Page ini 18/12, Jabat Rayo sap ndem Viet Nam di TPHCM pahadar  20 thun Papar sap angaok riyak Danak dak Papar sap Cam di Rayo sap ndem Viet Nam. Dahlau di ini 20 thun, hu papar sap “ Danak dak papar sap Cam di Rayo sap ndem Viet Nam”. Dalam 20 thun tapa, Danak dak papar sap Cam hu blaoh saong daok pambuak atah ta bhap bini Cam; pambuak kajap haong mikva urang bangsa Cam dom tinh, ban meng Ninh Thuan, Binh Thuan, Binh Đinh, Phu Yen; tal Ban raya Ho Chi Minh, Binh Phuoc, Binh Duong; An Giang, Tay Ninh…pathau khan rilo asar kadha  sarak di Ndang, Karja, dom ilamo ky thuat…tal mikva, rik tame ka mikva bhap bini hu thau blaoh ngak tui Ndang saong kham merat yam tagok patruh iek patrun kathaot piah raidiuk dak harei dak siam tagok.

Nyaom biai Mekong Connect thun 2024 daok rah tabiak di Ban Long Xuyên tinh An Giang. Mekong Connect lac sa nyaom biai yaok thun hu angan je, lac sa talei pambuak khang kajap di dom tinh Bhum taneran kraong Cuu Long saong Ban raya Ho Chi Minh saong taneh ia. Tinh An Giang caong khin, tapa Nyaom biai Mekong Connect thun ini, brei kein lagaih ka bruk jeng bruk pambuak chuoi yaom kaom, thau tani tanat ka darak pasar, tacei jalan ka pandap kaya nong, pandar ilamo kong nghe piah pambuak, paglaong yaom kaom tagok, jhul khang bruk pablei salih pandap kaya nong, jhul tagok bruk cakrok patagok kinh te bruk pambuak gauk di dua negar hu sa jalan tapen negar Viet Nam – Campuchia. (VOV)

Ban raya HCM kham merat tal bilan 4 thun 2025 meda ngak brei abih baoh sang taik tahak di ban raya. Dalma nan huyen Cần Giờ hu baoh sang kathaot saong jaik kathaot hu daong ralo abih lac 125 baoh sang. Bruk ngak brei abih baoh sang taik tahak lac bruk praong brei ngak samar di Ban raya HCM kham merat ngak brei salah, pamong tal bruk pahadar 50 thun peih paha gah Meraong negar, yasa taneh ia. Langiu di nan, jien ngak pasiam sang daok, dom bhum palei  daok jak ba urang ngak paha  daong brei pandap, pandap pandar. Taong abih jum tangin gauk daong ka  dom baoh sang hu raidiuk kan kandah hu sang piah pacang pandiak pandauk hajan.  

Kapul menyek Viet Nam Petrovietnam pambuak haong Uy mban Mat tran Negar Viet Nam tinh Kien Giang bahrau padang 100 baoh sang Gul pataom ka urang kathaot, jaik kathaot, urang gaok kan kandah di 4 huyen An Biên, Giồng Riềng, An Minh saong Châu Thành. Bruk padang sang gul pataom alin hadiah ka urang kathaot hu rik daong dom bhum palei kathaot rambah, ba mai haniem phol ka rilo urang ka kandah, abih di nyu nan lac ngan haong dom bhum palei hu dom danak dak di Petrovietnam.

Piah pacang caga hu siam lagaih ka bruk thu lagu, njom ia mbak dalam bilan thu 2024-2025; khik kajap halau ia taba ka mbang padai Đông Xuân 2024 – 2025 saong ia pandar ka rahra, So Ngak nong saong Patagok palei pala tinh Tra Vinh hu padang Jalan ngak pacang caga pandiak bhang, kurang ia, njom ia mbak dalam tinh. Abih di nyu nan lac mbang padai Đông Xuân 2024-2025, gah ngak nong pachreih rahra trun pajaih njauk harei njauk bilan; pandar dom pajaih ciuk hu taneh njom ia mbak; pandar dom ilamo ky thuat ka bruk pala drak, sangka phun pala dalam bruk kurang ia taba.

Taong thu ky Lien hop quoc Antonio Guterres hu ba panuac pok meyaom bruk sanya di rajaei anak meta di Syria dalam bruk pacang khik rahra, hu gam dom urang daong. Ong jeng pok meyaom dom bruk sanya ka bruk brei quyền ngak bruk daong siam hu ginup di grauk pabah mbang tapen negar. Gam haong nan ieu bol bhap dunya gul pataom gauk daong rahra Syria tuk taneh ia ini daok hu kein lagaih piah dak padang sa harei hadei siam gheih jang.

Rabuk nhiet doi Chido – tuh tame bhum Barak Mozambique haong prein angin 70km sa mon, ndaoh tal 100km sa mon ngak 15 urang metai saong labaih  172.000 urang khat lahik sang danaok, labaih 5.800 baoh sang gam haong 102 sruh gilai gaok khut tayah, labaih 200 ribau baoh sang lahik ndien. Urak ini negar ini daok kham merat pacang caga rabuk, taong yaom tanut khat lahik saong daong rahra dom labik gaok kan kandah kayua rabuk./.

Dom urang roh duah di dunya daok duh hatai ka Baoh Taneh dalam  harei hadei, tuk bo dom kuhria mboh meng dahlau daih ka tanut pandiak tagok maong yau oh daok njauk, saong langik dak harei dak kan si thau. Kapul Kuhria langik tasik Dunya brei thau dom tathuak nerak meng menyek hóa thạch tagok di tanut glaong abih dalam thun 2023 daok ngak pandaik tagok khang di angaok mbaok tasik saong pandiak dalam yava langik. Meyah kuhria meng bilan 6/2023 - 9/2024, pandiak dalam dunya hu salih oh tui sa bruk halei hu thau meng dahlau daih. Saong thun 2023 saong 2024 meda lac dom thun pandiak glaong abih meng dahlau daih tal ini.