Page ini, Quoc hoi ginum biai ka danak dak Hukum pasiam veik, pabak dom asar kadha di Hukum Palih ruah urang Quoc hoi saong urang di Hoi dong bhap bini. Dahlau di nan, di mbang ginum biai ka Danak dak Hukum (pasiam veik biar harei 20 bilan 5, rilo urang Quoc hoi brei mboh bruk sangka biak praong brei klak bruk phat tu hinh ngan haong 8 duis saong caong khin, brei kuhria iek veik klak jalan taong phat ini ngan haong dom urang duis nan, piah pato pakai, pacang caga, langyah saong caong khin brei khik caga, salamat xa hoi.

Tukvak tapa, khaw tin menek tabiak ka bruk baoh manuk ada ja di mang xa hoi ngak manuac sia duh hatai. Bruk nan ba tal baoh manuk saong bruk takik urang blei trun meng 10-20%. Rilo labik ngak mbang praong yau Ba Huân, V.Food mboh bruk ngak tabiak takik saong trun takik urang blei, baoh manuk ada laik yaom biar. Kapol nyaom Manuk ada Viet Nam mboh lac, khaw tin baoh manuk ada ja angaok mang xa hoi lac menek tabiak, tui nan pok panuac tagok jabat karja ngak brei cambaic laic dom urang ba khaw tin ja nan.

Harei kabroi 20/5, sa bruk glut  jaleih taneh trak atah 35met, dalam 6 met rah tabiak di huyen Thới Lai, ban Can Tho, ba tal sa baoh sang di bhap bini karam trun kraong ia. Anak bruk nan, huyen Thới Lai likau UB bhap bini ban Can Tho daong jien ka urang hu sang gkut jaleih piah ramik pasiam veik. Tui nan, likau ban Can Tho ba tabiak bruk pasang iek cambaic laic saong daong jien padang ngak ar pakajap di labik glut jaleih.

Pasak Kuhria dut iek mboh dahlau ka langik tasik pakat negar khan lac, meng ini tal puac bilan 5, njom ia mbak di bhum taneran kraong Cuu Long trun biar. Pathau khan dahlau bruk khat lahik kayua langik tasik njom ia mbak di Bhum taneran kraong Cuu Long pakat 1. Ia mbak njom tame dalam kraong, ribaong meda ngak kandah tal raidiuk bhap bini saong bruk pala drak di bhap bini bhum teneh ini. Dom bhum palei brei piah ia taba caga dahlau tuk ia trun piah hu ia pandar saong pala drak, tui nan pruh ia brei patak pataom khik phun pala.

Pasak Pasang iek ruak kik tinh Dong Nai birau hu sa urang metai kayua ruak soi akaok meti dalam thun ini. Nan lac kamuan angan K umo 6 thun, daok phuong Trung Dũng, Ban Biên Hòa. Dahlau di nan,  harei 21/4, kamuan K hu baoh sang ba tame Sang iek ruak Uranaih Dong Nai mboh ruak kan suak yawa, pandik takai, rup  pandiak. Harei 6 bilan 5, dut iek mboh ruak soi. Tal harei 12 bilan 5, uranaih ini ruak trak jang, gauk gar dalam sang likau ba nao sang saong plang lahik. Uranaih ini oh ka hu klauk jru vaccine soi saong patuh ho ga, uon van, bai liet, viem glo akaok laneh…

LHQ pathau khan hu 14.000 uranaih di Gaza meda dang anak bruk metai dalam 48 mon anak tal, meyah bruk daong ngak pahala oh hu samar sumu. Israel pacang taong abih dom bruk daong pajeng ndap nda gah langiu dải Gaza meng harei 2/3, piah ngak kateik greik  phong trao Hamas chap mek kareik manuac. Bruk taong phat nan  di Israel ba tal radiuk di jaik abih 2 trieu 3 rituh ribau bhap bini di Gaza dang anak bruk eik lipa biak trak.

Labaih 60.000 tan ndap mbang daong di Mỹ daok di “ metham ciew” dalam gilang pandap di My, châu Phi saong Trung Đông hadei karja Tong thong Mỹ Trump cakak trun jien daong di karja ka Jabat Patagok dunya My. Tui Hãng tin Reuters, ndap mbang nan kuhria tui jien tagok tal 98 trieu USD hu ba tabiak dahlau piah brei ka dom bhum eik lipa yau Gaza, Sudan saong Cộng hòa Dân chủ Congo. Yau nan min, bruk padeih dom sarak pambuak bruk pajeng ba ngak ndap mbang gal tavak, dalam nan hu labaih 500 tan ndap thu jaik abih tukvak pandar tal bilan 7.

Sa urang likei dam umo 25 thun negar Nhat Ban njauk ruak trak, iew lac “hoi chung kuk akaok”, kayua kuk akaok iek ndien thoai ralo tukvak. Tui pathau khan bruk kuk akaok suai lavik iek phone ba tal tamuh u brah lakuk takoi di sa-ai, ba tal sa-ai oh veik kaok tagok hu. Tapa nan, dom gru iek ruak kakei ka dom bruk kanjak jhak  kayua pandar ndien thoai ralo, abih di lac dam dara uranaih./.