Patui danak dak mbang nyaom 9 di page ini harei 21/5, hu taong abih urang yer tangin njauk hatai, Quoc hoi brei katut veik tukvak ngak bruk di Quoc hoi mbang XV saong Hoi dong bhap bini dom pakat vaktu 2021 -2026. Quoc hoi mbang XV ba tabiak harei palih ruah urang ka Quoc hoi  mbang XVI saong urang lambaok di Hoi dong bhap bini dom pakat vaktu 2026-2031 lac harei Adit, harei 15-3-2026. Mbang nyaom ka sa di Quoc hoi mbang XVI iew pataom suai atah abih lac 60 harei, kuhria meng harei palih ruah. Mbang nyaom ka sa di Hoi dong bhap bini vaktu 2026-2031 hu iew pataom suai atah abih lac 45 harei, kuhria meng harei palih ruah.

HĐ Bhap bini saong UB bhap bini tinh Hau Giang peih nyaom pataom urang jakar, kong chuc, vien chuc saong urang ngak piah duah thau hatai caong khin ka bruk dak ramik dom pakat chinh tri. Dom panuac caong khin ka sarak, bruk ngak, labik ngak bruk jeng yau raidiuk di urang ngak bruk hadei tuk ramik. Kadha hu rilo urang sangka caik hatai nan lac, caong khin So Pato megru Hậu Giang saong Ban Cần Thơ daong bruk salih sang bac, palih ruah tame sang bac chuyen, pakacah tagok pakat bac, tut angan tame bac ka dom anek bik di dom urang kong chuc, vien chuc panduan mai ngak bruk di Can Tho. Tui nan brei hu labik daok veik bac, hu lagaih dalam bruk mbang huak ndih daok ka anek saih pakat tieu hoc.

Tapa pasang iek, di ban Tay Ninh, tinh Tay Ninh hu 62 baoh sang urang hu ngak bruk daong taneh ia, baoh sang kathaot hu padang birau, ramik pasiam veik. Abih di nyu nan lac, dalam dom po sang caong khin padang ngak sang birau ye hu 34 baoh sang oh hu taneh padang sang. Kuhria abih tih jien ngak sang birau, pasiam veik sang danaok 62 baoh sang kuhria mboh jaik 5 ti 800 trieu dong. Hadei tukvak kham merat peih ngak catang, Danak dak hu ngak salah saong jao brei ka dom po sang di puac bilan 4 meng blaoh.

UB bhap bini tinh Dong Nai birau padang ngak Danak dak sang daok rahra akaok meti di huyen Long Thành. Danak dak praong hu jaik 31.600 met vuong, hu 5 got sang praong hu labaih 600 baoh sang, labik pataom mbaok bhap bini, dom labik karei karei yau: labik caluai ia, mblang me-in ka anek naih, bein bingu, labik pasram rup pabhap langiu langik saong dom hatang karei…Tinh Dong Nai hu ba tabiak bruk kham ngak, meng thun 2025 -2030 brei ngak salah 20.800 baoh sang daok rahra, dalam thun ini brei ngak salah labaih 2.600 baoh sang…

Anak bruk jru ja, jru oh siam saong kaya jru pabak chuc nang oh thau meng halei mai sraw kadau, So Y te TPHCM daok pataom tame jhul khang bruk pasang iek, tui iek dom labik pablei jru tavao piah pacang cakak bru pablei jru ja, jru oh siam. Dalam thun 2024, gah y te TPHCM duah mboh 8 labik pablei jru ja, taong phat kuhria abih tih  hu labaih 7 ti dong.

Gah Barak negar Trung Quoc yam tapa mbang langik pandiak catang di ralo labik akaok meti dalam thun tuk pandiak tagok tal 40oC, hu labik pandiak di mbaok taneh tagok tal jaik 73oC. Jabat langik tasik Trung Quoc  khan lac, langik pandiak thun ini mai aval jang bhian thun, pandiak pambak praong saong catang. Po negar Trung Quoc Tập Cận Bình tacei ba dom jabat chuc nang pambuak bruk tani tanat piah pabak ginup ia pandar ka bhap bini saong ba ia pruh ka bruk ngak nong, dalam tuk nan hu dom bhum palei di taneh ia ini daok gaok tua riya kurang ia ralo.

Tong thong Mỹ Donald Trump ba tabiak bruk padang he thong pacang ten lua “ Golden Dome - Vom Ameh” hu yaom 175 ti dola. Ini lac bruk sahaneng ngak tabiak tui caong khin di Tong thong Trump padang tabiak dalam sa hukum mbaoh tangin meng bilan 1. He thong nan pacang hu ten lua tich hop, gam dom kong nghe birau di baoh taneh, angaok langik gam ala langik piah khik caga taong abih taneh ia Mỹ.

Dom taneh ia di Lien minh chau Au (EU) peih jalan ka bruk yak klak taong abih dom adat taong phat kinh te ngan haong Syri piah daong taneh ia ini pasiam veik. Dom ndai su 27 taneh ia di EU camereip hu njauk gauk ka bruk nan, tui kuhria mboh dahlau meda hu dom Ngoại trưởng dom taneh ia pathau khan aval. Bruk nan di EU hu ba tabiak hadei tuk Tong thong My Donald Trump brei thau di adit dahlau lac Washington brei atah klak dom adat hukum taong phạt Syria./.