Melam kabroi, di TPHCM, danak dak Daoh take saong parang iek nghe thuat biak gheih ngan haong kadha “ Kadha daoh oh var” mek hu rilo siam mekre. Hu mbaok di danak dak lac Uy vien Mentri Chinh tri, Akok Quoc hoi Trần Thanh Mẫn; Uy vien Mentri Chinh tri, Ndai tuong Phan Văn Giang, Akok mentri Quoc phong; Uy vien Mentri Chinh tri, Bi thư Thanh uy TP.HCM Nguyễn Văn Nên. Ngan haong kadha “ Daong bhap bini var rup drei”, danak dak hu parang iek tui alat ragam thinh phong angaok mblang langiu langik di jalan Nguyễn Huệ - Lê Lợi, Quận 1. Danak dak padang veik raidiuk pachreih chrai saong makna sajarah dakrai hadah tanjiak di bangsa Viet Nam, di Bol lin Bhap bini Viet Nam dalam sajarah 80 thun dak padang saong patagok.

Uan raok No-el, harei kabroi, Dom urang jakar Uy vien Mentri Chinh tri, Bi thu Trung uong Ndang, Akaok UB Trung uong MT negar Viet Nam Đỗ Văn Chiến ba akaok hu mai rivang, alin pandap tadhau ayuh Giang sinh Taong Yam muc Nguyễn Năng, Akaok Hoi ndong Giám mục Việt Nam saong dom linh muc, halau janeng  Kong yao. Ong Đỗ Văn Chiến taong yaom glong bruk ngak di Taong Yam muc saong dom linh muc, halau janeng  saong urang mikva Kong yao hu rik daong prein yawa gam haong Ndang, taong abih bol lin, abih rahra ngak hu siam dom bruk kinh te – xa hoi thun ini.

Harei Ilamo  bol lin – bhap bini peih ngak harei kabroi di TPHCM pachreih  labaih 3.000 urang hu mbaok tame. Ini lac sa dalam dom bruk ngak hu makna  di TPHCM piah pahadar 80 thun Harei padang Bol lin Viet Nam (22/12) saong 35 thun Harei roya Quoc phong taong abih rahra. Hu biak ralo urang jakar, urang lin, bhap bini, dam dara, anek saih Ban raya hu mbaok tame Harei roya biak chreih chrai tui iek dom kadha daoh ragam tamia hu peih ngak biak gheih yau: Hát mãi khúc quân hành, Đường chúng ta đi, Giải phóng miền Nam, Đất nước trọn niềm vui, Như có Bác trong ngày đại thắng… 

Di tinh Kon Tum bruk jak ba “ Urang bol lin dahlau diah daong gauk patrun kathaot, ngak mbang kinh te naih joi” pambak tabiak praong ralo gah yau ye: pala drak, raong glang, jitvu, ngak tabiak kaya nong daong dom urang ngak bol lin paglong raidiuk saong daong urang hoi raidiuk kan kandah yam tagok patruh kathaot khang kajap. Dalam tỉnh Kon Tum  urak ini hu jiak 800 bruk ngak mbang pala drak raong glong kayua urang hoi bol lin dahlau diah ngak po. Meng bruk peih ngak siam  bruk ja ba “Urang bol lin dahlau diah daong gauk patrun kathaot, ngak mbang naih joi”, baoh sang kathaot trun daok ala 8%. Dom pakat hoi dalam tỉnh  daong ka urang hoi  ngak abih 500 baoh sang kathaot saonng ngak birau 44 baoh sang anit ranam bol lin.

Bruk ngak mbang pablei salih durien di tinh Tien Giang urak ini biak takik kayua pambak tame bilan saong darak pablei  di Trung Quoc. Bruk njauk sangka lac dom thun jaik ini, baoh durien yaom tagok glong, kurang baoh, rilo doanh nghiep jak gauk mai dom labik pala durien ralo di dom huyen Cai Lậy, Cái Bè buh jien tame padang gilang khik piah pandap pablei salih pandap ini. Yaok labik khik piah pablei salih baoh durien  hu jien buh tame  ngak meng 4 tal 6 tỷ đồng. Rilo bilan tapa, kayua  padeih ngak mbang yau nan ye oh lac takik urang ngak mbang pablei salih gaok kan kandah; urang padang gilang durien  ka urang pah trun yaom.

Tong thong birau di Mỹ Donald Trump harei kabroi hu khan lac ong jak ba sa bruk praong yaih khan pacang caga matuy birau paih brei mboh bruk kan kandah biak jhak di dom janih matuy ka prein yawa di urang. Bruk ba ta biak di ong Trump hu rilo bruk dreih haong bruk caga matuy “Just Say No” kayua diuk akaok di ndang Cong hoa Nancy Reagan peih ngak di dom thun 1980 piah pachreih dam dara Mỹ klak matuy.

“Yulit bang tuyet” urak ini hu jeng bruk praong jhul pakhang bruk ngak mbang kinh te di gah Barak Trung Quốc, hu ralo labik rivang biak gheih saong jitvu ma-in bui sambai. Di “Ban bang tuyet” danei angan di Cáp Nhĩ Tân, tỉnh Hắc Long Giang, gah barak Trung Quốc, rilo kadha sarak tagok ia khan tuyet, yau ye thaok binguk ong taha Tuyet biak anit saong Tôn Ngộ Không brei mboh dalam akayat van hoc meng kan di Trung Quoc, pachreih hu bruk sangka di ralo tuai damuai dalam mbang parang iek nghe thuat birau ini.

Tui jabat khik caga bhap bini Brazil brei thau, harei kabroi, sa sruh kapal haok sit pajeng 10 urang laik trun ralo labik pablei salih pandap di pasak ban yulit Gramado, meraong Brazil.  Harak pathau khan camereip brei mboh  taong abih tuai angaok haok oh daok thei diuk. Tui jabat an ninh kong kong bang Rio Grande do Sul, takik di nyu lac 15 urang hu ba tame sang iek ruak di ban, ralo meng sarit thak kayua apui khuah hadei bala haok laik./.