Cao Văn Lầu. Danak dak pabak hu bruk ngak di Gilang khik piah birau birang hu pandar kong nghe tame ngak hieu ung biak mekre, hu maong iek saong langyah biak mbuan thau, dom labik nan hu ngak brei hatai druat druai  urang mai mong iek piah duah thau, bac megru, rivang ma-in…Danak dak nan hu ba tame pandar hu makna biak praong njauk tame tuk pahadar 50 thun harei peih paha gah Meraong negar, yasa taneh ia.

Mentri Ngak nong Indonesia brei thau brah hu pabak tagok rilo labaih 3 trieu tan, piah caga dalam negar. Tui nan, njauk brei kuhria meyah bruk caong khin hu brah piah mbang di rahra dalam negar, jeng yau caga bruk kan kandah kayua langik oh lagaih ba tal bruk ngak tabiak padai brah  pakat negar gaok khat lahik. Indonesia daok ngak njauk piah pabak kaya mbang padai brah, khik hu ginup brah padai ka negar dalam tuk dunya dak harei dak rilo cuang kandah.

An Do oh brei adat ngak dom bruk mboh karei saong payua ndap nda meng taneh ia drei tapa dom negar karei di dunya. Yaom lac yau nan min An Do oh ndem tal taneh ia halei, min dom khau tin kayua mai memg dom bruk ba tabiak di taneh ia My. Dahlau di nan, My khan lac brei duah dom gah pambuak bruk ngak mbang pablei salih piah pajeng payua ndap nda mai meng dom taneh ia karei.

Dom urang roh duah di Peru duah mboh atau talang di urang kumei hu meng 5.000 thun dahlau. Talang atau urang nan lac urang kaya meda di jaman ilamo Caral meng kal klak. Bruk ini hu duah mboh bo tui dom urang roh duah lac hu makna biak praong di urang kumei daok di ban Caral dahlau di ini labaih 5 ribau thun./.