Mentri Kong an bahrau alin 700 baoh sang ka urang kathaot, jaik kathaot gaok kan kandah ka sang daok di tinh Bac Lieu. Dalam dom thun tapa, Mentri Kong an hu jak ba saong pambuak haong dom bhum palei padang taong abih labaih 28.600 baoh sang, hu rilo labik bac saong sang bac hu buh tabiak labaih 1.400 ty dong. Meng akaok thun tal ini, Mentri Kong an daong 362 ty dong daong brei oh daok baoh sang taik tahak di 2 tinh Cao Bang, Gia Lai. Gam patui veik daong brei abih 4.400 baoh sang oh daok taik tahak, ngan haong jien buh tabiak labaih 280 ty dong ka dom baoh sang kathaot, baoh sang mbang tui sarak, urang bangsa takik dalam taneh ia.

Dalam tinh Tien Giang hu 587 baoh sang taik tahak njauk brei padang ngak, ramik pasiam veik, baoh sang dalam sarak karja, baoh sang kathaot, jaik kathaot. Tapa tukvak peih ngak mbiah tal ini, dom bhum palei hu pasiam veik, ngak blaoh saong brei ka mikva tame daok hu 486 baoh sang, daok veik 101 baoh sang tra kham merat ngak salah blaoh dahlau di harei 30 bilan 6 anak tal. Njauk ndem tal bruk hu UBMT negar tinh jak ba meng rilo gah karei di gauk, padang ngak saong alin 220 baoh sang Jum pataom ka urang baoh sang kathaot, jaik kathaot, kuhria abih tih jien buh tame labaih 11 tik 200 trieu dong.

Mban Thuong vu Ndang uy UB Bhap bini tinh Dong Thap bahrau meyaom ka 20 kapul saong 128 urang hu bruk naih gheih  dalam bruk bac megru saong ngak tui jalan, ilamo, bruk daok dang di Ho Chi Minh tukvak 2016 - 2025. Tapa 10 thun ngak bruk, di Dong Thap hu rah tabiak jalan ngak, danak dak kacah lagaih pagam haong bac megru saong ngak tui panuac pato di Wa Ho yau ye: “Kapul urang hu mbaok tame pacang, caga Covid-19”, “Pato ka bruk katmang, hatai anit ranam dalam y te, ilamo dalam y te, hatai takre bruk ngak ka anek saih, sinh vien tapa labik bhong maraih”, “Gru iek ruak abih tung tian, urang ruak haniem phol”…

Ban raya HCM kuhria ba tabiak jalan ngak brei salih labaih 400.000 sruh radaih patuh kong nghe tapa radaih ndien di bilan 7 anak tal, piah plaik njaik njom nerak yawa langik saong daong urang peih radaih patak pataom jien buh tame peih radaih. Tui ong Lê Thanh Hải, lambaok Vien Roh duah Patagok Ban raya HCM, pasang iek mboh urang peih radaih kong nghe peih pajeng tuai kuhria rah tapa labaih 100km sa harei, ngak bruk meng 8 tal 12 mon, ngak tathuak negar ralo. Yau nan ye, bruk salih tapa pandar radaih ndien rik tame ngak brei takik njom nerak biak ralo. 

Durian saong pa-aok blait lac dua janih phun hu pala rilo di tinh Gia Lai. Min, rilo bhum palei daok rah tabiakl bruk baoh durian druh rilo baoh meda, daok phun pa-aok blait ye lahik rilo, ngak kan kandah praong tal jien mek tame saong raidiuk di urang ngak nong. Tui dom urang ngak khoa hoc, bruk baoh durian druh saong lahik rilo lac bruk kakei brei mboh ka bruk langik salih karei saong dom kan kandah dalam bruk pala drak oh karo kajap dalam bruk ngak nong.

Rajaei Indonesia daok pakhang bruk pambuak haong dom jabat chuc nang di Thai Lan saong Campuchia piah pacang bruk pablei manuac, hadei dom urang Indonesia njauk urang pablei tapa dua taneh ia Đông Nam Á ini dak harei dak rilo. Indonesia mboh bruk pablei manuac tapa negar karei kuhria meng jit ruak COVID-19, tuk dom kol kanjiak jhak pambak praong tame dom bhum taneh ini piah pagat  yaok trieu urang khin hu jien daok duah bruk ngak.

Mentri Y te Cong cong Thai Lan daok pasang iek tantu ka janih ruak XEC di COVID-19, hadei tuk dom urang chuyen gia duah mboh chung ini mbuan njom mbak samar chip tagok 7 mbang ruak kum bilan. Janih ruak XEC di COVID-19 daok ngak mbuan pambak praong dalam rahra. COVID-19 jeng lac sa ruak njom mbak rah tabiak rilo abih di taong aboih dom thun umo. Tal ini, Thai Lan hu labaih 108.000 urang njauk ruak janih XEC saong 27 bruk metai lahik.

Rajaei Tong thong My Donald Trump brei mek veik sarak Danak dak Sinh vien saong Ndem meyai haong urang Tuai di Đại học Harvard, nan lac sarak brei adat  dom sang bac dai hoc brei palih ruah sinh vien negar langiu. Tui nan Akok Mentri An ninh negar Mỹ, dom anek saih negar langiu daok bac di sang urak ini brei salih sang bac piah klak lahik adat hukum brei ka drei. Thun bac 2024-2025, Đại học Harvard hu jaik 6.800 saih bac dunya, meblah labaih 27% kuhria taong abih saih bac di sang bac ini./.