Brei panuac di var peih pakak Raya Phat dan Lien hiep quoc - Vesak 2025 rah tabiak page ini di Ban raya HCM, Po negar Lương Cường brei mboh: Đảng, Karja Viet Nam tuk halei jeng taong yaom glong saong ba mbuan lagaih  piah ka dom agama, dalam hu Phat giao hu ngak bruk agama tui njauk hukum karja, brei ngak njauk tui sarak iek praong gam khik brei tui hatai ka hukum agama di yaok urang jeng yau iek nan makna praong piah padang bruk jum pataom taong abih bangsa.  

Patui mbang nyaom 9, biar harei ini, Quoc hoi ginum biai ka danak dak Hukum Khoa hoc, kong nghe saong salih birau hadah krah; danak dak Hukum pasiam veik, pabak dom asar kadha di Hukum Ndap nda siam; danak dak Hukum Nang luong nguyen tu( pasiam veik). Dahlau di nan dalam page ini, ginum biai ka dom asar kadha daok sahaneng karei di gauk di du thao hukum gru pato, dom urang Quoc hoi mboh lac, njauk brei tabiak hukum ka bruk pato langiu sang bac, bac langiu, sarak daong ka dom gru pato hu lagaih njauk tui hukum jien bilan ngan haong gru pato. Langiu di nan, sarak daong gru pato di bhum kan kandah oh cambaic laic, jao ka karja palei ngak mbuan ba tal glong biar oh sumu gauk.

TPHCM ngak hu salah blaoh bruk padang ngak, pasiam veik hu taong abih 330 baoh sang abih taik tahak, kuhria abih jien labaih 23 ti 500 trieu dong. Langiu di nan, pachreih tui bruk pakacah “ Abih bhum palei dalam negar daong ngak brei abih baoh sang oh daok taik tahak tal thun 2025”, UBND TPHCM buh tabiak kadung jien thun 2025 piah daong jien ngak tui bruk ba tabiak abih baoh sang oh daok taik tahal ka dom tinh: Cà Mau, Kon Tum, Bến Tre saong Lào Cai, ngan haong 209 ti dong. Tukvak anak tal, TPHCM patui veik bruk pasang iek saong jak ba dom gah piah daong  ngak brei abih baoh sang oh daok taik tahak.

Bilan he pandiak lac tukvak jit ruak meruai tamuh tabiak, di rilo bhum palei, dom urang gaok athau, meyao kaik njauk ba nao klauk jru caga ruak rilo tagok njauk brei caik hatai. Di tinh Binh Thuan meng akaok thun tal ini, hu 4 urang metai kayua ruak meruai. Thun 2024, Binh Thuan hu 10 urang metai kayua ruak meruai. Jabat Y te kakei dahlau, Viet Nam daok rilo labik hu virus ruak meruai saong daok dang anak bruk mbuan athau ruak meruai kaik - ini lac ruak kan diuk tapa truh tuk nyu tamuh tagok.

Ia mbak di huyen Long Mỹ, tinh Hau Giang daok tagok rilo, hu labik mbak 7 angaok sa ribau. Gah chuc nang kakei, kayua njom ia mbak glong saong kan thau dahlau yau nan ye mikva pak ini njauk  brei hu jalan pacang caga dahlau, khik phun pala, kaya raong piah hu siam. Mikva njauk brei pruh ia ka phun pala saong ia pandar patak pataom. Daok dom xã gaok njom ia mbak ye brei drak pajaih padai He thu tuk langik hu hajan tani tanat.

Karja Tong thong Donald Trump khan lac yaok urang tame negar suan hukum brei taduan 1 ribau dola piah ramik tabiak truh ia Mỹ. Tui Mentri An Ninh negar Mỹ, paok jien ini daok biar jang jien patrauk urang tame negar suan hukum  dalam nan hu bruk chap mek, khik kareik saong patruak, kuhria abih jien nan tagok tal 17 ribau dola. 

Tui kuhria di Mentri Nội vụ Italy khan lac, dom urang tame negar Italia tapa jalan tasik thun ini lac 6.400, tagok 35% dut saong tukvak ini thun dahlau. Ini lac bruk haduh hatai hadei trun takik dalam klau bilan akaok thun ini. Njauk caik hatai lac, dalam harei 1 bilan 5, kaoh pulao Lampedusa hu biak ralo abih lac 770 urang tame mai. Bruk rah tabiak yau nan njauk ndem tal dom sarak pacang khik bruk panduan salih labik daok di cu bo Rajaei Italia birau ba tabiak dahlau di ini dua adit.

Bruk rik daong bo Duc Giao hoang Francis hu ngak dahlau tuk palang lahik  brei khan tabiak di harei kabroi 5/5. Tui nan, Giao hoang Francis alin veik sa dalam dom sruh radaih di ong piah ngak radaih iek ruak ka uranaih di Gaza. Radaih nan yau brei mboh bruk anit ranam, bruk sangka saong mbuan mbiah bo Duc Giao hoang khin daong ka dom urang mbuan gaok kan kandah./.