Jalan metro 1 (Bến Thành - Suối Tiên) peih abih pabah mbang saong taduan tuai damuai tame di harei paguh page 22 bilan 12. Dalam 6 bilan akaok meti, metro 1 ngak bruk meng 5h - 22h kuhria abih tih 200 mbang pajeng tuai nao mai yaok harei. Tukvak radaih dahlau atah radaih hadei meng 8 tal 12 minit sa mbang, peih drah samar lac 110 km sa mon saong 80km sa mon jalan ala taneh. Tukvak peih meng ga Bến Thành tal mblang radaih  Suối Tiên abih 29 minit. Meng harei 22 bilan 12 mbiah tal harei 20 bilan 1 thun 2025, bhap bini oh abih jien blei harak ve.Meng harei 21/1/2025,  bhap bini buh jien tabiak blei harak ve tui bruk ba tabiak.

Meng harei 01/01/2025, urang kamei metian daok di bhum urang bangsa takik di tinh Dong Nai hu oh mek jien ka bruk dut iek prein yawa dahlau tuk ndih tapui. Gam haong nan, dom xa, phuong, ban sit peih ngak dalam 3 thun gam hu rilo siam mekre 60% diuk pasang dalam thun umo metian ndih tapui ginup 2 anek ye hu daong 20 trieu dong. Urang kumei menek ginup 2 anek dahlau umo 35 thun brei hu daong sa mbang 1 trieu dong. Ini lac dom sarak dalam Nghi quyet brei adat ka bruk pachreih, daong ngan haong kapul urang, ta-eng menuac ngak siam bruk rahra dalam bhum bahrau hu tinh Dong Nai brei tapa.

Peih ngak Danak dak Pakat negar patagok kinh te - xa hoi bhum urang bangsa takik saong bhum ceik vaktu 2021 -2025, bruk khik ramik, patagok sap ndem panuac puac, akhar vak di bol bhap bangsa Cam tuk halei hu tinh Tây Ninh caik hatai sangka, jhul patagok. Di dang bac Tieu hoc Tân Hưng A, xa Tân Hưng, huyện Tân Châu hu biak ralo rai anek saih hu bac da-a tui tacei pato di dom gru bangsa Cam. Ini lac baoh sang bac ta-eng di Tây Ninh hu ba sap Cam tame pato ka anek saih tieu hoc. Meng nan, dom adei bangsa Cam labik ini hu thau bac  saong thau vak huroh bangsa drei.

Tinh Gia Lai daok ngak siam lagaih dom sarak daong ka anek saih bangsa takik, brei kein lagaih ka dom adei hu nao tal sang bac saong bac da-a siam mekre. Gam haong nan, bhum palei hu dom sarak piah daong anek saih bangsa takik di dom sang bac, daong jien mbang jala pandiak, jien blei pandap pandar, khan ao bangsa, bruk pato padar ka anek saih saong buh jien tame padang ngak siam dom sang bac  gamn daok gam bac, kuhria tui yaok thun tagok tal yaok ty dong. Taphia nan, dom sang bac sangka iek praong ka bruk pato dom ilamo diukrai, abih di nyu nan lac pabak hatai anit ranam ilamo di bangsa drei ka dom adei anek saih.

Dalam thun ini, Bala meng langik tasik di tỉnh Hậu Giang ngak khat lahik kuhria tui jien jaik 5 ty 400 trieu dong. Tui nan, hangin ribuk ngak par tabung sang saong yaok pluh baoh sang jaleih, sang bac, gilang pandap…Hangin ribuk ngak khut metai ralo bein pala phun mbang baoh. Dalam thun ini di tinh Hau Giang rah tabiak 22 labik glut jaleih ar kraong praong jaik 3.000 met vuong.

Jien Won Han Quoc laik trun tanut biar abih dalam 15 thun tapa kayua hatai huac kanda ka kan kandah hadei hatai caga tani tanat di Cục Khik caik Lien bang Mỹ ka bruk cakak trun jien laba, gam haong bruk srau kadau chinh tri dalam taneh ia. Meng akaok bilan 12 tal ini, yaom jien won hu trun 3,9% dut haong jien USD, dui tapa bilan mbang ka 3 jaik gauk. Kuhria meng akaok thun tal ini jien won hu trun 11%. Ini lac jien hu yaom kaom biar abih dalam dom jien bahrau danei angan di chau A dalam thun saong daok hu taduan lac thun jhak abih kuhria meng thun 2008.

Hukum pandar jien padai di Ndang Cong hòa hu Tong thôong birau di Mỹ Donald Trump njauk hatai tui oh brei khan tapa di Ha Vien, ba tal rajaei Mỹ mbuan padeih ngak bruk. Tui kuhria mboh dahlau, abih harei ini, rajaei lien bang meda oh daok jien ka dom bruk ngak meng hare paguh 21/12. Meyah dom urang padang ngak hukum  oh brei kadhun tukvak, rajaei Mỹ  brei kareik pabah mbang meteh saong bruk nan ngak kan kandah rilo bruk karei. Cuc An ninh Jalan mbak  di  Mỹ kakei tuai damuai  meda dak tui gauk atah di dom mblang kapal haok dalam bilan Noel.

Mblang kapal ahaok dunya di ban ine Damascus di Syria hu peih pambang gilac veik. Tui dom urang jakar di mblang kapal ahaok, dalam harei akaok meti peih pambang, hu dom mbang ahaok par dalam taneh ia piah duh ka rahra hu nao mai di dom labik dalam Syria. Ini lac sa dalam dom bruk siam brei mboh bruk tani tanat di taneh ia Trung Dong ini hadei 10 harei kuhria meng tuk bleik jaleih Tong thong negar ini.  Dunya daok pasang iek tani tanat piah maong iek urang bahrau dui ba taneh ia Syria hu ngak tani tanat negar hadei mbang mesuh metiak dui atah 13 thun srau kadau halei oh?