Harei pataom Ao dhai TPHCM mbang 11 thun 2025 peih ngak meng harei ini tal harei 9/3 pachreih hu 53.000 urang hu mbaok tame angui cuk ao dhai ao kumei di ralo labik rivang ma-in yulit. Ngan haong kadha “Ao dhai Viet Nam - Uak drei patagok Viet Nam”, harei pataom yau brei mboh hadah mbaok meta bangsa, yau tatua pambuak ba Viet Nam tame haong dunya, gam rik tame bruk khik ramik saong patagok makna ilamo meng kan  di ao dhai. Harei pataom jeng lac tuk piah pahadar  1985 thun dang tagok mesruh metak di Hai Bà Trưng,115 thun Harei Dunya Urang kumei saong 50 thun Harei Peih paha gah Meraong negar, yasa taneh ia.         

Cagar veik yaom amraik kalu tagok glong, ye baoh durian karei bilan di dom po bein gah Pei negar trun meng 60 tal 70% dut haong tukvak ini thun dahlau. Urak ini, yaom durian tok daok dom pluh ribau dong sa kilo. Yaom durian trun lap kayua  hu dom kadha birau ba tabiak dalam bruk pasang iek di dom taneh ia blei tame ba tal bruk pablei tabiak  dang veik. Langiu di nan, lac bruk dom bhum palei pala dujrian mblak tui gauk. Tui kuhria mboh dahlau tal thun 2030, dalam negar hu labaih 65.000 - 75.000 ha durian. Yau nan min, mbiah tal ini taneh pala durian  tagok dua mbang dut haong bruk brei pala.

Di tinh Tiền Giang saong Bến Tre, bilan raong hadang akaok thun ini tagok ba tal urang raong hu jien mek tame ralo, jien laba yaok ty dong. Urak ini, yaom hadang takai patih saong hadang su janih 25 - 30 drei sa kilo, yaom meng 180 - 210.000 đồng, hadang prang 40 drei  sa kilo labaih 150.000 dong sa kilo, glong dua mbang dut saong tukvak ini thun dahlau. Tukvak tapa, hadang njauk jit ruak khat lahik trak ba tal takik hu hadang; dalam tuk nan bruk caong blei hadang dalam negar jeng yau langiu taneh ia ye ralo.

Bhum tapen negar tinh Dak Lak hu 38 palei, mbon hu labaih 42% bhap bini lac urang bangsa takik. Raidiuk di labik ini daok rilo kan kandah kayua langik pandiak catang, taneh riya thu lagu, jalan mbak kan kandah. Rilo baoh sang daok sang taik tahak khin hu bruk ba tangin gauk daong di bhap bini rahra. Thun 2024, Bol lin Bien phong tinh Dak Lak hu padang ngak 33 baoh sang, daong yaok ribau harei prein ngak bruk piah ngak abih baoh sang oh daok taik tahak, tani tanat raidiuk ka bhap bini di bhum tapen negar.

UB bhap bini ban raya Trà Vinh, tinh Trà Vinh alin brei harak meyaom ka 2 likei dam oh huac metai daong urang karei plaik bala mek xăng menyek cuh amaik pajeng drei. Bruk ngak biak gheih nan hu pambak praong hu tame “ Nyaom dom baoh sang  tame ngak bruk Pacang caga apui khuah, padam khuah” saong jak ba  bhap bini brei hu pandap padam khuah di labik daok. Dahlau di nan, harei 24/2, tuk mboh hu urang pandar xang tuh tagok rup amaik  piah cuh, sa-ai Nguyễn Duy Khang saong Bùi Lê Quốc Tài daok jaik nan  mek binh padam apui  mai padam, gam urang karei pacang urang nan  saong ba urang maik tame iek ruak chip.

Dom uranaih ndih tapui tabiak di Nhat Ban thun dahlau trun daok jaik 721 ribau mbang, biar abih  kuhria meng tuk Nhat Ban tavak harak angan kuman ndih tapui tabiak. Rilo baoh sang huac kandah ka jien raong anek rilo, pato padar anek bik biak rambah saong dak harei dak hu rilo urang palih ruah diukrai ta-eng atau suai tok diuk tok pasang. Mentri Y te  saong Phuc loi Nhat Ban daok kham merat  daong ba mbuan lagaih  ka dom dam dara duah hu jien glong jang, jeng yau brei klak rabha bruk raong anek bik gam ngak bruk piah urang mbuan tok diuk tok pasang.

Thun 2024, bhap bini di palei pala An Do caik rilo tukvak jang ka dom bruk bac da-a dut haong dom urang daok di ban taneh ia ini. Tui nan, tukvak piah bac megru di urang kumei pak taneh ia Nam Á ini oh salih karei, tok hu 84 minit. Dalam tuk nan, urang likei trun meng 102 minit daok 94 minit. Tapa nan brei mboh thun dahlau bhap bini di ban sit negar An Do caik 87 minit yaok harei piah bac megru, daok di bhum palei pala lac 90 minit.

Bang Queensland di Australia daok dang anak bruk kan kandah kayua vi khuan ala taneh gluh baok ngak tamuh jit ruak ba tal 14 urang metai, 94 urang njom ruak. Ruak Melioidosis, atau daok lac Whitmore, lac ruak pacang jru taong ruak oh bhian mboh, kayua dom vi khuan hu duah mboh dalam gluh baok, bhian mboh di dom bhum taneh pandiak hadei hajan praong atau ribuk ia sua./.