323 baoh sang di dom urang kathaot, jaik kathaot, baoh sang hu raidiuk kan kandah sang daok khut tayak di Ban raya HCM hu ngak salah blaoh, kuhria abih tih 23 ti 380 trieu dong, sumu 100%. Ban thuong vu UBMTTQ  Ban raya HCM taduan hu 25 ti 300 trieu dong jien piah daong ka urang ngak sang birau, pasiam veik sang daok mai meng Gilang pariak Karja - Dhar ngak bruk Bhum 2 saong dom gilang pariak di ban raya. Danak dak ngak  brei abih baoh sang oh daok taik tahak lac bruk ngak hu makna  piah pahadar 50 thun Harei Peih paha gah Meraong negar, yasa taneh ia (30/4/1975 - 30/4/2025)

Tinh Kien Giang hu padang ngak danak dak padang ngak tatua Giai phong 9 di ban Rạch Gía. Ini lac tatua pambuak 3 phuong: Vĩnh Thanh, Vĩnh Thông saong Vĩnh Hiệp, hu bhap bini rahra cang maong jaik 50 thun ini. Tatua Giaỉ phong 9 kuhria abih tih jien buh tame 870 ti dong meng kadung jien Karja. Njauk ndem tal lac thaik thaok tatua hu padang dreih yau “hala phun Gía” nan lac janih phun ndam gam haong bhum taneh Rạch Giá.

Tui yaok kuhria di tinh Đồng Nai, meda hu labaih 1.600 urang jakar, kong chuc di Bình Phước mai ngak bruk hadei tuk pagam tinh. Tỉnh Đồng Nai hu 2 danak dak piah pabak labik daok ka urang jakar, kong chuc meng Bình Phước mai ngak bruk. Ka sa lac 3 danak danak sang daok rahra daok peih ngak di Ban Bien Hoa praong hu abih tih 3.400 baoh sang. Ka dua lac tinh brei ramik pasiam veik labik ngak bruk jeng sang daok ka urang jakar anak meta.

Rilo brong pacang ia mbak tapen kraong di tinh Tiền Giang brei peih, pabak ia taba tame  mblang hamu. Tui jabat kuhria iek langik tasik, ia mbak di dom labik dut mboh angaok kraong Tiền  di tỉnh Tiền Giang dak harei dak trun. Anak bruk ia taba ndik hu lagaih, jaik abih dom jalan brong ba ia di ban Mỹ Tho, huyen Châu Thành, Cai Lậy saong brong ba ia Xuân Hòa (huyện Chợ Gạo)  daok peih ka ia tame, piah pruh ka yaok ribau ha taneh pala njam patam, phun mbang baoh saong takik bruk ia njom nerak. 

Anak bruk langik pandiak bhang dui atah, tinh Hau Giang daok parilo jalan pacang caga apui khuah, apui mbang glai. Kapol khik iek glai di tinh Hau Giang  saong urang jakar khik iek glai labik ngak bruk bhian pambuak haong urang taduan khik iek nao pasang iek, dut iek do am, ia ala glai.  Tinh peih ngak 50 mbang pathau khan ka labaih 420 mbang urang hu mbaok tame, pandar dom urang khik iek glai iek pataom ramik phun kayau thu druh hadei mek kayau tràm kayua mbuan ba tal pui mbang glai.

Toa thanh Vatican khan brei thau cambaic laic, Đức Giáo hoàng Phrancis plang lahik kayua dot quy glo akaok, khang drei jan saong dang baoh hatai. Dahlau di nan, Đức Giáo hoàng kan suak yawa, kayua ruak phoi. Melam  kabroi, di chuc  di Đức Giáo hoàng hu bac, dalam nan Đức Giáo hoàng caong khin dar di labik taneh Sang megik Đức Mẹ Cả. Tal mon 12 tuk kreh pandiak harei ini (tui tukvak Viet Nam), taong abih dom urang ngak praong di agama ini biai gauk ngak ndam metai ka Đức Giáo hoàng.

Yaom sa baoh sang chung cu birau di pasak Tokyo, Nhật Bản – lac sa dalam dom labik hu yaom taneh chiat abih di dunya daok tagok veik dalam tuk jien apah urang ngak saong jien blei pandap nda piah ngak sang tagok glong. Ini lac thun ka dua yaom sang chung cu di Tokyo tagok glong 100 trieu yen sa baoh  saong lac glong abih dalam 4 thun tapa. Bruk parilo urang negar langiu mai jirah rivang saong khin blei sang daok tani tanat kayua hu mesre jien laba lap lac dom bruk ba tal jien blei sang tagok glong.

Rajaei Indonesia daok peih ngak sumu gauk kong nghe pruh ia patak pataom  (IPHA) tame bruk pala drak. Pandar kong nghe tame jalan pruh ia nan oh lac ngak ka phun tamuh siam brei rilo baoh bo daok lac bruk palagaih jhul pakhang bruk ngak tabiak kaya mbang pabak ka bhap bini dalam taneh ia. Kong nghe pruh ia IPHA meda pacang hu ia ka dom labik pala drak, patak pataom hu 30% ia pandar, yuak hu padai rilo jang kuhria rah tapa hu 10,35 tấn sa hecta./.