Nyaom biai taong yaom ka bruk peih ngak Danak dak pakat negar patagok  kinh te - xa hoi bhum urang bangsa takik saong bhum ceik, vaktu 2021 - 2030, di bhum Meraong negar birau peih ngak di Ban Đồng Xoài, tinh Binh Phuoc. Tui harak pathau khan di UB Bangsa, mbiah tal ini, ralo bhum palei  gah Meraong negar ngak hu mbluak jang bruk ba tabiak. Meng nan, pabak prein khang patagok kinh te - xahoi, patrun kathaot khang kajap ka bhap bini. Tui nan, daong bhum palei hu jien ndo piah ngak dom bruk karei daok kan kandah jang. Njauk ndem tal, jien mek tame kuhria rah tapa di urang bangsa takik di bhum gah Meraong negar urak ini hu 58,6 trieu dong sa urang sa thun; kuhria tal abih tukvak peih ngak hu 63,4 trieu dong, tagok 4,2 mbang jien mek tame kuhria rah tapa yaok urang di bhum urang bangsa takik di negar.

Brei panuac tacei pato di var Nyaom biai pataom iek veik abih bruk ngak dalam thun 2024, bruk ngak dalam thun 2025 di tinh Bac Lieu meng harei kabruai, ong Lữ Văn Hùng, Uy vien Trung uong Dang, Bi thu Tinh uy Bac Lieu caong khin pakat uy, karja dom pakat kham merat; ngak bruk catang cati; krah hadah, saneng hu ngak hu, ngak njauk tui hukum negar. Dalam nan, marat prein ngak siam gheih 5 janih tapagok kinh te - xa hoi saong 3 bruk ngak patagok birau di tinh, dahlau abih lac srap gap piah ngak harei Festival bruk ngak Sara Viet Nam - Bac Lieu thun 2025…

Kuhria tal harei kabroi hu 115 doanh nghiep ngan haong labaih 61.000 urang ngak di tinh Binh Phuoc khan brei thau urang ngak, jien bilan saong jien thuong Tet ka urang ngak. Tui nan, jien thuong glong abih lac tagok tal 60 trieu dong, hu sa labik ngak mbang pablei salih  hu phun jien meng negar langiu. Kong ti TNHH MTV kayua Karja ngak po, jien thuong glong abih lac 60,1 trieu dong, biar abih lac 500.000 dong. Doanh nghiep hu urang rik jien tame, phun jien Karja, jien thuong hu meng 800.000 dong tal labaih 98 trieu dong. Doanh nghiep bhap bini ngak mbang, jien thuong glong abih lac 70 trieu dong saong biar abih la 500.000 dong.

Tinh Dak Lak caga blaoh hu labaih 250.000 tan ralo anek athur raong, manuk ada piah pablei darak pasar Tet Nguyen dan Ula Naih 2025. Gah raong glang tinh sami samar ngak ralo bruk piah pabak ralo hacih bingi duh ka darak pasar hu tani tanat. Urakni Dak Lak daok kham marat pataom tame raong pabui tui jalan var raong pataom sa labik,  pandar kong nghe glaong, gam pasang iek catang dom jit ruak. Tinh jang daong ka mikva saong doanh nghiep masre phun jien, ilamo raong glang, jang yau padang bruk ngak mbang pambuak gauk ngak tabiak saong pablei pandap.

Mbiah tal ini tỉnh Kien Giang taduan raok jaik 10 trieu tuai damuai, dalam nan hu jaik 1 trieu mbang tuai damuai, jien mek tame meng bruk yulit labaih 25.000 ty dong. Langiu dom danak dak danei angan, tinh daok hu darak melam Vui Fest, parang iek kapal par angaok ia,  dom danak dak ragam ragu ia, tamia roi ia saong dom mbang cuh bingu…Gam haong  bruk hlai tame gauk biak mekre langik tasik, dom bruk rivang ma-in  biak gheih daong bruk yaih khan gheih birau, tinh Kien Giang patui veik  bruk brei  moh labik dang saong caong khin hu jeng “labik suraga padeih padei” dunya. 

Di tuk urang jakar Australia daok ba tabiak ralo jalan ngak piah patrun takik tathuak nerak sang kareih camin, radaih o to ndien hu pablei tabiak di nagar ni tagok samar. Hoi ndong radaih ndien Australia khan lac, di thun 2024, hu 110 rabau radaih o to ndien hu pablei tabiak, tagok 150% dut haong thun 2022. Bruk caik ralo labik sac pin samar saong sarak lagaih di karja Australia hu brei ka bruk pandar randaih o to ndien mbuan lagaih ralo, pachreih ralo manuac blei hu jie hatai tame di tuk salih tapa blei radaih o to ndien.

Dom urang roh duah kong nghe Han Quoc hu patagok saong ba tame ngak iek sa robot hanjol, meda hu mai jaik urang metai meteh rup saong pagam tame rup urang, daong urang meda nao mai hu, tagok takai jan saong yam tapa pacang. Meyah ngak hu jak jeng ye bruk nan lac bruk siam lagaih daong dom urang jaoh jo meda hu mbuan lagaih dalam raidiuk. Robot hu angan WalkON Suit F1, dalam nan hu nhom saong titan, trak 50  kilo saong peih meng 12 mac điện tử ngak dreih yau bruk nao mai di urang nao tabak.

Indonesia birau adat ba tame pandar jalan ala taneh pambuak meng sang magik Islam haong sang agama Thien chua di Jakarta, ni hu lac thaik thaot pambuak dua agama. Jalan ala taneh hu padak padang kreh pusak Jakarta, kreih dua danak dak kien truc praong daok anak gauk meng tapa sa jalan. Pakak jalan taneh pambuak ni Tong thong Indonesia mayai lac bruk ni caong pajum pataom abih nagar, pamaong tal harei hadei hanim phol, salamat ka bhap bini./.