Harei ini, Mbang Bangsa tinh Kien Giang peih bruk ginum biai meyeom dom urang naih gheih dalam bhap bini bangsa takik di tinh. 80 urang lambaok vakil lac dom urang naih gheih lambaok ka 285 urang hu angan je dalam bhap bini bangsa takik di tỉnh. Brei panuac di nyaom biai, ong Lê Trung Hồ, Pho Akaok UBND tinh Kien Giang mboh lac, dom urang hu angan je  hu rik daong ka bruk patagok kinh te- xa hoi, rik tame padang bruk chinh tri di tinh. Urang hu angan je ngak siam bruk pambuak pakat uy, karja bhum palei haong bhap bini urang bangsa.

Kapul jakar ngak bruk di tinh An Giang, kayua ong Lê Văn Nưng, Phaok Bi thu Thuong truc Tinh uy, Akaok HĐND tinh ba akaok, harei kabruai hu nao rivang, tadhau ayuh Giang sinh saong thun birau 2025 di Toa Giam muc Long Xuyen. Kala mbaok urang jakar tinh, ong Lê Văn Nưng tadhau ayuh dom giam muc, linh muc, halau janeng saong bhap bini Kong yao tinh An Giang harei Giang sinh bui sambai, hanim phol, salamat. Dom bruk ngak hu siam gheih di bhum lac hu prein kham marat di gah chinh tri, jum pataom hatung hatian haong gauk abih tih bol bhap, dalam nan hu mikva Kong giao tinh An Giang.

Bruk pambuak drap ar “ Kong cieng Tay Nguyen dalam bruk yulit drap ar Buon Ma Thuot – Dak Lak” meda pambak praong dalam tukvak anak tal. Ini lac asar kadha hadei bruk kuhria iek veik di So Ilamo, Padhih the thao saong Yulit tinh Dak Lak pambuak haong  Cuc Drap ar ilamo, Mentri Ilamo, The thao saong Yulit peih ngak harei kabroi. Hu mbaok tame bruk nan, dom urang hu bac taong chieng, pasiam veik dom kadha oh ka lagaih bhian gaok dalm tuk taong kong chieng, duah thau dom kadha chieng klak di urang Ê Đê, pandar  thaot binguk piah dak dalikan ka ilamo bangsa.

UB Bhap bini tinh Kon Tum daok tacei pato karja pakat huyen, ban saong gah chuc nang taong bhat catang dom balai blei teik kaya nong oh njauk suan hukum, ngak srau dau ka bruk pablei salih. Di 172 labik blei kaya nong dalam tinh Kon Tum tok hu 20 labik hu ginup adat hukum ngak bruk. Daok veik tal 88 labik blei njauk yak klak, salih nao labik karei, 64 labik blei kaya nong lac nao ngak pabak harak gal tui hukum ka meng brei ngak bruk. Dom labik can bhian ngak suan hukum kayua oh tut angan pablei salih, oh pasang iek ki teik trak…

Mentri Ngak nong saong Patagok palei pala birau hu Harak tacei ba UB bhap bini dom tinh, ban tapen tasik meng Phú Yên tal Ca Mau, dom Mentri: Quoc phong, Kong an, Tai nguyen saong Moi truong, jalan mbak pajeng ba, Kong thuong, Khaw tin saong Pathau khan, Pambuak bruk langiu brei peih ngak dom jalan pacang caga ribuk ka 10. Dom bhum palei tuk halei jeng caga blaoh blai, radaih pandap panda piah daong, daong tuk urang  caong khin. Dom mentri, dom gah chuc nang, pambuak haong karja dom bhum palei caga ribuk.

Ndai pruh ia Trevi di ban ine Roma di Italia peih gilac veik meng harei kabruai hadei di labaih dua bilan ngak pasiam saong pahacih. Ralo tuai damuai biak bui sambai piah mai ma-in sa dalam dom labik yulit hu ralo manuac thau di Roma. Bruk ngak pasiam saong padang veik hu ngak hacih dhun mun, nerak, oxit pasei saong ro rah cur tabiak di inem krung meng usuman 18. Italia kahria hu tal 32 trieu tuai damuai mai ma-in di ban ine dalam tukvak Giang sinh thun ni.

Puac adit tapa, di ban Đài Bắc (Trung Quoc) peih ngak bruk pakacah veik baoh tạ brei ka urang umo taha. Mbang pakach pachreih hu 45 urang, umo meng 70 thun tame. Urang umo taha abih di mbang pakacah lac 92 umo. Ralo urang prew catang tuk muk Trình Thần, umo 90 thun, veik tagok hanjol hanjal trak umo 35 kilo, muk hadah mbaok meta yer tangin salam abih urang mong eik. Muk Trình Thần lac sa dalam 45 urang pakacah veih tạ mbang ini.

Canh sat Australia khan lac birau chap mek sa urang likei umo 43 thun lac ngak suan hukum 6 duis pambak tal bruk 98 drei kangaroo matai oh thau njauk hagait di gah Birak Sydney. Dahlau nan, canh sat hu mboh rup dom anek kangaroo pak ban sit Singleton di New South Wales pagam dom anek phao. Bruk chap mek urang ngak suan hukum di puac adit saong mayai duis urang likei nan ngak kanjah jhak di anek athur daok hu nagar khik iek, duis pandar phao haong dom duis karei./.