Malam kabroi 28/5, di huyen tapen negar Ia Grai, tinh Gia Lai, Mban pathau khan saong Jak ba Ban uy Ban raya Ho Chi Minh pambuak haong Tinh uy Gia Lai padang danak dak adaoh tamia saong alin pandap ka dom baoh sang mbang tui sarak, rahra saong bol lin. Danak dak hu ba mai rilo kadha adaoh tamia siam gheih, pok meyaom taneh ia, katmang saong Chu tich Ho Chi Minh, ngan haong bruk hu mbaok di dom nghe si danei angan yau ye NSND Thanh Thúy, NSND Tạ Minh Tâm, NSND Trọng Phúc. Malam adaoh tamia ini daok sameng sap kong caing saong dom kadha tamia xoang bhap bini kayua dom urang nghe nhan huyen Ia Grai parang iek, ngak jeng sa labik ilamo siam gheih ndung bak ilamo Tay Nguyen.

Mbiah tal ini, tinh Dong Nai hu padang ngak 199 dalam taong abih 246 baoh sang taik tayak, hu ngak blaoh saong jao ka brei ka urang 152 dalam 199 hu padang ngak, sumu 76% kuhria abih tih labaih 10 ti dong. Tỉnh jak ba urang rik jien tame daong ngak brei abih baoh sang taik tahak, kuhria tui jien labaih 83 ti dong. Ong Võ Tấn Đức, Akok UB bhap bini tỉnh Dong Nai khan lac, tỉnh patui veik bruk ngak brei abih baoh sang oh daok taik tahak mbang ka 2 hu 191 baoh sang; Pasang iek tacei pato lang talaih dom kan kandah, daong ngak salah harak gal ka dom baoh sang  daok tavak tavaiy ka taneh riya hu ba tame daok dahlau harei 20 bilan 5 anak tal.

Thuong truc Tinh uy Ben tre bahrau ba tabiak saong jao bruk ka urang jakar. Tui nan, meng 1/6 anak tal, rilo urang jakar hu makna di tinh Ben Tre hu padeih huu dahlau thun umo daok ngak bruk dalam nan hu dom ong Uy vien Mban Thuong vu Tinh uy: Ong Nguyễn Văn Đức, Akaok Mban Padang ngak Tinh uy; ong Bùi Văn Bia, Akaok Mban Pathau khan saong Jak ba Tinh uy; ong Huỳnh Quang Triệu, Phaok Akaok Thuong truc HĐ Bhap bini tinh…Dom jabat hu rilo urang likau padeih bruk dahlau thun umo njauk padeih lac So Y te labaih 360 urang, So Pato Megru labaih 230 urang, So Ngak nong saong Alam langik 119 urang…

Tinh Tien Giang hu taneh pala durian praong abih dalam dom janih phun mbang baoh kaya bingi oh labik halei hu ngan haong 24.500 ha, brei baoh paik  labaih 458.000 tấn, dang akaok bhum taneran kraong Cuu Long. Piah pablei tabiak negar Trung Quoc, mbiah tal ini, gah ngak nong Tien Giang  hu daong po bein padang 320 taka so labik pala ka jaik 12.000 ha taneh pala durian, meblah 50% taneh pala phun. Tinh daok peih ngak 6 bruk di 2 huyen hu taneh pala durian praong lac huyen Cái Bè saong Cai Lậy piah daong urang ngak nong pablei tabiak phun brei baoh kaya bingi ini.

Jabat UB Bhap bini tinh Binh Phuoc harei kabroi brei thau, hu jao ka So Jien padai gam haong dom labik hu pambuak brei pasang iek gilac bruk meraik gauk dang ngak padang jalan peih samar Ban raya Ho Chi Minh – Thủ Dầu Một – Chơn Thành, jalan tapa tinh Binh Phuoc. Dahlau nan, UB Bhap bini tinh Binh Phuoc saong Mban Pasang iek danak dak Buh jien tame Padang tinh mek hu harak gar meng Kongti TNHH Kapul Sơn Hải ka bruk padang kapul pambuak bruk ngak haong po buh jien tame saong gah ieu da-a dom gah dang ngak mai taong yaom lac ka bruk dang ngak ini.

Tong thong Mỹ Donald Trump kakei dahlau Tong thong Nga Vladimir Putin daok jangan ma-in haong apui pambak tal bruk mesruh di Ukraine. Tui Tong thong Trump, Tong thong Putin caong khin mek abih Ukraine meyah bruk nan rah tabiak ba tal Nga metai. Dom panuac nan birau ndem ini di ong Trump brei mboh Tong thong My oh daok kadauk hatai caongkhin di drei ngan haong Tong thong Nga dom bruk pachreih ba di ong oh ngak brei salih karei.

Saudi Arabia saong Kuwait bahrau ba tabiak labik menyek bahrau di Labik rabha di dua negar hu kuac mek menyek rilo abih dalam dunya. Tui pathau khan di Saudi Arabia saong Kuwait, labik menyek hu labaih 500 thung menyek oh ka tapa halang yaok harei. Ini lac sa bruk duah mboh praong akaok meti kuhria meng thun 2020 tuk dua negar pambuak gilac bruk ngak mbang di labik ini. Kuwait urak ini hu jalan ngak buh jien tame tal 50 ty USD piah paglaong bruk ngak menyek tapa 3 trieu thung yaok harei./.

Langen lac sa ban sit daok gah Merong Frankfurt, lac labik akok meti di Duc bo urang nao ngak bruk hu ndik radaih peih ta-eng angaok dom jalan cong cong. Bhap bini brei thau labik taduan saong labik padeih, radaih meda taduan raok – lac bruk karei birau abih  di dom radaih peih eng. Meyah ngak tui njauk bruk ba tabiak, tuai damuai meda nao mai meng dom radaih peih ta-eng ini di Darmstadt jaik nan meda hu ba tame pandar di puac thun ini./.