Mbang nyaom ka 9, QH mbang 15 peih pakak page ini di Ha Noi. Tui danak dak Mbang nyaom, Quoc hoi kuhria ngak bruk tamat di harei 30 bilan 6. Di mbang nyaom ini Quoc hoi brei langyah, ramik pasiam, pabak veik dom asar kadha di Hukum negar thun 2013; pasang iek, brei tapa 34 hukum saong 11 sarak. Quoc hoi brei panuac  ka 6 danak dak hukum. Page ini, Quoc hoi ginum biai ka bruk: pasiam, pabak veik dom asar kadha di Hukum negar thun 2013 saong bruk padang UB roh duah tavak sarak dự thảo pasiam, pabak veik dom asar kadha di Hukum negar thun 2013. 

Tinh Hau Giang kham merat ngak brei salah hu taong abih oh daok baoh sang halei taik tahak dalam bilan 7 anak tal. Yau nan min, dom bhum palei  hu peih ngak cati catang kham brei salah blaoh dahlau di harei 19/5 anak tal piah uan raok bruk pahadar 135 thun Harei menek Chu tich Ho Chi Minh. Bruk ngak hu siam nan lac Hau Giang jak ba rahra rik daong hu jaik 11 ti dong, labaih 12.000 harei ngak bruk, piah daong dom po sang padang sang daok, ramik pasiam sang danaok.

Baoh la-u di dom tinh Tien Giang, Ben Tre daok tagaok yaom, kurang la-u piah pablei. Urak ini, baoh la-u that meng 150 -170 ribau dong yaok 12 baoh. La-u thu yaom meng 200 -210 ribau dong yaok 12 baoh. Ini  lac yaom glong abih kuhria meng dahlau mai tal ini. Yaom la-u tagok glong min phun la-u brei takik baoh kayua pandiak bhang njom ia mbak saong ruak halak halin palai pajua. Tinh Ben Tre saong Tien Giang hu labiah 100.000 ha bein la-u. Urak ini,  mboh la-u pablei hu jien ralo yau nan ye po bein iek glang, pruh jru halak piah khik phun la-u.

Ong Trần Đức Sơn, Akok UB bhap bini xã Mã Đà, huyen Vĩnh Cửu, tỉnh Đồng Nai khan lac, taphon limen glai 7 drei birau tame labik daok di bhap bini dalam xã. Meng akaok thun mbiah tal ini, hu labaih 30 baoh sang bhap bini gaok khat lahik kayua limen glai palai pajua phun pala. Dom bilan jaik ini, taphon limen  bhian  tabiak jalan ĐT 761 hu radaih peih nduac nao mai, mbuan rah tabiak bala angaok jalan mbak.  

Uy ban Salamat jalan mbak pakat negar khan lac, dalam 5 harei padei padei pakat negar rah tabiak 268 mbang bala angaok jalan mbak, hu 128 urang metai, 23 urang njauk rambuac. Gah Kong an jalan mbak langyah labaih 9.000 mbang urang menyum alak; pasang iek, duah mboh, langyah jaik 42 ribau mbang peih radaih suan hukum angaok jalan mbak; kak jien jaik 120 ti dong; khik 221 radaih oto; mek veik 1.300 blah harak adat peih radaih dom janih.

Rajaei Campuchia saong Mỹ daok caga ka bruk ginum biai tapak ka bruk pablei salih di dua negar jaik peih tabiak  di ban ine Washington D.C, di harei 14 -15 bilan 5 ini. Tui rilo urang roh duah, meyah bruk ginum di Campuchia saong Mỹ mek hu rilo bruk jak jeng, medil lac ndap nda kayua Campuchia ngak tabiak meda hu pablei di rilo darak pasar di negar Mỹ. Urak ini, bruk pambuak ngak tabiak ndap nda di Campuchia tagok gam gam, abih di nyu lac dom ndap nda yulit, khan ao, taghaok, radaih juah, baoh radaih saong dom kaya nong.

Rajaei Thai Lan daok jhul pakhang dom bruk ngak sarak adat piah brei tapa sarak hukum casino piah pachreih urang negar langiu buh jien tame ngak mbang saong duah bruk ngak. Jabat karja Thai Lan kuhria mboh, bruk patagok dom labik pambuak pagam labik ma-in sambai hu jitvu casino meda pachreih hu rilo tuai damuai mai Thai Lan meng 5% - 10%, duah jien tame meng 110 ti tal 230 ti Baht yaok thun (3,3 tỷ USD - 6,8 tỷ USD);  duah bruk ngak meng 9.000 - 15.000 bruk ngak birau.  

Dom mbang ribuk ia sua kreh bilan 4 tal ini ngak kan kandah tal labaih 45.000 rahra di Somalia. Ia tagok glong ba tal takik abih lac 4 urang metai. Ia ribuk sua ngak khut sang danaok, metai phun pala, di dom labik ngak nong praong abih di Somalia. Thun 2023, labaih 100 urang metai saong labaih 1 trieu urang brei panduan ba nao labik karei kayua ia ribuk biak trak kayua langik salih EI Nino ngak jhak./.