Mentri Y te ba tabiak jalan kuhria kham ngak meng thun 2026-2030, taong abih bhap bini hu dut iek prein yawa  yaok thun sa mbang, hu padang so dut iek ruak dien tu piah tui iek prein yawa luac rai di rahra. Tui Thu truong Metri Y te Trần Văn Thuấn, kuhria rah tapa 100 trieu bhap bini, yaok mbang nao iek ruak abih 250.000 đồng, sumu 25.000 ti dong sa thun. Langiu di nan, kham merat taong bhap bini hu blei bao hiem y te; Peih praong bruk bruk taduan kein laba BHYT saong bhian hu bayar ka jitvu iek caga ruak, dut iek ruak aval saong taong ruak hu samar.

Lien ndoan Pablei salih saong Kong nghiep Viet Nam (VCCI) birau brei thau taka so meriak gauk pakat tinh thun 2024 (PCI 2024). Dalam nan, taka so PCI 2024 di TPHCM dang dhi 29, ka dhun trun 2 pakat dut saong thun 2023. Dalam 10 taka so di PCI di TPHCM, hu 3 taka so tagok dut saong thun 2023 lac bruk sami samar ngak bruk di karja, sarak daong doanh nghiep saong pato pasram urang ngak bruk. Dom taka so daok veik mboh trun.

Taneh hamu padai metai lahik kayua njom ia mbak labik tapen jalan peih drah samar Cần Thơ - Cà Mau, Mentri Ngak nong saong Moi truong caong khin  UBND tinh Hau Giang brei tacei pato rahra peih ngak dom jalan rao hacih ia mbak. Tui nan caong khin tinh brei samar ngak piah pala drak gilac veik taneh hamu padai njom ia mbak; dalam  tuk rao tathuak ia mbak, oh brei ia mbak sre tame hamu padai atau taneh pala phun karei.

Dom harei tapa di dom tinh, ban dalam bhum taneran kraong Cuu Long yaom durian trun min kan duah labik pablei, ba tal rilo po bein ba tabiak pablei rah tui tapen jalan. Di Ban Can Tho, tuk ini, rilo bein durian daok brei paik rilo baoh tathak. Yau nan min, dut saong thun 2024, bruk pablei saong yaom kaom luac thun hu po bein taong yaom lac kan pablei jang. Tui mikva pala durian, thun ini, durian brei baoh praong siam, rilo baoh min kan duah labik pablei. Durian Ri6 janih A yaom meng 50.000 tal 51.000 dong sa kilo, janih B  yaom 30.000 tal 31.000 dong sa kilo.

Tui Pasak Dut iek langik tasik pakat negar, gah Meraong negar  daok dalam tuk salih bilan ba tal langik salih karei, oh lagaih mbuan hu hangin khang, hajan, drum jakala, abih di nyu lac tuk biar harei sup. Harei langik pandiak meng 23 -34 do C, hu labik tagok tal 35 do C, pandiak dui atah  tal biar harei, sup melam hu hajan gam hangin, meda mbuan hu angan khang, hajan patau, jakala…Yau nan ye, mikva takik tabiak gah langiu tuk langik pandiak catang meng mon 12 tuk - 16 tuk biar harei.

Tong thong My Donald Trump saong Tong thu ky LHQ Antonio Guterres iew An Do saong Pakistan samar padeih dom bruk jhak hatai di gauk. Dahlau di nan page ini, takik abih hu 8 urang  metai sang 35 urang karei njauk rambuac  dalam dom taong ahaok par patuh phao di An Do tame dom labik di Pakistan. An Do peih 24 mbang ahaok patuh phao tame 6 labik di bhum taneh Pakistan saong bhum Kashmir kayua Pakistan khik iek. Bruk khan brei thau samar chip di dom sang iek ruak saong anak meta Pakistan brei pacang oh brei haok par tame langik bhum negar ini.

Philippines daok caga blaoh blai ka bruk palih ruah kreh vaktu di harei 12/5 anak tal. Tong tong Philippines Ferdinand Marcos brei thau ka harei palih ruah, lac harei raya praong brei padei ngak bruk piah rahra nao buh phieu palih ruah. Labaih 23 ribau urang di Jabat canh sat bhum ban ine taneh ia hu peih ngak piah khik kajap an ninh. Jabat  ngak tui hukum jeng hu peih ngak labaih 120.000 urang ngak bruk khik brei salamat labaih 37.000 pasak labik buh phieu dalam negar.

Harei ini, harei 7/5, Nyaom biai palih ruah kandauk Giao hoang birau di Giao hoi Kong giao Roma hu peih ngak di Vatican. Ini lac tukvak dom Urang ngak praong di agama yam tame daok kandauk - lac labik ngak adat, sahaneng saong ngak bruk tani tanat yaok harei dalam Ban Vatican. Dalam tuk buh phieu, dom urang ngak praong di agama oh brei taom gaok manuac gah langiu. Bruk buh phieu rah tabiak kandauk, min bruk yaok phieu brei mboh cambaic laic. Urak ini, dunya manuac sia cang mong tame labik tabung thak di Sang sampayang dalam ban Sistine, tuk thak patih par tagok lac tuk palih ruah hu Giao hoang birau./.