Mintri Công thương pambuak haong Sở pato magru Ban raya HCM hu jao jien bac brei ka 98 anek saih THCS matui kayua COVID-19. Ini lac dom anek saih matui sang kan kandah di dom quận, huyện saong Ban Thủ Đức. Yaok anek saih hu  daong 2 triệu sa bilan  mbiah tal tuk bac salah blaoh pakat bac trung học phổ thông. Langiu di nan, dom urang ngak pahla sanya peih bruk, rivang daong gam gam dom anek saih sang biak kan kandah. TPHCM hu labaih 20.000 urang metai kayua jit ruak COVID-19 caik viek labaih 2.000 ranaih matui. Kayua yau nan ye hu bruk sangka di dom pakat, dom gah meda daong ka dom adei trun manieng dom kan kandah di anak mata.

Canah jalan atah jaik 57 km nduac tapa  tỉnh Sóc Trăng, pambuak jalan  Quản Lộ - Phụng Hiệp song pabah lamnge  Trần Đề hu peih bruk padang ngak di mesup ni  21/1. Jalan peih tabiak meng ban sit  Ngã Năm, nao tapa huyện Mỹ Xuyên, Trần Đề song jhung jalan di ban sit  Vĩnh Châu. Jalan hu ngak prong  9 m, 2 jalan radaih Dalam abih tih phun jien, ye jien padang ngak abih  1.500 tỷ đồng;  bayar tái định cư labaih  220 tỷ đồng... Tui kuhria jalan hu ngak salah di thun  2025. Langiu di bruk jhul patagok kinh tế pak ni, jalan dok hu dong ka Sóc Trăng pambuak song Hậu Giang, Bạc Liêu, Cà Mau; nao mai labik pabah lamnge  Trần Đề song rilo danak dak điện hangin di ban sit Vĩnh Châu.     

  Sở Công Thương ban Cần Thơ pambuak haong Siêu thị GO! Cần Thơ peih mbang darak pandap panda Việt thun 2022.  Mbang darak hu peih tabiak meng harei 21/1 tal harei 23/1, ngan haong 14 gian hàng, labaih 50 pandap mek hu chuan salamat di VietGap, OCOP di dom doanh nghiệp, Hợp tác xã di dalam ban Cần Thơ saong tỉnh Hậu Giang. Ini jeng lac sa dalam dom bruk ngak piah daong ba gauk saong palagaih ka dom doanh nghiệp yaih khan dom pandap panda hu chất lượng tal tangin urang pandar ngan haong yaom tani tanat. Tapa nan, rik daong pachreih bruk blei pandar, ngak pasiam viek saong cak rok patagok kinh tế - xã hội hadei di jit ruak Covid-19.

  Piah lang talaih kan kandah ka bruk pablei thanh long, Sở Công thương tỉnh Bình Thuận hu harak payua Mintri Công thương song  sở công thương dom  tỉnh ieu dong pablei  thanh long song tamekai di  tỉnh ni. Meng ni mbiah tal bilan 3, tỉnh Bình Thuận hu jiak  237.000 tấn baoh thanh long song  300 tấn tamekai tal bilan paik boh.  Min, kayua bruk pablei tabiak negar langiu tapa dom jalan tapen negar, jalan sit, jalan prong di dom tỉnh gah brak gam gam gaok kan kandah, ngak ka yaom kaya nong, abih di nyu nan lac boh  thanh long gam gam trun beir.

Tukvak ini, urang nong di tỉnh Cà  Mau hu mek pablei blaoh hadang ginraong hijao raong pablak dalam hamu padai. Thun ini, langik tasik siam lagaih, hadang praong  siam, brei năng suất glaong nan ye urang raong biak bui sambai kayua hu laba. Cà Mau urak ini hu labaih 16.300ha padai pambuak haong raong hadang ginraong hijao, rilo abih lac di huyện Thới Bình. Tui jabat ngak nong saong patagok palei pala huyện Thới Bình, urak ini bruk pablei tabiak hadang ginraong hijao jeng khik hu tani tanat, meng hu Sở Công Thương tỉnh pambuak haong Pasak paachreih bruk buh jien tame saong daong doanh nghiệp pambuak gauk pablei tabiak dalam dom siêu thị di Ban raya HCM, Bình Dương, Ðồng Nai, Cần Thơ.

Urang brei panuac mintri  Ngoại giao Ai Cập ndom lac bruk cảnh sát Israel kateik greik 18 urang  Palestine, pateok urang tabiak truh boh sang di drei  di Sheikh Jarrah dalam harei  19/1 meng bloh  song yah klaak sang lac bruk ngak suan hukum dunya  song hukum  nhân đạo dunya. Ai Cập sa mbang tra hu panuac cagar veik sarak  định cư di Israel di dom bhum taneh  Palestine, meng bruk padang dom labik  dok bahrau  atau peih prong dom labik  daok urak ni, saong bruk mek taneh, ba urang  Palestine nao daok labik karei. Bhap bini dunya hu rilo mbang ieu Israel padeih bruk  kateik greik, yah klaak sang danaok di urang Palestine.

Dom jabat chức năng di Canada hu duah mboh 4 urang metai, dalam nan hu 1 uranaih, metai kayua langik biak laa dalam mbang ribuk tuyết, di labik atah di jalan tapen negar haong Mỹ 12m. Nhiệt độ di harei 19/1, lac tukvak duah mboh dom urang metai nan, lac ÂM 35 độ C. Dahlau di nan, gah biên phòng Mỹ hu cap mek sa kapul urang tapa negar suan hukum gam haong pandap panda di uranaih min oh hu ranaih nao gam, kayua yau nan ye gah biên phòng di 2 taneh ia peih bruk pasang iek roh duah. Quốc tịch di dom urang ini ka oh hu khan brei thau.

Salih ka bruk tong phạt yau mek veik harak adat peih radaih, phat jien, dom urang jakar di ban Cao Hùng, Đài Loan (Trung Quốc) pandar dom urang peih radaih dalam tuk mebuh alak  nao rami ramik sang ngak ndam metai piah mong mboh bruk jiak si metai yau habar . Urang jakar cong khin lac, tapa bruk ngak ni, bhap bini thau caik hatai jang piah khik salamat ka rup tuk peih radaih angaok jalan, iek prong raidiuk di urang karei, padeih bruk peih radaih tuk mebuh alak ./.

Urang lang: Thu Thảo & H.Pha – 22/1/2022