Tinh Long An kuhria caga buh tabiak labaih 106 ty dong piah kuhria caga, daong dom baoh sang sarak karja, dom urang hu raidiuk kan kandah…raok Tet thun nasak Ula Naih. Tỉnh kuhria caga daong ka dom kapol nyaom: urang dalam sarak saong xa hoi; urang ngak bruk daong taneh ia; urang jakar kong chuc, vien chuc, urang jakar padeih hưu, oh ginup prein ngak bruk, ruak kayua bruk ngak; urang ngak kong gaok kan kandah…Tinh jeng hu piah jien kuhria daong dom baoh sang urang jakar bol lin daok ngak bruk di kaoh pulao, sang gian DK1; bol lin khik brei sron mbon Lien hiep quoc;  sangka kuhria ka baoh sang kathaot saong baoh sang urang labik karei mai daok pak ini gaok kan kandah.

Di Palei pala bingu My Phong, phuong 9, Ban My Tho, tinh Tien Giang mikva ngak nong daok sangka bingu piah pablei dalam tuk Tet anak tal. Ngan haong urang ngak nong, bingu Tet lac sa tukvak pala hu makna praong glaong abih dalam thun, yau nan ye mikva caong hu siam lagaih, jien mek tame hu ralo. Bingu Tet thun ni, Palei pala bingu My Phong trun pajaih jaik 730.000 kadung, patrun takik jaik 10% dut haong thun dahlau. Langik alam dom harei tapa biak srau dau haong dom mbang hajan oh njauk bilan ngak ka mikva daok susah hatai, kayua huac ngak kanjah jhak tal bingu.

UB bhap bini Ban Vung Tau, tinh Ba Ria - Vung Tau birau jao brei sang daok di danak dak labik daok birau Thắng Tam ka bhap bini hu taneh njauk mek veik di ban. Tui nan, hu 40 baoh sang akaok meti hu jao brei sang “ anek liso pan di tangin”,  dom baoh sang nan hu rik tame 20% kuhria taong abih tih saong jao brei sang daok. Sang chung cư Thắng Tam  daok di jalan Hồ Quý Ly, phường Thắng Tam, Ban Vung Tau, glong 21 tal kuhria tui jien  labaih 586 ty dong. Sang glong rilo tal ngak blaoh meng puac thun 2021 min kayua tavak harak gal yau nan ye mbiah tal ini meng jao brei sang ka urang blei atau pah daok.

Giang sinh harei kabruai, manuac ndik radaih buyt ndien di metro 1 (Bến Thành – Suối Tien) ralo biak ralo, glong dua mbang dut haong harei dahlau nan. Dalam harei lac hu peih 220 mbang radaih nduac pajeng 90.300 tuai damuai, tagok 2,3 mbang tui kuhria. Kuhria rah tapa hu 411 tuai damuai ka sa guan peih radaih. Piah duh ka tuai damuai, tukvak peih radaih hu tagok 8 minit sa mbang nduac saong 10 minit sa mbang nduac. Tuai damuai nao metro 1 saong 17 jalan radaih buyt ndien pambuak oh mek jien ve. Mikva caong ndik radaih ndien metro ye mai tal 14 ga piah hu daong.

Di ban Đà Lạt, tinh Lam Đong, melam kabroi Tong Kongti Jalan radaih pasei Viet Nam brei ba tame peih radaih siam asar glong La Reine (Hoàng Hậu) duh ka tuai ndik meng Đà Lạt – Trại Mát. Ini lac pandap yulit uan raok Festival bingu Da Lat mbang ka 10 thun 2024.  Dom raong radaih tah angan Hoàng Hậu hu ngak  biak gheih mekre, lac ngak  tui Đông Dương pambuak haong Pháp, gam siam gheih yau meng kan  dahlau di Á Đông gam gheih mekre lai la-ar di Da Lat.

Ong Joe Biden Tong thong My jaik abih tukvak ngak bruk meng harei kabruai hu mbaoh tangin harak ka 50 hukum, dalam nan hu taduan harak lac cim kalang akaok putih nan sa pajaih cim di nagar My saong sa hukum pacang cakak dom urang Quoc hoi taduan mek jien huu mayah njauk duis. Ni lac dom bruk ngak daong jhul samar  dahlau tuk  di Tong thong Joe Biden pok jao quyen ka Tong thong birau Donald Trump harei 20/1 anak tal. Ong Joe Biden jaik padeih bruk lac jang hu khan tapa dom danak dak co so ha tang dalam nagar saong dom vu khi akha daong brei ka Ukraine.

Trung Quoc daok ngak drah samar labik pagam ndien ka jiak 12 trieu got jameng piah sạc ndien, tagok 50% dut saong thun dahlau. Dom got sạc hu padang ralo janih di ralo labik  mbuan ka bhap bini pandar. Trung Quốc brei patui veik bruk padang ralo labik sạc ndien, pasiam veik pandap panda, paglong bruk khik iek saong brei bhap bini pandar. Tui nan, dom bhum palei  tui iek catang saong brei hu dom asar kadha khik brei salamat, jhul pakhang bruk ngak tui kadha ba tabiak pandar labik sạc ndien nan.

Birau ni, Quoc hoi Indonesia hu khan tapa hukum atah klak bruk si ban ine Jakarta, salih ban ine tapa Nusantara ngaok kaoh pulao Borneo, atah di Jakarta labaih 1.200km. Sarak ni lac patrun trak damak ka Jakarta, labik daok gaok ralo manuac diuk rai mablak gauk, taneh glut saong kurang ia. Bruk salih ban ine ni oh tok ngak salih mbaok mata chinh tri bo daok daong patagok kinh te gah Pur Indonesia.