Pho Thu tuong Rajaei Trần Hồng Hà mbaoh tangin tame dom Sarak  taduan 3 huyen mek hu angan palei pala birau lac huyen Mỏ Cày Nam, tỉnh Ben Tre; huyen Chau Thanh, tỉnh Sóc Trăng saong huyen Con Ndao, tinh Ba Ria - Vung Tau. UBND 3 tanh Ben Tre, Sóc Trăng Ba Ria - Vung Tau  khan brei thau saong meyaom tui hukum ba tabiak; tacei pato UBND dom huyen nan patui khik veik saong paglong dom bruk ba tabiak, caik hatai iek praong bruk ngak mbang saong alam hacih sa-at piah khik hu khang kajap dalam bruk padang ngak palei pala birau.

Kuhria mboh hadei di bruk rami ramik veik bruk ngak karja, tinh Tay Ninh hu patrun 49 jabat ngak bruk (pakat tinh trun 19 jabat, pakat huyen trun 30 jabat). Bi thu Tinh uy, Akok HĐND tinh Tay Ninh Nguyễn Thành Tâm khan lac, tui tacei pato di pakat negar, Ban Chap hanh Đảng bộ tinh kham marat ngak tui jalan tacei pato saong sami samar ramik birau rajakar di danak dak chinh tri tinh piah ngak bruk hu siam lagaih tui tacei pato di pakat negar.

So Kong thuong Gia Lai birau peih ngak labik parang iek saong pablei  50 janih pandap, dalam nan hu rilo pandap OCOP pakat tỉnh, pandap kong nghiep palei pala naih gheih, pandap di bhum palei yau kaphe, ia danko hani, rilo limo thu, chanh day, asar pa-ok blait, asar macca, lime janih ratak, dom  pandap ngak meng jru, phun kayau…Ini lac bruk peih ngak danak dak patagok bruk pablei salih di bhum ceik,  bhum atah bayah dalam tỉnh, piah jhul pakhang bruk pabak pandap Viet Nam dalam negar.

Tinh Tien Giang saong Ben Tre hu yaom pablei baoh li-u that saong li-u thu tagok glaong, mikva ngak nong bui sambai. Tukvak ni, urang blei mai tal bein pala piah blei baoh li-u xiem (li-u that), yaom pablei 70 - 80 rabau ndong ka sa pluh baoh (atau 12 baoh) tagok glaong dut haong thun dahlau lac 30 rabau ndong sa pluh baoh. Taeng yaom pablei li-u thu labaih 100 rabau ndong sa pluh baoh. Tui yaom pablei ni, urang pala li-u hu jien laba mek tame meng 30 - 40 rabau ndong sa pluh baoh. Ralo doanh nghiep pablei salih baoh li-u daok kurang baoh li-u piah pablei tabiak darak pasar.

Tui Pasak Kuhria mboh dalau ka langik tasik pakat negar, tui kuhria, melam 23 saong harei 24 bilan 12, meng Đà Nẵng tal Khánh Hòa saong bhum Tây Nguyên hu hajan mbiah, hajan praong, hu labik hajan biak praong gam hagin. Melam 24 saong harei 25 bilan 12, di bhum kreh negar saong Nam Trung Bộ saong bhum Tây Nguyên hu hajan mbiah, hajan praong, hu labik hajan biak praong gam hagin. Dalam tuk langik hajan meda mbuan hu hangin, jakala klak (tam plat) saong hangin khang, meda ia dauk di dom labik biar, dhaong. 

Hãng tin Kyodo di Nhat Ban harei kabroi khan lac, Jabat pasang iek bruk meriak gauk di nagar ni hu ba tabiak jalan ngak bruk pandar Google di nagar My padeih taong bhat di bruk ngak suan hukum độc quyền. Tui ralo panuac brei thau, Google hu pandar dom labik ngak tabiak phon krah dah dien thoai thong minh he dieu hanh Android dak caik pablaoh dom ung dung kayua drei ngak tabiak, hu trinh duyet Chrome, yau sa janih piah khan brei Google Play.

Dom urang ilamo daok oh thau sahaneng habar ka bruk roh duah birau ini ka janih phun karei akaok meti hu mboh di labik jiak ban sit klak saoh di bang Utah, Mỹ dahlau di ini 55 thun oh dreih phun hagait  birau atau dahlau diah oh daok tal urak ini. Dom urang ilamo roh duah phun kayau dahlau diah mbang akaok meti hu duah mboh binah hala khang jeng cur di janih phun ini di thun 1969 saong cuah angan lac Othniophyton elongatum.

Hadei sa guan pasang iek Nhat Ban birau khan lac hu tal 1 dalam 4 anek saih pho thong co so saong trung hoc di nagar ni “ruak nghien ma-in internet”. Ni lac sa bruk praong khin nagar maong iek di bruk “laih tame internet” di dom uranaih dam dara di nagar Dong A ni. Dalam dom anek saih kayua ruak nghien internet, abih tih dom adei hu khan lac “marat klak interner, min oh klak hu”./.