Akok negar Quoc hoi Trần Thanh Mẫn tacei pato, meng harei ini, harei 6 bilan 5 thun 2025, meda peih bruk duah thau hatai sahaneng di bhap bini ka sarak du thao Sarak ramik pasiam, pabak dom asar kadha di Hukum negar thun 2013 saong dom harak tai lieu tui hukum nan. Langiu di nan, Akok Quoc hoi caong khin brei pandar ilamo kong nghe thong tin tame bruk duah thau bruk sahaneng  di bhap bini ka du thao Sarak pasiam, pabak dom asar kadha di Hukum negar thun 2013 tapa ung dung ndien tu VneID.

Page ini harei 6 bilan 5, di Hoc vien Phat giao Viet Nam, huyen Binh Chanh, TPHCM peih adat ngak pakak Raya Phat dan Lien hop quoc - Vesak 2025. Raya ini kayua UB peih ngak bruk pakat dunya Raya Phat dan Vesak Lien hop quoc (ICDV) saong Giao hoi Phat giao Viet Nam pambuak bruk peih ngak. Kadha di Vesak thun ini lac “Jum pataom saong hatai anit ranam manuac sia: Tue giac Phat giao caong khin Dunya salamat saong Cakrok patagok  khang kajap” nan lac kadha njauk brei ngak samar chip dahlau di abih, ndung bak makna saim gheih anit ranam, lagaih haong jaman ini bo agama Phat caong khin payua tal gauk manuac sia di dunya ini.

62 baoh sang ngak padai di xã Lương Nghĩa saong xã Lương Tâm, huyện Long Mỹ, tỉnh Hậu Giang metai yuak lahik padai, atau metai abih kuhria taneh khat lahik abih labaih 37 ha hu bayar jien labaih 940 trieu dong. Dahlau di nan mbao chi hu khan, rilo hamu padai bilan Đông Xuân 2024-2025 rah tapen labik padang ngak jalan peih drah samar Cần Thơ - Cà Mau tapa xã Lương Nghĩa metai, atau lahik padai oh bhian mboh. Hadei di nan, Mentri Ngak nong saong Moi truong tacei pato dom po thau pambuak haong karja palei samar pasang iek, kuhria saong bayar jien khat lahik ka bhap bini tui bruk ba tabiak.

UBND TP.HCM birau ba tabiak Danak dak ramik veik jabat karja pakat tinh, pagam  klau tinh tame nan lac Bà Rịa - Vũng Tàu, tỉnh Bình Dương saong TP.HCM. Hadei pagam tinh, klauk tinh, ban ini hu jeng sa pasak hanh chinh pakat tinh mek angan TPHCM, lac ban di Trung uong. TPHCM birau hu abih tih 168 don vi hanh chinh pakat xa, dalam nan hu 113 phuong, 54 xa saong 1 ndac khu. 

Pasak Kuhria mboh dahlau langik tasik pakat negar khan lac, meng harei ini, hu hangin Tay Nam, bhum taneh gah Meraong negar saong Tay Nguyen jiak tame bilan hajan. Yau nan min, kayua hangin Tay Nam daok cadu yau nan ye TPHCM saong Nam bo  harei langik pandiak catang, biar harei hu hajan, meda tal harei 12 bilan 5 hu hajan khang. Tal kreh bilan 5, gah Meraong negar yam tame bilan hajan. Bhap bini daok di bhum Meraong saong Tay Nguyen brei cara caga dahlau ia dauk kayua hajan kaok thun.

Campuchia hu 20.000 mbang urang ruak ung thu birau yaok thun saong labaih 14.000 urang metai yaok thun kayua ruak ini.Tui Akok mentri Y te Campuchia Chheang Ra, dom urang metai  kayua ruak ung thu tui kuhria mboh dalam 40 minit hu sa urang Campuchia metai kayua ruak ung thu, atau labaih 38 urang metai yaok harei. Meyah bruk nan oh hu salih karei, 210.000 urang grauk umo thun halei meda metai dalam 15 thun hadei.  

Brah khik piah di gilang negar  Indonesia hu labaih 3,5 trieu tan, glong abih dalam 57 thun tapa saong brah nan kayua negar ini ngak tabiak oh hu blei gah langiu tame. Kuhria meng tuk tagok rai tong thong meng bilan 10 thun blaoh, Tong thong Indonesia Prabowo Subianto caong khin Indonesia samar ngak tabiak brah pabah sumu bruk pandar pandap padai brah saong Indonesia hu jeng labik pablei brah ka dunya.

Hadei 9 harei caik tang kamram  Đức Giáo hoàng Francis, Toa thanh Vatican brei ginum biai piah palih ruah Giao hoang birau mbang ka 26 di harei paguh 7/5. Dalam dom harei tapa, dom urang ngak janvar  pagam dom ndap nda yau ye khan bai tauk ala sang, ging tahaneh mbang…tal kik kapan dang ngak hukum agama piah caga peih ngak adat. 133 ghe daok ngak meng kaya anh ndao hu sarak angan 133 urang Hong y tame ginum biai kandauk, hu caik tani tanat dalam Sang sampahyang Sistine, Vatican./.